Corpus of Electronic Texts Edition
Annals of Ulster otherwise Annala Senait, Annals of Senat (Author: [unknown])

Year U1450

U1450.0

Kal. Ian. u. f., l. x.u., Anno Domini M. cccc. l.

U1450.1

& bliadhain na n-Gras isin Roim h-i; .i. an Dorus Ordha d'fhoslugadh isin Roim. Mag Uidhir do dhul cum na Roma in bliadhain-si, .i. ri Fer Manach, .i. Tomas, mac Tomais, mic Pilib na Tuaidhe. & ba bronach damha & filedha & lucht uird Erenn ina diaigh. Uair nir' fhagaibh tar a eis a n-Erinn nech ro bo mo comain orra sín inás é & nech is mo ro cennaigh do

p.166

dhán & d'eladhain. & mí re Lughnusadh do fhagaibh se a baile fein do dul as ín turus-sin. & sechtmuin a n-diaígh a imtechta, tainic Donnchadh Dunchadhach Mag Uidhir, .i. mac athar do Mhag Uidhir, d'innsoighidh Cathail Meg Uidhir, .i. mac do Mag Uidhir (.i. do Tomas Og, in Cathal-sin). & do gabh se h-e ina thigh fein a Cnoc Ninte & ruc leis h-e & a crech on Cnoc co Gort an Fheadain & ro marb se annsin e tre fhinghail. & ro-cuaidh fein a Teallach n-Dunchadha & ro boi a cocadh ar Emonn Mag Uidhir & ar Donnchadh Mag Uidhir. Emonn & Donnchadh do dhul a sort coinde re Donnchadh Dunchadhach & sith do denam doibh fri aroile. & Emonn do ghabail Donnchadha Dunchadhaigh a n-Gabail Liuin & tuc leis h-e co h-Achaidh Urchaire & do bean cos & lamh de a n-íc a drochcuingill fein, .i. marb{fol. A 90b}tha Cathail Meg Uidhir. Do moladh imorro an dighail-sin do-rinne Emonn a n-eraic na finghaile-sin do-rinne Donnchadh Dunchadhach & araile.

U1450.2

h-Ua Flannagain (.i. Muircertach) Tuaithi Ratha do dhul cum na Roma in bliadhain-si & a eg isin Roim don plaidh, .i. sechtmain iar feil Brighde, fa buaidh aithrighe. & do-ronadh taisech da derbrathair for Tuaith Ratha ina inadh, .i. Cormac h-Ua Flannagain & araile.

U1450.3

Pearsun Daim Innsi Loca h-Eirne (.i. Nicolas), .i. in

p.168

persun h-Ua Flannagain, do eg isin Roim don turus-sin & araile.

U1450.4

Sluaghadh do denamh d'Enri h-Ua Neill & d'Art h-Ua Neill, .i. meic Eogain h-Ui Neill (.i. ri in Coiced), ar Trian Conghail do cumnam le Mac Uibhilin.

U1450.5

Niall, mac Enri, mic Eogain h-Ui Neill, do dhul d'iaraidh creiche ar Muircertach Mac h-Ui Neill Buidhe. An creach do gabail do Niall & da muinntir. Mac h-Uí Neill Buidhe do breith ar Niall & Eogan, mac Briain Oig h-Ui Neill. Do cuiredh annsin a muinnter do cenn Neill. Tuc dino Eogan, mac Briain Oig, mic Briain Moir, mic Enrí aimreidh h-Ui Neill, da buille sleighi ar Niall & ro marb e & ro h-adhlaiced a n-Ard Macha an Niall-sin & araile.

U1450.6

Sith do dhenum do Sheaan, mac Eogain h-Ui Raighilligh, & do Domnall Ban h-Ua Raighilligh re ceile. & Ferghal, mac Tomais Moir h-Ui Raighilligh, d'athrighadh doibh & righi na Breifne, uile do Sheaan, mac Eogain & Ferghal do ghabail tuarrustail Seaain & araile.

U1450.7

An t-espuc Mag Uidhir do eg in bliadhain-si (id est, in nocte Sancti Nicholai): .i. espuc Clochair, .i. Piarrus a ainm & do cloinn Osgair, mic Lachlainn Meg Uidhir, do & a eg for Oilen Locha Iamhrugan a Claín Inis Muinntiri Cianain for Loch Eirne & a adlucadh a Lis Gabhail, mí ria Nodlaic & araile.

U1450.8

Tadhg, mac Pilib, mic Tomais Mheg Uidhir, do marbadh le cloinn Cormaic Meg Samradhain mí ria Nodlaic & a adhlucadh a Lis Gabhail.

U1450.9

Gilla Patraig, mac in Airchideochain Moir Meg Uidhir, .i. mac

p.170

Muiris, mic Matha, obiit 5 Idus Nouembris.

U1450.10

Anrias h-Ua Droma, .i. mac Gilli Crisd h-Ui Droma, do eg in bliadhain-si: .i. fer treidhech, cogusach, iar techt on Roim bliadhain na n-gras, in 55 anno sue etatis.

U1450.11

h-Ua Caiside Cuile, .i. Tadhg, mac Oisep, mic Taidhg Moir, mic Gilla na n-Aingel h-Ui Caiside, d'h-eg in bliadhain-si: .i. ollam Fer Manach re leighis & araile.