Corpus of Electronic Texts Edition
Annals of Ulster otherwise Annala Senait, Annals of Senat (Author: [unknown])

Year U1470

U1470.0

Kal. Ian. ii. f., l. xx.ui., Anno Domini M. cccc. lxx.

U1470.1

Pilib Mhag Uidhir do eg in bliadhain-si, .i. mac Tomais, mic Pilib, mic Aedha Ruaidh; .i. mac uirrigh rob' ferr deirc & daenacht & rob' ferr d'fer cogaidh do bhi ina aimsir & adhbur righ Fer Manach gan frasabra & araile.

U1470.2

{fol. A 94c}Sluaighedh mor in bliadhain-si leis h-Ua Neill, .i. le Enri, mac Eogain h-Ui Neill, a Clainn Aedha Buidhe a cenn Mic Uibhilin 'sa Duibh Trian. & Mac Ui Neill Buidhe & Clann Aedha Buidhe do dhul ar creich ar Mac Uibhilin & h-Ua Neill & Mac Uibhilin do breith orra & troid do thabairt doibh da cheile deredh lai. & briseadh ar Clainn Aedha Buidhe. & Aedh Og, mac Aedha Buidhe, do gabail ann & Mac Suibne na Cailledh & Eoin Ruadh Mac Suibne do gabail ann. Art, mac Domnaill Cail h-Ui Neill, do marbadh ann & caisdel Sgathdergi do gabail don turus-sin d'h-Ua Neill, & a thabairt a laim Mic Uibhilin da choimed. & h-Ua Neill do toigheacht dia thigh don turus-sin fo buaidh cosgair & comaidhmi.

U1470.3

pladh mor a Feraibh Manach an bliadhain-si, .i. Airaing3 & h-Ua Flannagain (.i. Cormac, mac Gilla Isu) Tuaithi Ratha d'eg di & moran aile nach airimhter.

U1470.4

Cogadh mor d'eirghi eter h-Ua Neill & clainn Airt h-Ui Neill in bliadhain-si & clann Airt do dul ar innarbadh a Trian Congail & Conn, mac Aedha Buidhe, do gabail leo a n-aghaidh h-Ui Neill.

U1470.5

Cogadh mor d'eirghi eter Mac Uibilin & Mag Aenghusa & Mag Aengusa do breith a chaeraidhechta a Leith Cathail & coinne

p.230

do gabail do re Mac Uibilin. Innsoighidh do denum do Mac Uib{fol. B 89a}ilin ar Mag Aengusa ina inadh coinne & maidm do thabairt air. & Mag Aengusa do lot & do gabail ann & a dias mac do ghabail ann, .i. Brian & Conn. & ni lugha ina ocht fichit do marbadh isin maidhm-sin & caeraidhecht Meg Aengusa do chur rompo doibh. Aedh Mag Aengusa da leanmhuin & maidm do thabairt do ar in Ruta & Seinicin Carrach Mac Uibilin, do ghabail leis & Seinicin Ruadh, mac Teboid Mic Uibilin, do ghabail ann & moran do gabail & do marbadh ann. & comfhuaslucudh do dhenum atorra ar na braighdibh-sin, leth ar leth & sith do dhenum doibh & araile.

U1470.6

Clann Airt h-Ui Neill & clann Bríain Oig do thocht ar innsoighidh a Tir Eogain & mac Ui Neill do theagmhail an oidhchi-sin i Tobran, .i. Ruaidhri h-Ua Neill. & clann Airt & slicht Enri do thocht fa' n m-baile 'san oidhci & mac h-Ui Neill do marbadh leo (.i. a tig h-Ui Corra Dhobrain) & moran eile nach airimhter sunn.

U1470.7

{fol. A 94d}Sluaighedh mor do dhenum leis h-Ua Neill (.i. Enri) a Trian Conghail co maithibh in Coicid uime: .i. h-Ua Domnaill & Fir Manach & Oirecht h-Ui Chathain & Mac Uibhilin. & a m-beth tamall ar in Coill Ichtaraigh

p.232

ag milliudh arbhann & ag loscadh tighedh. & a n-dul tairis ar fersaid Bona Tuama & a n-dul trid in Fidhbadh & a m-beth oidhci ar in Riasc Mhor & a n-dul assin co h-Edan Dubchairrgi, .i. co baile Cuinn, mic Aedha Buidhe & a m-beth da oidhchi ann. & Enri, mac Briain Ballaigh h-Ui Neill & Feilim, mac mic h-Ui Neill Buidhe & Brian, mac Neill Ghallta, do tocht asteach cum h-Ui Neill. & umla & freghra d'fhaghail do uatha uile & sith do chengal do atorra & Mac h-Uibilin. & h-Ua Neill do dul assin a Rinn Sibhne & a bheth ann re sealad ag loscadh arbha & tighedh.

