Corpus of Electronic Texts Edition
Annals of Ulster otherwise Annala Senait, Annals of Senat (Author: [unknown])

Year U1432

U1432.0

Kal. Ian. iii. f., l. xxui., Anno Domini M. cccc. xxx. ii.

U1432.1

h-Ua Neill do marbadh in bliadhain-si la h-Oirecht h-Ui Cathain, .i. iter da Nodlaic do shonnradh: .i. Domnall, mac Enri h-Ui Neill, .i. a dul cuca ina tir fein; Domnall h-Ua Cathain & Aibne h-Ua Cathain, .i. da mac Diarmata h-Ui Chathain, do gabail tighi for h-Ua Neill & {fol. B 83d} a marbadh ann don turus-sin & sochaidhe dia muinntir. Eogan, mac Neill Oig h-Ui Neill, do rigadh 'sa Coicidh co comaentadhach. & a dola co Tulach Og & a rigadh ar leic na righ ann do dheoin De & daine, aespoc & olloman.

U1432.2

Crecha mora, meinci & ár daine le Maghnus Mag Mhathgamna ar Gallaibh in bliadhain-si & no beredh leis cinn Danur & escarad gusan Lurgain, .i. co longport Maghnusa. & do berthi na cinn-sin for garrdha in bhaile, indus gur' adhuathmur le damaibh & le deoradhaibh Erenn beith ag fegain garrdha baile Magnusa, ar a mhed do bhidh do chennaibh a namad & a escarad fair.

U1432.3

Coinne do ghabail do {fol. A 86d} h-Ua Neill, .i. do Eogan,


p.120

ar Chael Uiscii re clainn Domnaill, mic Muircertaigh h-Ui Conchobuir. h-Ua Domnaill do chur a muinntire do choimed an Chail, ar egla na coinne do rochtain a cheile. h-Ua Neill & Mag Uidhir, do dol ar in Cael. Muindter h-Ui Domnaill do thegmail doibh & soighdeoracht do beith atorra. Fir Manach do dul a tir forro: ruaig Mibuilg do buain astu & daine imda do lot & do marbadh dibh. Clann Domnaill do thoigecht an la-sin mur aroibhe h-Ua Neill & a lama do thabairt ína laim & araile.

U1432.4

Domnall h-Ua Neill, .i. mac d'Eogan, mic mac Neill Oig h-Ui Neill, do eg don fhilun i cinn caicidhisi iar feil Patraig in bliadhain-si: .i. adbur righ Uladh ar einech & ar eghnum é.

U1432.5

Eogan, mac Meg Carrthaigh Riabaigh, do dhul ar creich ar Cinn Saile. Eogan do marbadh do lucht Cinn t-Shaile d'en urchar dho ga & araile.

U1432.6

Cogadh mor in bliadhain-si eter h-Ua Neill & h-Ua n-Domnaill. Mac h-Ui Neill, .i. Enri, do dhul co Sligech ar cenn clainni Domnaill, mic Muircertaigh h-Ui Concobuir. h-Ua Domnaill & h-Ua Ruairc & clann Aedha Mheg Uidhir do beith a foraire rompo re h-edh na coic sechtmain do bi Enri th-shiar. Enrí & Cairbrigh do toighecht for Magh n-Eíne. Mag Uidhir, .i. Tomas Og, do dola, coblach, for Cael Uisgi a coinne Enri & Chairbrech & a toighecht slan dia tig don turus-sin.

U1432.7

Sluaghadh mor do denamh d'Ua Neill & da do Mag Uidhir & do Mac h-Ui Neill Buidhe i Ceinel Moghain for bru h-Ui Domnaill. Echta imda & loiscti mora do denum leo for Thir Conaill & baile h-Ui Domnaill & baile Nechtaín do loscadh leo & guirt ímdha do


p.122

mhilliudh leo. & do badur o fheil Cros co Lughnusadh for an toisg-sin & a toighecht dia tigh gan sith do dhenum & araile.

U1432.8

Mag Mathgamna, .i. Brian, mac Ardghail, do dhul a n-aghaidh h-Ui Neill & a n-aghaidh a braithrech fein, .i. Rughraidhe & Maghnus. Mag Mhathgamna do dhul guna caeraidhecht ar Galltacht. Sluagh Gall do tinol & a toighecht le Mag Mathgamna a n-Oirgialla. & Dartraighi Coinn Innsi do losgadh leo & a n-dol don turus-sin co Machaire Arda Macha & imenna Arda Macha do buain asna templaibh doibh & a loscadh ar faighthi in baile. Comadha mora do buain do sruithibh an baile doib do cinn gan a da loscadh. Gaill & Mag Mathgamna do dhul dia tighibh don turus-sin.

U1432.9

Espuc Clochair do eg in bliadhain-si, .i. Art Mac Cathmail, .i. la Sant Labras do shonnradh: .i. fer einigh & crabadh & tighi aidhedh do bochtaibh & do damaibh & do dheoradhaibh. & a dhola fa buaidh o domhain & o demhon & araile.

U1432.10

{fol. A 87a}Mailechlainn Mainech Mac Con Mara, .i. taisech Clainni Cuilein, mortuus est.

U1432.11

Tadhg Mac Mathgamna, .i. adbar righ Corco Baiscind, mortuus est.

U1432.12

Maol Mordha Óg h-Ua Raighilligh mortuus est.

U1432.13

Sluagh Gall do thoighecht a n-Eilibh h-Ui Cherbaill & caislen Baile an Britaigh & cais{fol. B 84a}del Cluain h-Ui Cínaith do loscadh & do brisedh leo don turus-sin & araile

U1432.14

Ingnadh mor do fhaghhail a Feraibh Manach in bliadhain-si: .i. gobur do breith uain ghil & an cetna a n-uraidh.

U1432.15

Grighair, mac Seaain h-Ui Mail Conaire, .i. adbur suadh re senchus, d'h-eg in bliadhain-si a tigh Mic Aedhagain


p.124

Urmumhan, & se for sgolaidhecht.

U1432.16

Uater A Búrc, .i. mac mic Iarla Uladh, do eg ín bliadhain-si: .i. Gallmacamh dob' ferr eínech & eghnum & aithne ar gach uile cerd da roibe ina aimsir.

U1432.17

Toirrdelbach, mac Seaain h-Ui Raighilligh, mortuus est.

U1432.18

Cathal, mac Tomais h-Ui Ferghail, mortuus est.

U1432.19

h-Ua Duibgennain Cilli Ronain, sai ollaman a senchus, mortuus est.: .i. Matha Glas, mac Ferghail Muimnigh.

U1432.20

Cíthruadh Mac Rithbertaigh do marbadh in bliadhain-si, 12 Kalendas Augusti.

U1432.21

Gormlaith, ingen h-Ui Seghannain, mortua est.