Corpus of Electronic Texts Edition
Annals of Ulster otherwise Annala Senait, Annals of Senat (Author: [unknown])

Year U1468

U1468.0

{fol. B 88c} Kal. Ian. ui. f., l. iiii., Anno Domini M. cccc. lx. uiii.

U1468.1

Gnim mor do denum a n-Droiched Atha in bliadhain-si: .i. Iarla Desmuman do dhicennadh, .i. Tomas, mac Semuis, mic Geroid Iarla. & ní aithrisid

p.220

eolaigh co roibhe a n-Erinn riam Gallmacamh rob' ferr ínas é. & a mharbadh a fell le h-Iarla Saxanach & araile.

U1468.2

{fol. A 94a}Mac Donnchaidh Thire h-Oilella d'h-eg, .i. Ruaidhri.

U1468.3

Mag Raghnaill d'h-eg in bliadhain-si, .i. Cathal & taisech do dhenum da mac, .i. do Tadhg.

U1468.4

h-Ua Ruairc d'h-eg, .i. Tigernan, mac Taidhg h-Ui Ruairc.

U1468.5

Baile h-Ui Raighilligh do loscadh & maínistir an Cabhain in bliadhain-si le Gallaibh & leisin Saxanach ler' dichennadh Iarla Desmuman & araile.

U1468.6

Maidm mor i m-Beinn Uama do tabhairt le Conn, mac Aedha Buidhe h-Ui Neill, dú ínar' marbadh in Sabhaísech.

U1468.7

Indsaighidh do dhenum le Donnchadh, mac Tomais Meg Uidhir, ar Pilib, mac Con Connacht Meg Uidhir, a Tír Cennfhoda & crecha mora do thabairt leis. Muindter Donnchaidh do dhola leisna crechaibh a Clainn Ceallaigh & Donnchadh do fhágbail doibh ar deredh na crech, becan daine. Mac Con Chonnacht do breith air & toraidhecht maith do dhenum dó. Donnchadh do inntogh re mac Con Chonnacht & é fein & a mac do marbadh don turus-sin le Donnchadh. Donnchadh do toighecht dia tigh don turus-sin fo buaidh coscuir & comaidhmhe & araile.

U1468.8

h-Ua Cathain d'h-eg in bliadhain-si, .i. Maghnus h-Ua Cathain.

U1468.9

h-Ua Mail Conaire d'h-eg, .i. Torna,

p.222

ollam h-Ui Concobuir Connacht.

U1468.10

Mac Goffraigh Ruaidh Meg Uidhir d'h-eg in bliadhain-si, .i. Ruaidhri.

U1468.11

Mailechlaind, mac Donnchaidh Mic Gaffraigh, quieuit in Christo,

U1468.12

Moran do Cloinn Gaffraigh do marbadh in bliadhain-si le clainn Aedha, mic Pilib na Tuaidhi Mheg Uidhir, um Mac Gaffraigh fein (.i. Donnchadh, mac Donnchaidh Dona) & um a mac, .i. Feidhlím, & im a derbrathair, .i. Eoin & a mac sin, .i. Diarmait, mac Eoin & triur aile imaille riu, scilicet, Idibus Augusti.

U1468.13

Aiffric, ingen h-Ui Banain, .i. in ben do bí re h-athaidh d'aimsir ag Pilib Mag Uidhir — .i. Pilib, mac Tomais, mic Pilib na Tuaidhe Meg Uidhir — d'h-eg 7 Idus Iulii.

U1468.14

Aedh, mac Philib, mic Tomais Mheg Uidhir, do marbadh in bliadain-si le cloinn Aedha, mic Philib na Tuaidhe Mheg Uidhir.