Kal. Ian. i. f., l. x., Anno Domini M. cccc. xxx. ui.
{fol. B 85a}Concobur, mac Seaain h-Ui Raighilligh, .i. mac righan da Breifne, do eg in bliadhain-si, .i. fer einigh & egnuma.
Niall, mac Eogain h-Ui Neill, do mharbadh ar greis oidhci ina tigh fein do Clainn Cinaith in Triucha & moran dia muinntir & araile.
Crannog Locha Laeghairi do ghabhail le clainn Briain Oig h-Ui Neill in bliadhain-si. h-Ua Neill & Enri h-Ua Neill do dol a timcell an Locha & fis do chur uatha ar cenn Meg Uidhir, .i. Tomas Og Mag Uidhir, .i. ri Fer Manach. & do badur ag denum coitedh do ghabail na crannoigi for clainn Briain Oig. Is h-i imorro comuirle do-ronsad clann Briain: in crannog do thabairt d'h-Ua Neill & sith do denum. h-Ua Neill & Mag Uidhir do dul ar innsoighidh co Tir Aedha. Crecha mora & airgthi imdha & eachta daine do dhenum leo don turus-sin. Seaan Mac Gilla Martain, .i. doirrseoir Meg Uidhir, do marbadh don turus-sin lesin toraidh (.i. clann Tuimilin h-Ui Ghallcobair). h-Ua Neill & Enri h-Ua Neill & Mag Uidhir do thoighecht dia tigh don turus-sin & araile.