Corpus of Electronic Texts Edition
Annals of Ulster otherwise Annala Senait, Annals of Senat (Author: [unknown])

Year U1454

U1454.0

Kal. Ian. iii. f., l. xx.ix., Anno Domini M. cccc. l. iiii.

U1454.1

h-Ua Domnaill, .i. Rughraidhe, mac Nechtain h-Ui Domnaill, do marbadh do Domnall, mac Neill (Gairbh) h-Ui Domnaill. & is amhlaidh so ro marbadh e: .i. h-Ua Dochartaigh do gabail Domnaill a feall


p.180

& a cur a chaislen Indsi. Muinnter h-Ui Dochartaigh, .i. lucht coimeda Domnaill, do fheall {fol. A 91b} for h-Ua n-Dochartaigh: .i. é fein do gabail & Domnall do legan amach. Mar do chuala h-Ua Domnaill, .i. Rughraidhe, Domnall do ghabail leis h-Ua n-Dochartaigh, do tinoil se sluaigh chuigi & do-chuaidh se a timceall caislein Innsi & h-Ua Domnaill aile fo sgáil ann, .i. Domnall & h-Ua Dochartaigh a laim ann ag a muinntir fein & ag Domnall. Rughraidhe & Mac Uibilin do beith a gabhail in chaislein ar Domnall. Domnall imorro do dhola ar barr an caisdeil & cloch do bualadh amach uadh (Nonis Aprilis) ar h-Ua n-Domnaill (.i. Rughraidhe) & do marbh e don urchur-sin. & tainic fein amach iarum fa buaidh coscair & ro lean an sluagh & do-rindi édail mor orra. & ro gab fein Tir Conaill co h-imshlan o sin amach & araile.

U1454.2

Domhnall, mac Seaain h-Ui Raighilligh (.i. Domnall Ban O Raighilligh), do eg in bliadhain-si.

U1454.3

Lasairfhina, ingen Mic Maghnusa, .i. ingen Cathail Oic, mic Cathail Mhoir, ben h-Ui Fhialain, .i. Sheaain, mic Eogain h-Ui Fhialain, .i. ben daenachtach, deighbesach, obiit 6 Idus Iunii .

U1454.4

Seaan Buidhe Mac Amhlaim, .i. mac Briain, mic Amhlaim, mic Pilib, mic Amhlaim, mic Duinn Charraigh


p.182

Mheg Uidhir & Gilla Patraig Riabhach, a derbrathair aile, do marbadh a feall le Níall, mac Cormaic, mic an Gille Dhuibh, mic Aedha —a quo Clann Aedha Cloinne Amhlaim— mic Pilib, mic Amhlaim, mic Duinn Carraigh Meg Uidhir, 5 Idus Maii.

U1454.5

Graine, ingen Conchobair Mic Maghnusa, maigden deighbesach, obiit 6 Idus Ianuarii.

U1454.6

Seanmoir do radha in bliadhain-si ar in Cloich Chuirr i Fhearaibh Manach do Thadhg h-Ua Dhonnchadha, .i. la San Laurais. & as uime do sgrib me sin, ar son gurab' aithnidh dham gu b' fhuil an t-shenmoir-sin na Cloiche Cuirre 'na h-aireas ag a lan do dhainibh.