Corpus of Electronic Texts Edition
Annals of Ulster otherwise Annala Senait, Annals of Senat (Author: [unknown])

Year U1478

U1478.0

Kal. Ian. u. f., l. xx. iiii., Anno Domini M. cccc. lxx. uiii.

U1478.1

Barun Dealbhna d'eg in bliadhain-si (do 'n plaidh): .i. Cristol, mac Semais, mic Risderd Nuinnsenn, .i. og macamh dob' ferr do Ghallaibh ina aimsir fein.

U1478.2

Gaeth mor do thecht a n-diaigh Notlaig in bliadhain-si, d'ar' milledh moran d'eallach Erenn & d'ar' brisedh moran do mainistrechaibh & do teamplaibh & do thighibh ar fut Erenn co coitcenn.

U1478.3

Mac Rithbheartaigh d'eg in bliadhain-si: .i. Cithruadh, ollomh Meg Uidhir re dan; .i. fer socraidh, subhaltach, daenachtach & araile.

U1478.4

h-Ua Cobhtaidh, .i. Muircertach Bacach, d'h-eg.

U1478.5

Tadhg Finn h-Ua Luinin d'h-eg in bliadhain-si: .i. sai re leighus & re senchus.

U1478.6

{fol. B 90c}Plaidh mor do techt le luing ar cuan Esa Ruaidh & leathnughudh do 'n plaidh sin ar fud Tire Conaill & a Feraibh Manach & isin Coicid co coitcenn. Ocus dighbala mora do dhenum doibh & Mac an Baird

p.264

Thire Conaill, .i. Goffraigh, d'h-eg di.

U1478.7

Cormac Mag Carrthaigh do sbochadh in bliadhain-si le clainn Diarmada an Dunaigh Meg Carrthaigh & le Cormac, {fol. A 97a} mac Taidhg, mic Cormaic: .i. mac righ dob' ferr einech do bi i n-Erinn ina aimsir fein & araile.

U1478.8

An Gilla Dubh, mac Briain, mic Fheidlim h-Ui Raighilligh, d'eg.

U1478.9

Gilla Padraig, mac Airt Mic Maghnusa, d'eg in bliadhain-si, A. D. 1478.

U1478.10

h-Ua Breislen d'h-eg in bliadhain-si, .i. Tadhg, mac Eogain h-Ui Breislen, ollam Meg Uidhir re breithemhnus & fer tighi aided co coitcenn.

U1478.11

Bicair Achaidh Urcaire d'eg, .i. Tomas Dubh h-Ua Cairpri, fer eagna & crabad & araile.

U1478.12

Indsoighidh do denum d'Aedh Og Mag Mhathgamna 'sa Lucht Tighi ar Brian, mac Remaind Meg Mathgamna & crecha mora do denum do. Ocus Brian fein do ghabail a toraidhecht na creichi.

U1478.13

Emann, mac Uilliam Abaidh, mic espuic Piarais, mic Muiris Airchideochain, d'h-eg 3 Idus Octobris.

U1478.14

Niall Ruadh, mac Aedha Leith h-Ui Manchain (6 Nonas Marcii) & a ben, .i. Nualaith, ingen Ainnrias h-Ui Droma, d'h-eg in bliadhain-si (3 Kalendas Aprilis).

U1478.15

Barrdubh, ingen Eogain h-Ui Fhialain, ben Concobuir h-Ui Breislen, d'h-eg in bliadhain-si.

U1478.16

Tadhg, mac Cathail Duibh, mic Aedha, d'h-eg 3 Nonas Aprilis.

U1478.17

Risdeard,

p.266

mac Emuinn, mic Risdeard Buitiller do marbadh le Fingein Ruadh, mac Fingein Mic Gilla Padraig, i n-dorus Cille Cainnich.

U1478.18

'Sa bhliadhain-si do gabadh Mac Maghnusa, .i. Cathal Og[...]

U1478.19

Ocus plaidh mor ar Senadh Mic Maghnusa a Foghmhar na bliadhna-sa bheos.