Kal. Ian. ii. f., l. xu., Anno Domini M. cccc. xxx. i.
Mac mic Iarla Cille Dara do crochadh & do tharraing la Gallaibh Atha Cliath in bliadhain-si.
Barrdubh, ingen h-Ui Ruairc (.i. ben h-Ui Raighilligh, .i. Eogain), .i. ben eínígh & crabaidh, do eg iar m-buaidh aithrighe.
Mag Raghnaill do eg in bliadhain cetna: .i. Seffraigh, fer einigh & egnuma.
Aine, ingen h-Ui Ru{fol. A 86b}airc, .i. ben h-Ui Fergail, mortua est.
Seaan, mac Con Connacht, mic Pilib Meg Uidhir, do marbadh le Tellach n-Eathach: idon, fer eínígh & egnuma & crabaidh & tighi
Crecha mora & ár daine le Maghnus Mag Mhathgamna ar Ghallaibh in bliadhain-si.
h-Ua Concobuir Corcu Mruadh, .i. Muircertach, do marbadh do clainn a derbrathar fein.
Conn h-Ua Mailechlainn, .i. adbur righ Midhe, do marbadh le h-Anghailechaibh & le Gallaibh Iarthair Midhe in bliadhain-si.
Geralt Caemanach, .i. fer eínígh & eghnuma & adbur righ Laighen gan fhrasabra, d'h-eg.
Uáter Mac Fheorais do eg in bliadhain-si.
Sluagh mor le h-Eogan h-Ua Neill & le h-Oirgiallaibh & le Mag Uidhir & le h-Ua Raighilligh cum Mic Uibhilin dia indradh. Crich Mic Uibhilin do creachad & do loscadh leo. Eogan & a sluagh do beith co cenn caicidhisi ar mís annsa Rúta & a chaeraidhecht faris, ag milliudh a n-arbhann & ag loscadh a m-bailtedh. Eogan do thoighecht dia tigh don turus-sin & araile.
{fol. B 83c}Enrí, mac Eogain h-Ui Neill, do ghabail le Nechtain h-Ua n-Domnaill. Coinne do gabail d'Eogan h-Ua Neill & do Nechtain fria ceile & sith do dhenum doibh
Plaidh do thoidhecht a Feraibh Manach in bliadhain-si. & Aughustin h-Ua Carmaic d'h-eg di: .i. ollamh sairsi Fer Manach uile & fer tighi aidhedh co coitchenn. Mathgamain h-Ua Carmaíc do eg don plaidh cetna.
Marcshluagh Gall do thoidhecht d'iaraidh creichi a Clainn in Caich h-Ui Raighilligh. Maghnus Mag Mhathgamna, .i. mac Ardghail, do dhul in la cetna d'iaraidh creichi ar Ghallaibh & fis an mharcshluaigh Ghall d'fhaghail do. Maghnus da lenmhuin asa lorg & a faghbail ar sgur do, oc foraire {fol. A 86c} forsan creich. Magnus do dhul futha co sona, senamail & a maithi do ghabail do & an chuid aile do marbadh dib. & Magnus do thoidhecht dia thigh don turus-sin fa buaidh cosgair & araile.
Nechtain h-Ua Domnaill do dhul co caistel Locha Laeghuiri ar indsoigidh & a ghabail ar Thoírrdelbach h-Ua n-Domnaill & a fuair ann do mainibh do breith leis dia tigh & araile.
Sluaghadh do dhenum do Mac Uilliam Clainni Ricaird, .i. Uileag, co comaentaidh moir leis, a Conmaicni Chuile. & anbhain innti caicidhis, og loscadh a n-arbann & a m-bailtedh & a thoighecht dia thigh don turus-sin & araile.
Tadhg h-Ua h-Eogain, .i. Oifidhsel Locha h-Erni, .i. fer lan d'egna & do leighinn, d'h-eg in bliadhain-si.
Eogan h-Ua Fialain, saí fhir dana, d'eg in bliadhain cetna.
Gillibert h-Ua Duibhgennain d'h-eg in bliadhain-si.
Domnall, mac Daibith h-Ui Tuathail, .i. feichemh coitcenn do damaibh & do cliaraibh Erenn co la a eca, mortuus est.
Domnall Mac Gilla Patraig, .i. mac righ Osraighi, mortuus est.
Domnall Riabach, mac Briain, Mac Maghnusa obiit 8 Idus Ianuarii.
Mag
Simon Mag Archain, cananach & grainseoir do Muinntir Lesa Gabail, d'h-eg 9 Kalendas Marcii.