Kal. Ian. i. f., l.x.ii., Anno Domini M. cccc. xl.uii.
Domnall Ballach Mag Uidhir, .i. mac Tomais, mic Pilib Mheg Uidhir do marbadh (.i. 4 Idus Februarii) le Donn, mac Pilib (na Tuaidhe) Meg Uidhir & le macaibh Airt Mheg Uidhir & le macaibh Mic Oirghiallaigh & le machaibh h-Ui Daimin, secht la roim fheil Beraigh na bliadhna-sa. & Domnall ag tect a Breiffne h-Ui Raighilligh & ní roibhe sé ann acht lucht coiti do macaibh mic Daibheid Meg Uidhir & do dainibh ailibh & se ag dul co baile Enri h-Ui Neill & sé i n-easaenta rena braithribh fein, .i. re Tomas Óg, ri Fer Manach & re Pilib, .i. tanusti in tire. & ro ghabsadur o Loch soir tre Barr na Cuile & tarrla Donn & clann Airt cuca & ro marbsat Domnall annsin do shoighdibh. & do bi an oidhci-sin a muigh & do h-adhlaiced arna mharach a Mainistir Lesa Gabhail h-é.
Aedh, mac Tomais
Borgaill, ingen Mic Duarcain, d'h-eg 16 Kalendas Nouembris.
Mac Caba Breifnech d'h-eg in bliadhain-si: .i. Cormac, mac Gilla Crisd, Mac Caba & Enri Mac Caba, a derbrathair, do thogadh do Shil Raighilligh & do Clainn Chaba archena ina Consdabla 'sa Breifne & araile.
Comhorba Fidhnacha do eg in bliadhain-si, .i. fer tighi aidhedh co {fol. A 89d} coitcenn.
An bliadhain-si do cuiredh cenn Frangcach le Tomas Óg Mag Uidhir, .i. ri Fer Manach, ar tempoll Achaidh Urchaire a n-onoir Dhé & Tighernaigh & Ronain. & as e do-roine an beann soir don tempoll ar a anmain fein & araile.
Feidhlim, mac Seaain, mic Pilib h-Ui Raighilligh, .i. adbur righ Breifne ar einich & ar eaghnum, do ghabail a fell a m-baile Atha Truim le Furnafal, .i. fer-inait righ Saxan a n-Erinn, ar n-dul do ar a icht fein. & plaidh mor do thecht an tan-sin a m-baile Atha Truim & Feidlim do eg di iar m-buaidh ongtha & aithrighi: .i. tri sechtmuine re Samain & a adhnucal a Mainistir na m-Brathar a n-Ath Truim & araile. & mac mallacht ar urchoit & diabal ar olcaibh in Furnafal sin & as ed aderid eolaigh Erenn ris, nach tainic o Iruath, ler' cesadh Crist, anuas a comolc ar drocgnimradhaibh.
Eogan, mac Pedrais, mic Saerdalaigh h-Ui Breislen, .i. ollam breithemhan Fer Manach & ard airchinnech Airigh Mhaelain, do eg an bliadhain-si.