{fol. A 83d} Kal. Ian. i. f., l. ii. Anno Domini M. cccc.x. ix.
Cocadh mor eter h-Ua Neill, .i. Domnall, mac Enri h-Ui Neill, in bliadhain-si & Eogan, mac Neill Oig h-Ui Neill, .i. adhbur aird-righ Uladh. h-Ua Neill d'innarbadh ar ín cocadh-sin le h-Eogan & le Toirrdelbach h-Ua n-Domnaill, .i. rí Tire Conaill & le Brian Mhag Mhathgamna, .i. ri Oirghiall & le Tomas Mag Uidhir, .i. ri Fer Manach. Sluagh mór le Brian, mac Domnaill h-Ui Conchobuir cona caeraidhecht & Murbach do loscadh leis, .i. longport h-Ui Domnaill & Tir Aedha uile do milliudh leis don turus-sin.
Tómas Bacach mac mic Iarla Urmuman, do dhul do congnum le righ Saxan in bliadhain-si & moran d'uaislibh Erenn do dhul leis 'sa Fraíngc ar an cocadh-sin.
An Calbach h-Ua Conchobuir, .i. ri h-Ua Failghi, do ghabail a fell la mac Libined A Freimne & a reic dó re fer-ínaid righ Saxan, .i. Loard Furnumal. & in trath do gabadh é, in duine do bi a n-glas an Calbaigh d'elogh leis dia thigh fein.
Feircert h-Ua h-Uigind d'h-eg: .i. sai fhir dána & fer tighi n-aidhedh co coitcinn d'feraibh Erenn.
Mac Murchadha, .i. rí Laighen, .i. Donnchadh Caemanach, do ghabail do Ghallaibh in bliadhain-si & a breith a Saxanaibh dhoibh.
Muircertach, mac Briain h-Ui Fhlaithbertaigh, d'h-eg in bliadhain-si .i. feichemh coitcenn do chliaraibh & do dhamaibh Erenn, .i. ri Iarthair Connacht fa buaidh o doman.
Seaan, mac Cathail Meg Uidhir, do marbadh in bliadhain-si, decimo quarto Kalendas Iuini.
Aedh h-Ua Flannagain, prioir
Sluagh mor leis h-Ua Cellaigh Maine in bliadhain-si & le h-Uilliam h-Ua Ceallaigh & le Mac Uilliam Búrc & le Cathal n-Dubh h-Ua Conchobuir & le Mac Diarmada Muighi Luirg, .i. Tomaltach. & a ceitherna galloglach do breith leo, .i. Mac Dubgaill & Toirrdelbach Mac Domnaill & a n-dula don turus-sin a Clainn Ricaird da milliudh & d'innarbadh Mic Uilliam a Clainn Ricaird amach. Sluagh mor eile do beith ag Mac Uilliam Clainni Ricaird ar a cinn, .i. Tadhg, mac Briain & a braithrecha & maithi Tuadhmuman uile & Domnall Mac Suibne. Tarrla imorro in da shluag-sin ar a ceile a m-bel Atha Lighean a n-Uachtar Clainni Ricaird & tucadur troid da ceile {fol. B 80d} annsin. & do marbadh Mac Dubgaill annsin & a dhis mac & a galloglaich uile. Toirrdelhach Mac Domnaill & a mac do dhul asan troid-sin slan & a muinnter do marbadh ann uile. & do gabadh h-Ua Ceallaigh, .i. Donnchadh h-Ua Ceallaigh & Uilliam Garbh, mac Daibith, tigherna {fol. A 84a} Clainni Connmaigh. & Uilliam h-Ua Ceallaigh do dhul 'n-a aenur asan maidm-sin & moran do maithibh h-Ua Maine do marbadh & do gabail 'sa n-ár. & ni fetur cinnedh na comairim ar med an mhadma-sin, na ar med edala Clainni Ricaird & na Muimnech, d'echaibh & d'eidedh & do braighdibh maithibh & araile.
Aedh Buidhe, mac Tigernain h-Ui Ruairc, d'h-eg in bliadhain-si a tus a ratha 'na longport fein. Tadhg, mac Tigernain h-Ui Ruairc, do righadh ina inad ar in m-Breifne in bliadhain
Diarmait Ruadh h-Ua Conchobuir d'h-eg.
Cathal, mac Aedha, mic Philib Meg Uidhir, d'eg in bliadhain-si (quarto Nonas Decimbris): .i. ogmacamh dob' ferr clú & einech & airemh do bhí da dhuthaidh ina aimsir fein. & a adlucadh a Lis Gabhail.
Tomas Bacach Buitiller d'h-eg in bliadhain-si: .i. mac Iarla Urmuman, ar m-breith buadha airme & oirrdercuis.
Domnall, mac Enri h-Ui Neill, .i. ri Coicidh Uladh, d'innarbadh in bliadhain-si do comairle Uladh fa Eogan h-Ua Neill & a chur ar Galltacht Uladh fa esonoir mhóir.
Finemhain, ingen h-Ui Manchain, ben genmaich, duthrachtach, d'h-eg in bliadhain-si.
Aine, ingen Henri Mic Caba, mathair clainni abbad Leasa Gabail, .i. Tomas, abb, .i. mac in Airchideochain Moir d'eg in bliadhain-si.
Anno Domini M. cccc. x. ix.; alias, Anno Domini M. cccc. xx.
Clann Airt Meg Uidhir do marbadh le h-Aedh Og Mag Uidhir in bliadhain-si a n-Inis Cain Locha h-Eirne.
Maidm Machaire h-Ua n-Damain in bliadhain-si le h-Aedh Mag Uidhir ar clainn in Ghilla Dhuib Meg Uidhir, .i. Pilib, & Tomas Og, du inar' marbadh Domnall Carrach, mac Aedha Meg Uidir, le Tomas Og Mag Uidhir (.i. a frithguin).
In Samradh te & Foghmur na cno n-imdha in bliadhain cetna & araile.