Kal. Ian. u. f., l. x.iii., Anno Domini M. cccc. xxx.ix.
{fol. B 85b}Mag Uidhir do ghabail in bliadhain-si (.i. im fheil Patraig) le Domnall m-Ballach Mag Uidhir, a caislen Meg Uidhir fein & Pilib Mag Uidhir do légan amach an la cetna do Domnall. An tan iarum ad-chuala Enri h-Ua Neill Mag Uidhir do beith i l-laim, ro tinoil sochaidhe imdha & tainíc co Port Abla Faelain a coinne Pilib & Domnaill & Mag Uidhir a laim acu. Mag Uidhir do legan amach an la-sin & braighdi do thabairt as, .i. a mac fein, Emann Mag Uidhir & ingen Meg Eochagain, .i. bean Mheg Uidhir & braighdi imda eile. & caislen Indsi Ceithlenn (.i. Indsi Sgeillenn) do thabairt do Domnall Ballach Mag Uidhir & araile.
h-Ua Domnaill (.i. Niall) d'h-eg ina laimdechus ag Gallaibh & a m-Breatnaibh testa se & Nechtain h-Ua Domnaill do righadh for Tir Conaill & araile.
Mor, ingen Aedha Meg Samradhain, .i. ben mic Briain Mic Maghnusa, obiit 4 Nonas Februarii.
Seaan Cam, mac Maighister Seoain Meg Uidhir, .i. nepos Airchidiaconi Magni Mheg Uidhir, persun Chulmaine, obiit 8 (alias, 5) Idus Ianuarii.
Gilla in Coimdegh h-Ua h-Eogain obiit.
Henri Ruadh, mac Briain Mic Gilla Fhinnein (.i. taisech Muinntiri Peodachain, Brian), d'eg 7 Kalendas Aprilis.
Brian h-Ua Maelagain obiit.
Sadhb, ingen h-Ui Corcrain, obiit.
Tadhg Caech, mac Aedha, mic Pilib na Tuaidhe Mheg Uidhir, obiit.
Mailir, mac Mic Fheorais, do eg in bliadhain-si don teidm: .i. oide eínígh & aesa h-eladhna & araile.
Feradhach, mac Duind, mic Con Connacht Meg Uidhir, do marbadh in bliadhain-si le h-Oirghiallaibh.