{fol. B 88b} Kal. Ian. iiii. f., l.x.ii., Anno Domini M. cccc. lx. ui.
Maidm mor do thabairt ar Ghallaibh in bliadhain-si leis h-Ua Conchobuir Failghi, .i. Conn, mac in Chalbaigh, dú inar' marbadh Seaan, mac Mic Tomais, .i. sai cinn-fedhna. & ní fetar a rim, no a airim, ar' gabadh do braighdibh maithibh Gall ann, fa ab Atha Truim & fo Uilliam Óg Nuinnsenn & fa Cristoir Pluingced et alii multi.
Ri Tuadhmuman d'eg, .i. Tadhg, mac Toirrdelbaigh h-Ui Briain.
Aine, ingen Meg Eochagain, .i. ben Tomais Oig Meg Uidhir, righ Fer Manach, d'eg in bliadhain-si.
Maidm mor do thabairt ar Gallaibh Machaire Oirghiall le h-Aedh, mac Eogain h-Ui Neill.
Maidm do thabairt ar Mag Mathgamna le Gallaibh na Midhe, du inar' gabadh Aedh Og Mag Mathgamna & Mac Donnchaidh Clainni Ceallaigh et alii.
Ri Oirgiall d'eg in bliadhain-si, .i. Feidlim, mac Briain Meg Mathgamna.
Brian, mac Amhlaim Meg Uidhir, cenn a aicme fein & tigherna Clainni h-Amhlaim, d'eg in bliadhain-si.
h-Ua Mael Patraig d'eg in bliadhain-si, .i. Maghnus h-Ua Mael Patraig.
Lochlainn Mor, mac Aedha, mic Pilib, d'h-eg.
Brian, mac Gilla Patraig, mic an Airchideochain Moir (Meg Uidhir), .i. abb Lesa Gabail, d'h-eg 3 Idus Ianuarii.
Domnall h-Ua Leannain, .i. cananach do Muinntir Lesa Gabail, d'h-eg, .i. fer aenda, nemurchoideach. Obiit Nonis Maii.
Cu Mara (.i. in Gilla Gruamda), mac Alaxandair, mic Somairle Mic Caba, do marbadh Nonis Iunii.
Tadhg Dubh, mac Briain Mic Gilla Choisgle, d'h-eg an bliadhain si: .i. fer urrais mhoir i n-Erinn & i n-Edaill; oir as e do tabaidh innsa Roim eruic Chon Culainn ar Chonnachtachaibh.