& mac Aedha Buidhe, .i. Brian, do dhul a n-Aird Uladh & crecha mora do breith leis a timceall in t-sluaigh isin Fidbadh. h-Ua Neill do dul le Mac Uibilín a n-Ard Uladh & a thecht assin dia baile fein. Conn, mac Aedha Buidhe & clann Airt h-Ui Neill & slicht Enri do thecht a Tir Eogain & creacha mora do dhenum doibh ar clainn Fheidhlimthe h-Ui Neill.

U1470.8

Raibhilin Carrach Sabhais & mac Seoain Sabhais do

p.234

dhul ar sibhal oidhchi a Leith Cathail & techt doib a timcell an tighi a roibe in Sheinisgal, .i. Patraig Fait & e fein & cuid da braithribh do gabail doibh & mac in t-Shabhaisigh, .i. Patraig Og, d'fhaghail doibh as na braighdib-sin. & Leith Cathail & seinisgalacht Gall Uladh do thabairt do mac in t-Shabhaisigh aris.

U1470.9

h-Ua Domnaill do dul, sluagh, co Bel Atha Conaill a coinne h-Ui Raighilligh & imruagadh do beith atorra. & mac Aedha h-Ui Raighilligh (.i. Emand) do marbadh ann & mac in espuic h-Ui Gallcobair do marbadh ann don leith aili & eich & daine do marbadh ann. & h-Ua Domnaill do tocht dia tigh don turus-sin.

U1470.10

Clann Airt h-Ui Neill do thecht ar coilltibh Sila Baidhill & ar dhaingnech a ferainn fein & creacha mora do denum doib ar clainn h-Ui Neill.

Clann h-Ui Neill do dhul ar cuartughudh fa cheanntar Sila Baidhill & clann Airt & clann Briain Oig do thegmail doib a timceall in Atha Leathain. & clann h-Ui Neill do brisedh ar clainn Airt & maidm mór do thabairt forra. & Enri, {fol. A 95a}mac Airt h-Ui Neill, do marbadh ann, .i. sai cinn-fhedna & fer do bi lan d'aithne & d'eineach & do derc & do daenacht. & a brathair aile do marbadh ann, .i. Brian, mac Airt h-Ui Neill. & Toirrdhealbhach Ruadh, mac Briain Oig h-Ui Neill & moran da braithribh do marbadh ann.

p.236

U1470.11

h-Ua Neill & a clann do dhul fo caislen clainni Airt, .i. caislen na h-Oghmaidhe. Eogan h-Ua Domnaill & clann Nechtain h-Ui Domnaill do ghabail le clainn Airt a n-aghaidh h-Ui Neill.

U1470.12

Creacha mora do denum do clainn Fheidhlimthe h-Ui Neill ar clainn Muircertaigh Oig h-Ui Neill. Gres do dhenum do clainn Muircertaigh Oig ar clainn Feilim & Seaan, {fol. B 89b} mac Feidhlim & Feidhlimidh Og, mac Feidhlimthe, do marbadh leo, .i. da barraigh a fine fein 'mun am sin. & mac aile d'Feidhlim d'eg 'sa sechtmuin cetna, .i. Niall h-Ua Neill.

U1470.13

Creacha mora do denum do Conn, mac Aedha Buidhe, ar clainn Feidhlim h-Ui Neill.

U1470.14

Mac Donnchaidh in Chorainn, .i. Brian, mac Taidhg Mic Donnchaidh, do marbadh le Tadhg, mac Briain Mic Donnchaidh, a toraidheacht creiche & a mac do marbadh ann, .i. Aedh.

U1470.15

Ruaidhri h-Ua h-Eaghra, .i. mac h-Ui Eaghra Buidhe, do marbadh le mac Mic Donnchaidh in Chorainn, .i. le Muircertach, mac Taidhg Mic Donnchaidh.

U1470.16

Seaan, mac Domnaill Ballaigh Meg Uidhir, do marbadh le Ruaidhri, mac Briain, mic Pilib Meg Uidhir, pridie Idus Aprilis.

U1470.17

Clann Donnchaidh, mic Aedha Meg Uidhir & clann Cormaic, mic Aedha cetna, do dhenum creichi ar Cathal Og Mac Maghnusa a Rinn Airigh.

U1470.18

Diarmait Mac Mathgamna obiit 6 Idus Aprilis.

U1470.19

Caterfhina, ingin Concubair Moir Meg Ualghairg, bean Diarmada Meg Raith, moritur.