Corpus of Electronic Texts Edition

Annals of Ulster otherwise Annala Senait, Annals of Senat (Author: [unknown])

Year U1471

U1471.0

Kal. Ian. iii. f., l. uii., Anno Domini M. cccc. lxx. i.

p.238

U1471.1

Caislen na h-Oghmuidhe do ghabail leis h-Ua Neill in bliadhain-si, .i. le Henri, mac Eogain. & is amlaidh so do gabadh e: .i. cumusc do thabairt do clainn h-Ui Neill & do clainn Airt da cheile a t-tosuch an gheimridh, mur ta romaim annso. & brisedh ar clainn Airt & da mac Airt do marbadh ann & moran aile leo. & clann h-Ui Neill do dul assin a timceall an caislein & h-Ua Neill do thecht cuca. & Sile, ingen Neill Gairb Ui Domnaill, bean Neill, mic Airt Ui Neill, do beth isin chaislen & Níall fein & in chuid aile da braithribh {fol. A 95b} do dhul i cenn Ui Domnaill & Conallach. & h-Ua Neill do beith fa' n caislen o thus an geimridh co deredh erraigh. Clann Art do thecht astech cum Ui Neill & in caislen do thabairt do & h-Ua Neill da thabairt da mac fein, .i. do Conn & e fein d'imtecht dia thigh fo buaidh cosgair & comaidhme & araile.

U1471.2

Sluaighedh mór in bliadhain-si le Mac Uilliam Burc a n-Ichtar Connacht do cumnum le mac Briain h-Ui Conchobuir & dul doib fo caislen Sligidh & clann Eogain h-Ui Conchobuir do beth i cenn Ui Domnaill & Domnall, mac Eogain, do dul 'sa caislen. & tor in doruis do brisedh le Mac Uilliam & sith do denum doib.

U1471.3

Trian Conghail uile do gabhail le Conn, mac Aedha Buidhe, in bliadhain-si & a techt astech chuige, .i. mac h-Ui Neill & Mac Uibhilin & Enri, mac Briain Bhallaigh.

U1471.4

Cogadh mor in bliadhain-si a n-Ibh Failgi eter h-Ua Concobuir &

p.240

U1471.5

Iarla Cille Dara & Gaill na Midhe do denum innsoighthi a Fern Mhuighi & crecha mora do dhenum ar Mag Mathgamna. & Mag Mathgamna do tinol a tire & airgti & loiscthi mora & ár daine do thabairt ar Gallaibh do, a n-dighail na creach-sin.

U1471.6

Muircertach, mac Eogain h-Ui Neill, d'h-eg in bliadhain-si.

U1471.7

Indsoighidh do denum do Brian, mac Fheidhlimthe h-Ui Raighilligh, i Clainn in Chaich ar Ferghal, mac Sheaain h-Ui Raighilligh & creacha do cur rompo doibh. & Fergal do breith orra & imruaghadh do beth atorra. & Cathair, mac Iriail, mic Fheidhlim, do marbadh ann & Fergal do ghabail don taib aili.

U1471.8

Ruaidhri, mac Donnchaidh, mic Aedha Meg Uidhir, do marbadh le Colla, mac Aedha Meg Uidhir & lena clainn ag tech Meg Raith i n-Allt Ruaidhin i Termonn. & Donnchadh Og, mac Donnchaidh, mic Aedha Mag Uidhir, do lenmuin Colla & Colla do marbadh do & a mac do

p.242

U1471.9

Sluaghadh do dhenam leis h-Ua Neill a Tir Bresail & Tir Bresail uile do loscadh leis. & mac righ Thire Conaill uile & clann Airt h-Ui Neill do breith air. & h-Ua Neill do thecht da tigh don turus-sin fo buaidh cosgair & comaidhmhe.

U1471.10

Mag Uidhir, .i. Tomas Og, mac Tomais Meg Uidhir, do chur a tighernais de ar gradh De, ar caithimh urmoir a aisi re derc & {fol. A 95c} re daenacht & re cennus-fedna & re feicemhnus coitchenn do damaibh & d'eigsibh Erenn. & tighernus Fer Manach do thabairt da mac, .i. d'Emonn Mag Uidhir & a mac aile d'fhagbail ina thanuisti ar Feraibh Manach, .i. Donnchadh & mac aile a n-espucoid Clochair, .i. Rosa.

U1471.11

Emonn, mac espuic Clochair, .i. espuc Piarus, neoch do bi ina aircideochain i Clochar & ina persun & ina airdtigerna i Clain Inis — fer subhaltach, sochraidh, deghinnsgnech — d'eg in bliadhain-si, 18 Kalendas Maii. & dob' e-sin Domnach Casg in tan-sin.

U1471.12

Aedh, mac Briain, mic Pilib na Tuaidhe Meg Uidhir, d'h-eg 16 Kalendas Marcii.

U1471.13

Samhradh te in bliadhain-si.

U1471.14

Caitilín, ingen Gilla Isu Oig Mic Ghilla Dhuibh, .i. bean Eoghain h-Ui Dhalaigh, d'h-eg a Samhradh na bliadhna-sa.

U1471.15

Tadhg h-Ua Conchubhair, .i. mac in

p.244

U1471.16

Clann Glaisne, .i. Conchubar[...] do ghabhail le Brian Ruadh, mac Cathail h-Ui Raighilligh gu maithibh a Samhradh na bliadhna-so & a leigin amach in bliadhain chedna gan fuaslagadh.

U1471.17

[gap: cut from MS]Philippii et Iacobi, Anno Domini 1471.