Kal. Ian. ii. f., l. xx.ui., Anno Domini M. cccc. lxx.
Pilib Mhag Uidhir do eg in bliadhain-si, .i. mac Tomais, mic Pilib, mic Aedha Ruaidh; .i. mac uirrigh rob' ferr deirc & daenacht & rob' ferr d'fer cogaidh do bhi ina aimsir & adhbur righ Fer Manach gan frasabra & araile.
{fol. A 94c}Sluaighedh mor in bliadhain-si leis h-Ua Neill, .i. le Enri, mac Eogain h-Ui Neill, a Clainn Aedha Buidhe a cenn Mic Uibhilin 'sa Duibh Trian. & Mac Ui Neill Buidhe & Clann Aedha Buidhe do dhul ar creich ar Mac Uibhilin & h-Ua Neill & Mac Uibhilin do breith orra & troid do thabairt doibh da cheile deredh lai. & briseadh ar Clainn Aedha Buidhe. & Aedh Og, mac Aedha Buidhe, do gabail ann & Mac Suibne na Cailledh & Eoin Ruadh Mac Suibne do gabail ann. Art, mac Domnaill Cail h-Ui Neill, do marbadh ann & caisdel Sgathdergi do gabail don turus-sin d'h-Ua Neill, & a thabairt a laim Mic Uibhilin da choimed. & h-Ua Neill do toigheacht dia thigh don turus-sin fo buaidh cosgair & comaidhmi.
pladh mor a Feraibh Manach an bliadhain-si, .i. Airaing3 & h-Ua Flannagain (.i. Cormac, mac Gilla Isu) Tuaithi Ratha d'eg di & moran aile nach airimhter.
Cogadh mor d'eirghi eter h-Ua Neill & clainn Airt h-Ui Neill in bliadhain-si & clann Airt do dul ar innarbadh a Trian Congail & Conn, mac Aedha Buidhe, do gabail leo a n-aghaidh h-Ui Neill.
Cogadh mor d'eirghi eter Mac Uibilin & Mag Aenghusa & Mag Aengusa do breith a chaeraidhechta a Leith Cathail & coinne
{fol. A 94d}Sluaighedh mor do dhenum leis h-Ua Neill (.i. Enri) a Trian Conghail co maithibh in Coicid uime: .i. h-Ua Domnaill & Fir Manach & Oirecht h-Ui Chathain & Mac Uibhilin. & a m-beth tamall ar in Coill Ichtaraigh
Raibhilin Carrach Sabhais & mac Seoain Sabhais do
h-Ua Domnaill do dul, sluagh, co Bel Atha Conaill a coinne h-Ui Raighilligh & imruagadh do beith atorra. & mac Aedha h-Ui Raighilligh (.i. Emand) do marbadh ann & mac in espuic h-Ui Gallcobair do marbadh ann don leith aili & eich & daine do marbadh ann. & h-Ua Domnaill do tocht dia tigh don turus-sin.
Clann h-Ui Neill do dhul ar cuartughudh fa cheanntar Sila Baidhill & clann Airt & clann Briain Oig do thegmail doib a timceall in Atha Leathain. & clann h-Ui Neill do brisedh ar clainn Airt & maidm mór do thabairt forra. & Enri, {fol. A 95a}mac Airt h-Ui Neill, do marbadh ann, .i. sai cinn-fhedna & fer do bi lan d'aithne & d'eineach & do derc & do daenacht. & a brathair aile do marbadh ann, .i. Brian, mac Airt h-Ui Neill. & Toirrdhealbhach Ruadh, mac Briain Oig h-Ui Neill & moran da braithribh do marbadh ann.
h-Ua Neill & a clann do dhul fo caislen clainni Airt, .i. caislen na h-Oghmaidhe. Eogan h-Ua Domnaill & clann Nechtain h-Ui Domnaill do ghabail le clainn Airt a n-aghaidh h-Ui Neill.
Creacha mora do denum do clainn Fheidhlimthe h-Ui Neill ar clainn Muircertaigh Oig h-Ui Neill. Gres do dhenum do clainn Muircertaigh Oig ar clainn Feilim & Seaan, {fol. B 89b} mac Feidhlim & Feidhlimidh Og, mac Feidhlimthe, do marbadh leo, .i. da barraigh a fine fein 'mun am sin. & mac aile d'Feidhlim d'eg 'sa sechtmuin cetna, .i. Niall h-Ua Neill.
Creacha mora do denum do Conn, mac Aedha Buidhe, ar clainn Feidhlim h-Ui Neill.
Mac Donnchaidh in Chorainn, .i. Brian, mac Taidhg Mic Donnchaidh, do marbadh le Tadhg, mac Briain Mic Donnchaidh, a toraidheacht creiche & a mac do marbadh ann, .i. Aedh.
Ruaidhri h-Ua h-Eaghra, .i. mac h-Ui Eaghra Buidhe, do marbadh le mac Mic Donnchaidh in Chorainn, .i. le Muircertach, mac Taidhg Mic Donnchaidh.
Seaan, mac Domnaill Ballaigh Meg Uidhir, do marbadh le Ruaidhri, mac Briain, mic Pilib Meg Uidhir, pridie Idus Aprilis.
Clann Donnchaidh, mic Aedha Meg Uidhir & clann Cormaic, mic Aedha cetna, do dhenum creichi ar Cathal Og Mac Maghnusa a Rinn Airigh.
Diarmait Mac Mathgamna obiit 6 Idus Aprilis.
Caterfhina, ingin Concubair Moir Meg Ualghairg, bean Diarmada Meg Raith, moritur.