Corpus of Electronic Texts Edition

Annals of Ulster otherwise Annala Senait, Annals of Senat (Author: [unknown])

Year U1421

U1421.0

{fol. A 84c}Kal. Ian. iiii. f., l. xx.iiii., Anno Domini M. cccc. xx. i.

U1421.1

Tomas Og h-Ua Raighilligh d'h-eg.

U1421.2

Murchadh h-Ua Concobuir, .i. ri h-Ua Failghi, d'eg in bliadhain-si.

U1421.3

Ruaidhri, mac Aedha Mic Diarmata, .i. rí Muighi Luirg, .i. an rí nar' diult re daim, na re deoraidh & nar' eithigh nech um ní riam, a eg ina longport fein iar m-buaidh aithrighi.

U1421.4

Nicol Mag Bradaigh, .i. espuc na Breifne, d'h-eg: .i. sai a crabadh & a n-einech.

U1421.5

Cocadh mor d'eirghi an bliadhain-si eter h-Ua Ruairc & Mac Donnchaidh. h-Ua Ruairc do tinol sluaigh moir a n-ein inadh, .i. Connallaigh o Eas Ruaidh co Daire & Aedh, mac Pilib Meg Uidhir, cona tinol & Breifnígh fein. & a n-dul a Tir Oilella don turus-sin & moran don tír do loscadh leo & Cathal, mac Mic Donnchaidh, do marbadh doibh & a toighecht dia tighibh fa buaidh coscair.

U1421.6

Eogan, mac Ruaidhri h-Ui Conchobuir, .i. mac righ Connacht, d'eg in bliadhain-si i caislen Rosa Comain.

U1421.7

Mor, ingen Briain h-Ui Briain, .i. ingen {fol. B 81c} righ Tuadhmuman, ben Baiter A Burc & do bi 'na mnai ag Tadhg h-Ua Cerbhaill, .i. an eín ben dob' ferr aithne & einech, ciall & crabadh do bi a n-Erinn ína h-aimsir fein, a h-eg an bliadhain-si fo buaidh ongtha & aithrighe & araile.

p.90

U1421.8

Cormac na Coille Mag Carrthaigh do marbadh le clainn Eogain Meg Carrthaigh: .i. an t-en mac righ dob' ferr einech & eghnum do bi do Mumneachaibh 'n-a aímsir fein.

U1421.9

Meic mic Airt Meg Uidhir do marbadh in bliadhain-si le h-Aedh Og Mag Uidhir a n-Inis Cain Locha h-Eirne: .i. Eogan Cam & Tadhg Riabhach & Ruaidhri Buidhe, maille re moirseisiur laech dia muinntir, an la roimh feil Brenainn.

U1421.10

(Maidm Machaire O n-Daman in bliadhain-si a Faghmur na cno n-imda ria n-Aedh Meig Uidhir ar clainn Tomais Moir Meig Uidhir, .i. Tomas Occ & Filib, du inar' marbadh Domnall Carrach, mac Aedha, a frithguin le Tomas Og.)

U1421.11

Gilla Patraig h-Ua h-Eogain, prioir Leasa Gabhail, mac in oirchinnigh d'ar' bo comainm Nicol Finn, mac Conchobhuir, .i. mac in Aircideochain, obiit§.