Kal. Ian. ui. f., l.xx.uii., Anno Domini M. cccc. lx. ii.
Cogadh mór d'eirghi eter h-Ua Neill (.i. Enri) & h-Ua Domnaill .i. Aedh Ruadh, mac Neill h-Ui Domnaill & clainn Airt, mic Eogain h-Ui Neill. h-Ua Neill do dhul, sluagh mor, a Tir Conaill, .i. h-Ua Cathain & Mag Uidhir, .i. Tomas Óg. & do bi h-Ua Neill (.i. Enri) don turus-sin da oidhci a Fanaid ag a loscadh & ag a milliudh & da oidhci aile a Cloinn (no n-Gleand) Eidhile.
Graíne, ingen Tomáis Oig Mheg Uidhir, .i. ri Fer Manach, do eg in bliadhain-si, .i. ben Mic Maghnusa Mheg Uidhir (.i. Cathal). & sgel mor a n-Erinn ég na deghmná-sin & araile.
Brian, mac Pilib Meg Uidhir, do marbadh (.i. caicidhis roim Nodlaig) le Ruaidhri, mac Airt h-Ui Neill. & fa lan Eire uile do clu & d'airimh & d'egnum & d'einech an Briain-sin. & Emann Ruadh, mac Seaain Meg Uidhir, do marbadh leisin Ruaidhri cetna-sin in lo roim Brian do marbadh leis.
Maínístir Brathar Minúr do thinsgnadh in bliadhain-si a Muinechan re linn Feidhlím, mic Briain, mic Ardghail Meg Mathgamna, do bheith ina righ ar Oirghiallaibh.
Matha h-Ua h-Eogain, aircinnech Innsi Cain for Loch Eirni, .i. mac in Oifficel Riabaigh, .i. Gilla Domnaigh, mac Matha (.i. in Maighister Mor), d'eg in bliadhain-si.
Prioir Daim Innsi (.i. Parrtolon, mac Aedha h-Ui Fhlannagain) d'eg in bliadhain-si ar Loch Dearg .
Niall, mac Cormuic, mic an Ghilla Dhuibh, mic Aedha, do bhathadh ar Port Cluana an t-Shnaigh in bliadhain-si, .i. Purt na Teinedh Aeil.