Kal. Ian. u. f., l. u., Anno Domini M. cccc. xx. ii.
Eogan, mac Neill Oigh Ui Neill, do fhuaslucudh da clainn fein & da mhnai o Mac h-Ui Neill Buidhe an bliadhain-si.
h-Ua Conchobuir Corcu Mruadh, .i. Rughraidhe h-Ua Concobuir, do marbadh da braithribh fein, .i. do clainn Feidhlimthe h-Ui Concobuir, a n-dorus Caislein na Damcha, .i. a m-baile h-Ui Concobuir fein.
An Cosnaighi Og Mac Aedhagain, .i. ollam h-Ui Concobuir Failghi re breithemnus, do marbhadh d'en urchur soighdi le clainn h-Ui Mailechlainn.
Sluagh mor le h-Eogan, mac Neill Oig h-Ui Neill & leis h-Ua n-Domnaill & le Mac h-Ui Neill Buidhe & re maithibh an Coicidh o sin amach a Connachtaibh. & Cairpri do loscadh leo don turus-sin. Ruaidhrigh mor do thabairt d'Eogan, mac Concobuir, doibh a Sligech & do Thoirrdelbach {fol. A 84d} Carrach h-Ua Concobuir & do h-Ua {fol. B 81d} Ruairc. Seisur do marbadh doibh don t-shluagh don ruaig-sin. An sluagh do dul assin a Tir Oilella & millti mora do dhenum doibh innti. & a m-beith aidhchi a caiseal Locha Dergain & a techt iar sin tridh an m-Breifne do ched h-Ui Ruairc dia tighibh.
Mac Maghnusa Meg Uidhir, .i. Concobur, mac Gilla Padraig, mic Matha, mic Gilla Padraig, mic Maghnusa, .i. fer saidhber, daenachtach, a eg in bliadhain-si 7 Idus Iuilii.
(Iohannes de Platea, famosissimus legis Doctor, obiit hoc anno decimo tertio die mensis Maii et sepultus est in ecclesia Sancti Dominici in Bononia.)