Corpus of Electronic Texts Edition
Annals of Ulster otherwise Annala Senait, Annals of Senat (Author: [unknown])

Year U1435

U1435.0

Kal. Ian. uii. f., l. xx.ix., Anno Domini M. cccc. xxx. u.

U1435.1

h-Ua Neill do dhul, sluagh, a Feraibh Manach in bliadhain-si & longport do gabail do for Craibh h-Ui Fhuadachain & a beith tri h-oidhci forri. Fir Manach do chor a n-imirced for Loch siar & ni rabhadur arrtraighi aco, acht en leac-oidhredh for an Loch. & do-chuadur a m-ba uile & a capaill marclaigh for Loch siar. Mag Uidhir do tinol shluaigh moir re h-aghaidh h-Ui Neill & sith do dhenum atorra fa deredh & Mag Uidhir do dhol a cenn h-Ui Neill. h-Ua Neill do dul assin a Tir Conaill da h-innradh. Loisgthi mora do denum doibh don turus-sin & Seaan, mac Domnaill h-Ui Domnaill, do marbadh leo d'en urchur soighde. h-Ua Neill do thoighecht dia thigh don turus-sin.

U1435.2

Domnall, mac Eogain Meg Carrthaigh, .i. feichemh coitcinn rob' ferr do bi a n-Erinn ína aimsir, do thoitim le Tadhg, mac Cormaic, mic Diarmata Meg Carrthaigh.

U1435.3

Cundais Desmumhan do eg in bliadhain-si: .i. ingen Mic Uilliam Burc, .i. ben Shemais Iarla.

U1435.4

Donn, mac Con Connacht Meg Uidhir, do eg in bliadhain-si {fol. B 84d} iar m-buaidh aithrighi: .i. fer eínigh & eghnuma. & a dhol a n-Ord Chananach Cluana Eois, ar cur an t-shaeghail de ar gradh an Coimdhegh & araile.

U1435.5

Comaenta cogaidh do dhenam do Brian Og h-Ua Neill & do Nechtain h-Ua Domnaill a n-aghaidh h-Ui Neill (.i. Eoghain), & a clainni. h-Ua Neill — & a clann (.i. Henri & Aedh) do gluasacht a caeraidhechta — do dhol a

p.136

Cinel Moein a coinde Briain & Nechtain. Longport h-Ui Neill do ghabail isna Rasaibh an tan-sin. Mur do chuala Nechtain & Brian Og sin, do tinoiledur a sluaigh a n-ein inadh do thabairt amais longpuirt for h-Ua Neill & tangadur rompo, no co rangadur na Rasa. h-Ua Neíll do chor asa longport da aindeoin doibh an oidhci-sin & longport do ghabail doibh fein an oidhci-sin isna Rasaibh. h-Ua Neill & a clann & Mac Domnaill Galloglach do dhol a comairle cidh do dhendaís an oidhci-sin. Is i imorro comuirle do ronsadur {fol. A 88a} .i. innsoighidh longpuirt do thabairt for an sluagh. Enri h-Ua Neill do denum tengtha maithi re Mac n-Domnaill & rena braithribh fein & rena lucht leanamna, .i. meanma maith do beith acu cum a namad. Ni dubadh oidhche & ní banadh gnuise do-ronsat no h-uaisle fa' n aithesg-sin & do gluaisedur rompo as a aithle-sin co tai, tosdadhach, no co rangadur an longport. Do-cuaidh imorro Enri h-Ua Neill rompo co crodha, cosgurach & co laidir, lancalma, co rangadur ar lairmedhon a namad. Do buail imorro Mac Domhnaill Galloglach & Mac Suibne Fanad ar a cheile annsin.

p.138

& do badur laich ag a leadragh atorra ar gach leith dib. Ni aithnighdis dono na caraid & na namaid a cheile isin gleo-sin, tre dhorchacht na h-oidhce & tre dlus na laechraidhe. Do sgeinndis dono caertha teinedh do cheinnbertibh na curadh & do luirechaibh na laech. Tarrla dono Aedh h-Ua Neill & Brian Og h-Ua Neill 'sa n-irghail-sin fri a cheile. Aedh do thabairt buille sleighi ar Brian, gur' tromloit h-e. Brian & Nechtain do elogh rompo an oidhci-sin & a n-galloglaich d'fhagbail doibh tareis na toraind-sin. Ni roibe iarum fis a n-esbadha ag fedain dhibh an oidhchi-sin. Mar fuair Mac Suibne fis Nechtain & Briain Oig da fhagbail fein, 's edh imorro comuirle do-roine: sgiath tar lorg do ghabhail & elogh gan fhis d'h-Ua Neill. Enri & a braithri d'fhaghail a fesa-sin & Mac Suibne do lenmuin doibh & Maidm Shleibe Truím do buain asdu. Mac Suibhne fein do gabail ann co sochaidhe dia muinntir. h-Ua Neill don turus-sin co cosgurach & araile.

U1435.6

Neachtain h-Ua Domnaill do thabairt caisdeil Atha Senaigh do Brian Og h-Ua Neill air comaentaidh cogaidh a n-aghaidh h-Ui Neill. Brian imorro do fhell ar Nechtain & dul do cum h-Ui Neill doridhisi & bardai do fhagbail h-i c-caislen Atha Senaigh.

U1435.7

h-Ua Neill do ghabail Briain Oig h-Ui Neill in bliadhain-si & cos & lamh do buain de & dias mac do Brian (.i. Aedh[...]) do cirrbadh leis fos & araile.

U1435.8

h-Oiberd, mac Uilliam h-Ui Ferghail, do marbadh in bliadhain-si: .i. sai chinn-fheadhna, le Mailir, mac h-Oiriberd & araile.

U1435.9

Mag Raith Termainn Dabeoig do eg in bliadhain-si: .i. Seaan Mor Mag Raith, .i. fer tighi aidhedh co coitchinn

p.140

& araile.

U1435.10

Toirrdelbach Mac Domnaill, sai galloglach, {fol. A 88b} mortuus est.

U1435.11

h-Ua Ferghail do eg in bliadhain-si, .i. Domnall h-Ua Ferghail, .i. taisech na h-Anghaile.

U1435.12

h-Ua Domnaill do breith do Ghallaibh leo a Saxanaibh in bliadhain-si: .i. Níall, mac Toirrdelbaigh h-Ui Domnaill.