{fol. A 96a} Kal. Ian. uii. f., l. x., Anno Domini M. cccc. lxx. iiii.
Donn Ruadh, mac Con Connacht Meg Uidhir, do marbadh le mac Ricaird Mic Cathmhail a trodan.
Flaithbertach Mag Uidhir (
[...]
g Eocagain) d'h-eg ina tigh fein iar m-buaidh Ongta & aithrighe.
Creacha mora do denum do h-Ua Domnaill ar muinntir h-Ui Neill, .i. ar Aedh m-Ballach, mac n-Domnaill.
h-Ua Concobair Fhailgi d'eg in bliadhain-si, .i. Conn, mac in Calbaigh & a mac, .i. Cathair, do righad ina inadh.
Edbard Pluingced, .i. Gallmacam rob' ferr cennus-fedna & daenacht do bi 'sa Midhe, d'eg in bliadhain-si, iar m-breith buadha o doman & o dheamon.
Fergal, mac Seaain h-Ui Raighilligh, d'eg in bliadhain-si.
Cogadh mor in bliadhain-si eter h-Ua Neill & h-Ua n-Domnaill. Ocus mac Aedha Buidhe h-Ui Neill & h-Ua Neill do dhul ar sluaighedh a Tir Conaill. Ocus Tir Aedha do loscadh leis do 'n turus-sin & techt slan dia tigh.
Indsoighidh do dhenum do h-Ua Neill (.i. Enri) ar mac Aedha Buidhe & ar clainn Airt h-Ui Neill 'sa Tuaiscert & creacha mora do chur rompo doibh. Ocus Trian Congail uile do breith orra & h-Ua Neill do breith na crech leis dia n-aindeoin & techt dia tigh imshlan.
An Gilla Dub h-Ua h-Eaghra do marbadh le na derbrathair a feall, .i. le h-Eogan h-Ua h-Eaghra.
Maidm mor do thabairt in bliadhain-si leis h-Ua Ceallaigh ar h-Ua Concobuir n-Donn, .i. Feidhlim, mac Toirrdelbaigh & h-Ua Concobuir do marbadh ann & Mac Suibne cona dhis mac do marbadh ann & moran aile nach airimter annso.
Mairgreg, ingen Aedha Ruaidh Meg Mathgamna, .i. bean Donnchaidh, mic Tomais Oig Meg Uidhir .i. bean rob' ferr crabadh & eineach ro bi 'na h-aimsir — a h-eg Dardain roim Nodlaig & a h-adlucadh a Cluain Eois, fo buaidh Ongtha & aithrighe.
Mag Tigernain Teallaigh Dunchadha, .i. Tadhg, d'h-eg in bliadhain cetna.
Rughraidhe Og Mag Mathgamna d'h-eg in bliadhain-si iar m-breith buadha o doman & o deaman & araile.
Brian, mac Feilim h-Ui Raighilligh, do ghabail in bliadhain-si le Seaan, mac h-Ui Raighilligh (.i. mac Toirrdelbaigh h-Ui Raighilligh) & le clainn Aedha h-Ui Raighilligh.
Uilliam Mac Gaffraigh, .i. duine maith oirecht do mhuinntir clainni Pilib Meg Uidhir, d'h-eg in bliadhain-si, 5 Nonas Marcii.