{fol. A 84c}Kal. Ian. iiii. f., l. xx.iiii., Anno Domini M. cccc. xx. i.
Tomas Og h-Ua Raighilligh d'h-eg.
Murchadh h-Ua Concobuir, .i. ri h-Ua Failghi, d'eg in bliadhain-si.
Ruaidhri, mac Aedha Mic Diarmata, .i. rí Muighi Luirg, .i. an rí nar' diult re daim, na re deoraidh & nar' eithigh nech um ní riam, a eg ina longport fein iar m-buaidh aithrighi.
Nicol Mag Bradaigh, .i. espuc na Breifne, d'h-eg: .i. sai a crabadh & a n-einech.
Cocadh mor d'eirghi an bliadhain-si eter h-Ua Ruairc & Mac Donnchaidh. h-Ua Ruairc do tinol sluaigh moir a n-ein inadh, .i. Connallaigh o Eas Ruaidh co Daire & Aedh, mac Pilib Meg Uidhir, cona tinol & Breifnígh fein. & a n-dul a Tir Oilella don turus-sin & moran don tír do loscadh leo & Cathal, mac Mic Donnchaidh, do marbadh doibh & a toighecht dia tighibh fa buaidh coscair.
Eogan, mac Ruaidhri h-Ui Conchobuir, .i. mac righ Connacht, d'eg in bliadhain-si i caislen Rosa Comain.
Mor, ingen Briain h-Ui Briain, .i. ingen {fol. B 81c} righ Tuadhmuman, ben Baiter A Burc & do bi 'na mnai ag Tadhg h-Ua Cerbhaill, .i. an eín ben dob' ferr aithne & einech, ciall & crabadh do bi a n-Erinn ína h-aimsir fein, a h-eg an bliadhain-si fo buaidh ongtha & aithrighe & araile.
Cormac na Coille Mag Carrthaigh do marbadh le clainn Eogain Meg Carrthaigh: .i. an t-en mac righ dob' ferr einech & eghnum do bi do Mumneachaibh 'n-a aímsir fein.
Gilla Patraig h-Ua h-Eogain, prioir Leasa Gabhail, mac in oirchinnigh d'ar' bo comainm Nicol Finn, mac Conchobhuir, .i. mac in Aircideochain, obiit§.