Kal. Ian. ii. f., l. xxiiii., Anno Domini M. cccc. l. ix.
{fol. A 92c}h-Ua Briain, .i. rí Tuadhmuman, d'h-eg in bliadhain-si, .i. Toirrdelbach h-Ua Briaín.
Maidm mor do thabairt le h-Iarla Cille Dara ar h-Ua Concobhair Fhailghi, .i. Conn, mac an Calbaigh h-Ui Conchobuir, dú inar' gabadh é fein & inar' marbadh mac mic Uilliam h-Ui Cheallaigh, .i. Uilliam, mac Emuind, mic Uilliam, mic Maileachlainn, mic Uilliam, mic Donnchaidh Muimnigh h-Ui Cheallaigh & moran dia muinntir & araile.
h-Ua Birn d'h-eg in bliadhain-si, .i. Brian h-Ua Birn, .i. taisech Thire Briuin, iar caithemh a aisi gu mór.
h-Ua Cuirnin do eg in bliadhain-si .i. Maghnus h-Ua Cuirnin, .i. ollam h-Ui Ruairc, .i. sai re senchus.
Seaan Cam, mac Con Uladh, Mac an Bhaird, d'eg in bliadhain-si, .i. sai fhir dana.
Crecha Cinel Duachain (alias, Luachain) do dhenam le Brian, mac Pilib mic Tomais Meg Uidhir, in bliadhain-si.
Crecha Muighi Slecht do dhenum le Mag Uidhir an bliadhain cetna, .i. le Tomas Óg Mag Uidhir, & baile Meg Samradhain do loscadh leis don turus-sin.
Glaisne, mac Concobuir h-Ui Raighilligh, do marbadh le clainn {fol. B 87c} Rugraidhe Meg Mathgamna an bliadhain-si.
h-Ua Neill, .i. Enri do thabairt sluaigh Gall leis co caisdel na h-Oghmaidhe da ghabail ar clainn Airt h-Ui Neill & sith do dhenum doibh don turus-sin & araile.
Ferghail mac Tomais h-Ui Raighilligh, d'h-eg in bliadhain-si, iar forba a aisi.
Mael Muire, mac Taidhg, h-Ua Cianain d'h-eg in bliadhain-si, .i. adbhur suadh i senchus & a n-dan.
Mairgreg, ingen h-Ui Breislen, .i. mathair Phiarusa, mic an Abaidh, obiit Kalendis Februarii.