Corpus of Electronic Texts Edition

Annals of Ulster otherwise Annala Senait, Annals of Senat (Author: [unknown])

Year U1418

U1418.0

{fol. A 83b}Kal. Ian. uii. f., l. xxi., Anno Domini M. cccc. x. uiii.

U1418.1

Tigernan, mac Ualgairc h-Ui Ruairc, .i. ri Breifne, d'éc in bliadhain-si: .i. fer do cosain a dhuthaidh ar na coicrechaibh & dob' ferr einech & eghnum & derc do bi ina aimsir. & a adlucadh a Mainistir Shligigh.

U1418.2

Brian Ballach, mac Aedha, mic Fheidhlimthe h-Ui Conchobuir, .i. adhbur righ Connacht — an mac righ nar'ér duine riam im duais, no im derc — a eg ina longport fein.

U1418.3

Tadhg, mac Cathail, mic Taidhg Meg Fhlannchadha, .i. taisech Dartraighi, d'h-eg.

U1418.4

Eogan, mac Tigernain h-Ui Ruairc, .i. adbur righ Breifne, do bathadh ar Loch Finnmhuighe in bliadhain-si. Aedh Buidhe h-Ua Ruairc do ghabail righi na Breifne a n-diaigh a athar, .i. Tighernain Moir h-Ui Ruairc.

U1418.5

Crecha mora do dhenum do Ghallaibh na Mídhe ar Aedh, mac Airt Meg Aenghusa. Innsoighidh do denum do Mhag Aenghusa & do Mac h-Ui Neill Buidhe ar lorg Gall & na creach-sin. & ni h-urusa a rim, no a airim, a med do gabadh & do marbadh do Ghallaibh ar an toraidhecht-sin. &

p.76

U1418.6

Caislen na Mallacht do dhenum la h-Uilliam h-Ua Ceallaigh in bliadhain-si ar aghaidh caislein móir Rosa Comain, do chur re n-a ghabail. Sluagh mor le clainn Domnaill, mic Muircertaigh h-Ui Concobuir & le h-Ichtur Connacht uile do chur bidh a caislen mór Rosa Comain & do-cuiredur lon ann d'ainndeoin a roibe 'na n-aghaidh. & do-rinnedur faslongphurt a timcell an chaislein big & nír' fhedadur ní do don turus-sin.

U1418.7

Risderd, mac Tomais (mic Mathgamna), mic Gilla Isa Ruaidh h-Ui Raighilligh, .i. ri Breifne, do dhul a coiti ar Loch Sighleann a coinne Gall & a bathadh don turus-sin & a mac og, .i. Eogan & da maighistir da muinntir & a bean, .i. ingen Meg Raghnaill, .i. Finnguala. & tainig si as ar toradh a snama. Eogan, mac Seaain, mic Pilib h-Ui Raighilligh, do ghabail righi na Breifne a n-diaigh Risderd.

U1418.8

Eogan, mac Con Connacht Meg Thigernain, .i. adhbur taisigh Thellaigh Dunchadha, d'eg.

U1418.9

Tomas Og, mac Tomais eile Meg Uidhir (.i. in Gilla Dubh), do ghabail in bliadhain-si ar Baile h-Ui Grada le Brian Og, mac Briain, mic Enrí h-Ui Neill & le Seaan, mac Pilib {fol. B 80c} na Tuaidhe Meg Uidhir.

U1418.10

Augustin h-Ua Conghaile d'h-eg in bliadhain-si, pridie Kalendas Iunii.

p.78