Kal. Ian. iiii. f., l. xx.ix., Anno Domini M. cccc. x. ui.
Seaan Mac Goisdelbh do dhul ar creich cum Emaind in Mhachaire & e fein do marbadh d'en urchur shoighdi.
Tuathal h-Ua Maille do marbadh in bliadhain-si do clainn Dubghaill h-Ui Maille, .i. do clainn a derbrathar fein.
Cocadh mor d'eirghi eter Muinntir
Domnall, mac Tigernain Moir h-Ui Ruairc, .i. adbur righ Breifne, d'h-eg in bliadhain-si don galur breac.
Mac Fheorais do ghabail d'Emainn A Burc.
Ingen Muircertaigh, mic Cathail, mic Aedha Breifnigh, d'h-eg: .i. ben Ruaidhri Mic Diarmata.
Cocadh mor d'eirghi eter Clainn Donnchaidh Tire h-Oilella fein in bliadhain-si fa ferann & fa creachaibh moraibh do-rinnedur ar {fol. A 83b} a cheile. Mac Donnchaidh cona chlainn & Cormac Mac Donnchaidh do beith d'en taibh & Tomaltach Mac Donnchaidh & clann Mail Ruanaigh Mic Donnchaidh don taebh aili. Imruagadh do tegmail atorra & da mac Mail Ruanaigh Mic Donnchaidh do marbadh ar in imruagadh,
Maidm mor do thabairt do Mac Murchadha, .i. Art Mac Murchadha, ar Ghallaibh na Cunndae Riabcha in bliadhain-si, d'ar' marbadh & d'ar' gabadh secht fichit dibh.
Cu Meadha, mac Seaain Mec Con Mara, d'h-eg in bliadhain-si: .i. adhbur taisigh Clainni Cuilein. & cenn cogaidh & imresna na Muman h-e.
Ardghal, mac Briain Moir Mheg Mathgamna, .i. ri Oirgiall, d'h-eg in bliadhain-si & a mac do ghabail a ínait ina dhiaigh, .i. Brian.
Gormlaith, ingen Neill Moir h-Ui Neill, .i. ben Seaain h-Ui Domnaill, d'h-eg, .i. sai mhná.
Cormac Dubh Mac Branain, .i. adbur taisigh Corco Achlann, do marbadh da brathair fein a fell a n-Oil Finn.
Cu Connacht, mac Mic Raith Meg Uidhir, d'h-eg in bliadhain-si (i n-Id Ianuarii).
Aedh Bacach, mac in Aircinnich, .i. mac Nícoíl Fhinn, mic Conchobuir, .i. in Arcideochain, fer daennachta moire do Muinntir Innsi Cain Locha h-Erne, d'h-eg in bliadhain-si, octauo Kalendas Septimbris.