Corpus of Electronic Texts Edition
Annals of Ulster otherwise Annala Senait, Annals of Senat (Author: [unknown])

Year U1433

U1433.0

Kal. Ian. u. f., l. uii. Anno Domini M. cccc. xxx. iii.

U1433.1

Cocadh mor d'eirghi eter Mag Raghnaill ín Magha in bliadhain-si, .i. Concobur & clainn Mailechlainn Meg Raghnaill. Clann Mailechlainn do thabairt clainni Mathgamna Mic Caba chuca ar buanacht & a n-dola ar indsoighidh 'sa Magh & baile Cathail Meg Raghnaill do loscadh leo. Toír mhor do breith orra ag a fhagbail. Clann Mathgamna & a n-gallóglaich d'anmuin ar deredh na fedhna. Toír mor do breith orra gan fis da fedhain. Triur do clainn Mathgamna do marbadh an la-sin & fer do ghabail & sé lethmharbh, .i. Eogan, a sinnser. Rossa & Donnchadh & Brian do marbadh—.i. sechtmain re feil Cros sin — co sochaidhibh da muinntir maille ríu. Clann sin arna n-gabail a m-bel a n-Erinn ar a febhus do clainn athar & mathar—.i. Una, ingen t-Sheaain h-Ui Raighilligh, a mathair—& ar febhus a neirt & a n-eínigh & a n-egnuma & a n-ínill gusan la-sin. An coicedh mac do thoighecht slan an la-sin


p.126

dibh, .i. Toirrdelbach Ballach & araile.

U1433.2

Cocadh mor eter h-Ua Neill & h-Ua n-Domnaill, .i. Níall Garb, mac Toirrdelbaigh. h-Ua Neill & Eogan do dhol, {fol. A 87b} sluagh mór, a lenmuin h-Ui Domnaill & Mic Uibilin 'sa Duibh Trian. Mac Domnaill na h-Alban do thoighecht, coblach mor, a n-Erinn a comdail h-Ui Neill do cumnum leis. h-Ua Domnaill & Mac Uibilin & Roiberd Sabhais do lenmuin doibh 'sa Duib Trian & an caeraidhecht do buain dib uile & a marbadh leisna h-Albanchaibh. Ar dermair & dith daine do thabairt leo ar Mac Uibilin, gu nach terna acht a beg leis dia muinntir asan Duib Trian: an meid terna, ro thoitset ag fersait an Caisdeil Núa. h-Ua Neill & Enri, .i. mac h-Ui Neill & Mac Domnaill na h-Alban cona sluaghaibh do dhula co h-Aird Glais & a loscadh leó don turus-sin. Mac Domnaill & a sluagh do dul ína longaibh o Aird Glais co h-Inis Eoghain & h-Ua Neill do thir ina airrchis, do innradh Thire Conaill . Nechtain h-Ua {fol. B 84b}Domnaill & ingen h-Ui Conchobuir Failghi, .i. ben h-Ui Domnaill & meic righ Conallaigh olceana do toighecht ina comdhail co h-Inís Eoghain & sith do denum atorra gan ched do h-Ua Domnaill. h-Ua Domnaill & Mac Uibhilin do dhul ar Galltacht na Midhe & rann do dhenum ríu a n-aghaidh h-Ui Neill. & fer-ínaid in righ do tabairth shluaigh moir leo co Machaire Arda Macha & a n-dola fa Mainistir na m-Brathar m-Bocht a n-Ard Macha. Ro inntódur dia tighibh don turus-sin gan nert do ghabail. Mac Uibhilin do choinnmedh le Gallaibh Machaire Oirgiall iar na innarbadh d'Ua Neill. h-Ua Domnaill do dhola timcell


p.128

na Midhe siar co h-Ath Luain & a dol assin a n-Ibh Maine. Sibhal oidhche do dhenum dó tarrsna ín Machaire a cenn Mic Diarmata Muighi Luirg & assin a cenn h-Ui Ruairc h-Ua Ruairc da innlacudh tar Eirne anunn. h-Ua Neill & Mag Uidhir do dol ar Cael Uisci a coinne h-Ui Domnaill & sith do denum leis.

U1433.3

Da ghairm coitcenna do thabairt do Mhairgreig, ingen h-Ui Cerbaill, an bliadhain-si — .i. ben an Calbaigh h-Ui Concobuir, .i. rí h-Ua Failghi — do damaibh Erenn & do chliaraibh & araile.

U1433.4

Mac Maghnusa Meg Uidhir, .i. Cathal Mor Mac Maghnusa (mac an Ghille Buidhe), do eg an bliadhain-si, .i. la fheili Michil do shonnradh: .i. fer tighi aidhedh coitcinn do dhamaibh & do dheoradhaibh & do chliaraibh Erenn & Alban, gur' lin clu an Chathail-sin Eire & Alba. & a mac do thoghadh ina inadh, .i.


p.130

Cathal Og, do h-Ua Neill & do Mhag Uidhir & araile.

U1433.5

Eigneacan {fol. A 87c} h-Ua Domnaill do dol ar creich ar a derbrathair fein, .i. ar Donnchadh h-Ua n-Domhnaill. Donnchadh do dul a toraidhecht na creiche & Eignechan do marbadh don turus-sin & araile.

U1433.6

Samhradh gortach do techt an bliadhain-si, .i. Samradh na Meraithne do goirthi dhe; uair ni aithned neach caem, no cara, ann la med na gorta.

U1433.7

Aedh h-Ua Corcrain, .i. sai cruitire, do eg in bliadhain-si.

U1433.8

Mac h-Ui Concobuir Ruaidh .i. Cathal Dubh, do eg in bliadhain-si: .i. adhbur righ Connacht ar crodhacht & ar uaisle fhola & araile.

U1433.9

Gilla Crist h-Ua Droma, .i. sgolog maith do bi i n-onoir mhoir ag Cathal mor Mac Maghnusa, obiit 5 Kalendas (alias, Nonas) Maii.