Corpus of Electronic Texts Edition
Annals of Ulster otherwise Annala Senait, Annals of Senat (Author: [unknown])

Year U1434

U1434.0

Kal. Ian. ui. f., l. x.uiii., Anno Domini M. cccc. xxx. iiii.

U1434.1

h-Ua Brain Laighen do eg in bliadhain-si.

U1434.2

Mac Cruitin d'h-eg in bliadhain-si: .i. Sencha Mac Cruitin, .i. ollamh h-Ui Briain re senchus.

U1434.3

h-Ua Neill do dhul, sluagh mor, in bliadhain-si do milliudh Gall na Midhe, .i. sechtmain re feil Michil & h-Ua Domnaill guna sluagh faris h-Ua Neill don toisc-sin & sluagh an Coicidh {fol. B 84c} uile coleir faris. Gaill an t-Sradbaile do thoighecht a coinne h-Ui Neill & a cis do thabairt do & moran aile do comthachaibh d'fhaghbail do don turus-sin. Sliabh Breagh do loscadh leo & Machaire Oirgiall uile. & do-chuaidh iarum clann h-Ui Neill do loscadh

p.132

na h-Oibri, .i. Enri & Aedh. in tan iarum ro badur oc a loscadh, beris fer-inait ín righ forro & ro ghabh ag toraidhecht forra. Anais Enri & Aedh ar deredh a muinntire & rucadur leo iad co sona, senamail an la-sin. Ro-cuaidh iarum h-Ua Domnaill & a mac, .i. Toirrdelbhach, .i. adhbur righ Tire Conaill & Mac Cathmhail d'iarraidh edala in la cetna. Marcshluagh Gall do thegmhail doibh & cumusc do thabairt da cheile doibh & h-Ua Domnaill do ghabail le Gallaibh in la-sin & Mac Cathmhail & Toirrdelbach h-Ua Domnaill do marbadh doibh & Aedh, mac in Espuic Mic Cathmhail. h-Ua Neill do inntogh an la arna mharach dia thigh & araile.

U1434.4

Cathal Bodhar h-Ua Ruairc mortuus est.

U1434.5

h-Ua Ruairc d'h-eg in bliadhain-si: .i. Tadhg, mac Tigernain Moir h-Ui Ruairc, .i. fer einigh & egnuma.

U1434.6

Sicc mor do tinnsgnadh a n-deredh na bliadhna-sa (bliadhain na seici moire): .i. coic sechtmuine ria Nodlaig & a beith co cenn secht sechtmuine ina diaigh. & no imthighdis tainti bo & eich ímdha & daine & capaill primhlochanna Erenn. {fol. A 87d} & tucadh ar mor for enlaith Erenn forsan sic sin & araile.

U1434.7

Donn Cathanach Mag Uidhir d'h-eg 8 Kalendas Marcii.

U1434.8

Maighister Deinis Mac Gilla Choisgle obiit 5 Idus Maii.

U1434.9

Lucas h-Ua Leannain, prioir Leasa Gabail, mortuus est 15 Kalendas Nouembris.

U1434.10

(Matha O Congaile, oircinneach Rosa Oircis, saoidh mic leighinn d'h-eg.)

p.134