Corpus of Electronic Texts Edition
Annals of Ulster otherwise Annala Senait, Annals of Senat (Author: [unknown])

Year U1425

U1425.0

Kal. Ian. ii. f.,l. ix., Anno Domini M. cccc. xx. u.

U1425.1

An Mortimer do thecht a n-Erinn an bliadhain-si: .i. Iarla o Mairsi & moran do Shaxanachaibh do thecht leis. & is ag an Iarla-sin do bí coimed righ Saxan & urmhoir na Fraíncci & na n-Gall Erennach uile. Uair is 'n-a leanm ro fagadh ri Saxan & is ag Iarla o Mairsi do bí a cosnum & a coiméd. Tangadur dino moran do maithibh Erenn co tech in Iarla-sin & tangadur uadha fa aenta & fa onoir mhoir. Do-cuadur imorro maithi in Coicidh Ulltaigh co tech in Iarla-sin: .i. h-Ua Neill & Eogan h-Ua Neill & Nechtain h-Ua Domnaill & Mac h-Ui Neill Buidhe, .i. Brian Ballach. & do-cuaidh Mac Uibhilín ann ar leth leis fein. Ar n-denum a n-uírighill risin Iarla, do eg in t-Iarla don plaidh ni is luaithi ina thangadur san asa Mídhe. Goill na Mídhe

p.98

& Saxanaigh do lenmuin na n-Gaidhel-sin & n-gabail uile & daine maithi eile da n-oirechtaibh araen ríu. h-Ua Neill & Mac h-Ui Neill Buidhe & Mac Uibilin do dhul fa breith Gall & a légan amach. Innlach imdha & aimlesa mora do breith ar Eogan & ar mac h-Ui Domnaill & a congbail a laim trid-sin. & dob' adbur cogaidh moir a Coicedh Uladh uile na gabhala-sin.

U1425.2

Ruaidhri Ruadh h-Ua h-Uiginn d'h-eg in bliadhain-si: .i. sai fhir dána.

U1425.3

{fol. B 82b}Tadhg h-Ua Fallamain, .i. taisech Clainni h-Uadach, do marbadh a fell 'na caislen fein le mac derbrathar a athar fein.

U1425.4

Gormlaith, ingen Domnaill h-Ui Conchobuir, .i. ben Tighernain h-Ui Ruairc, .i. in ben dob' ferr delb & aithne da fine fein, d'h-eg do bhas aithrighi in bliadhain-si.

U1425.5

Doinenn mor 'sa bliadhain-si & a beith ann o Samain co Belltaine, co taraing ár mor ar buaibh & dith trebtha ar Erinn uile & dith daine.

U1425.6

Muiredach Sdibhard, .i. prinnsa na h-Alban, do mhilliudh & a mac, .i. Ualtar & a mac eile & Mormaer Leamna do milliudh a fell lé righ Alban. & Semus Sdibhard d'ínnarbadh a n-Erinn.

U1425.7

Brian (.i. Brian Ballach) Mac h-Ui NeillBuidhe, .i. in t-en mac righ dob' ferr einech & aithne ar {fol. A 85b} gach uile ealadhain da cluinedh, a marbadh in bliadhain-si a feall a Carraig Fhergusa le bathlachaibh anuaislib na Cairgi fein. & Seaan, mac Enri h-Ui Neill, do marbadh ar in lathair cetna a fochair Mic h-Ui Neill (no, gumadh ar an m-bliadhain-so t-shuas budh choir Brian Ballach do beith.).

p.100

U1425.8

Matha h-Ua Leannain, .i. cananach do bhi o Lis Gabail i Ros Oirrthir, obiit 3 Kalendas Maii.

U1425.9

Eogan h-Ua Diarmata, saer cananach Lesa Gabail, obiit Idibus Ianuarii.