Corpus of Electronic Texts Edition
Annals of Ulster otherwise Annala Senait, Annals of Senat (Author: [unknown])

Year U1416

U1416.0

Kal. Ian. iiii. f., l. xx.ix., Anno Domini M. cccc. x. ui.

U1416.1

Seaan Mac Goisdelbh do dhul ar creich cum Emaind in Mhachaire & e fein do marbadh d'en urchur shoighdi.

U1416.2

Tuathal h-Ua Maille do marbadh in bliadhain-si do clainn Dubghaill h-Ui Maille, .i. do clainn a derbrathar fein.

U1416.3

Cocadh mor d'eirghi eter Muinntir

p.70

Ruairc & Fheraibh Manach fa cuis Cathail, mic Aedha h-Ui Ruairc. & tucadh ruaig do muinntir Aedha Mheg Uidhir & do Cathal h-Ua Ruairc le Tadhg h-Ua Ruairc & le Domnall h-Ua Ruairc, d'ar' marbadh Tadhg, mac Ferghail & nonmur d'Feraibh Manach. Indsoighidh aile le h-Aedh h-Ua Ruairc & le Tadhg h-Ua Ruairc & le Mac Caba a Muinntir Pheodachain. & Fir Mhanach o Loch siar do breith orra & clann h-Ui Ruairc do beith a n-eigin mhor ar Sliabh Da Chon & do fhuilngeadur an anbhuain-sin no co rangadur a n-edurnaigh. & do inntodur clann h-Ui Ruairc & Clann Caba ar in toraigh & tucadur ruaig d'Feraibh Manach d'ar' marbadh ochtar ar fichit dibh. & do marbadh da mac Mailechlainn, mic Flaithbertaigh h-Ui Ruairc, .i. Donnchadh Ruadh & Seaan. & do marbadh echta {fol. B 80a} maithi eile do Mhanchachaibh ann.

U1416.4

Domnall, mac Tigernain Moir h-Ui Ruairc, .i. adbur righ Breifne, d'h-eg in bliadhain-si don galur breac.

U1416.5

Mac Fheorais do ghabail d'Emainn A Burc.

U1416.6

Ingen Muircertaigh, mic Cathail, mic Aedha Breifnigh, d'h-eg: .i. ben Ruaidhri Mic Diarmata.

U1416.7

Cocadh mor d'eirghi eter Clainn Donnchaidh Tire h-Oilella fein in bliadhain-si fa ferann & fa creachaibh moraibh do-rinnedur ar {fol. A 83b} a cheile. Mac Donnchaidh cona chlainn & Cormac Mac Donnchaidh do beith d'en taibh & Tomaltach Mac Donnchaidh & clann Mail Ruanaigh Mic Donnchaidh don taebh aili. Imruagadh do tegmail atorra & da mac Mail Ruanaigh Mic Donnchaidh do marbadh ar in imruagadh,

p.72

.i. Muircertach & Aedh. & Cormac Og Mac Donnchaidh do marbadh in la cetna.

U1416.8

Maidm mor do thabairt do Mac Murchadha, .i. Art Mac Murchadha, ar Ghallaibh na Cunndae Riabcha in bliadhain-si, d'ar' marbadh & d'ar' gabadh secht fichit dibh.

U1416.9

Cu Meadha, mac Seaain Mec Con Mara, d'h-eg in bliadhain-si: .i. adhbur taisigh Clainni Cuilein. & cenn cogaidh & imresna na Muman h-e.

U1416.10

Ardghal, mac Briain Moir Mheg Mathgamna, .i. ri Oirgiall, d'h-eg in bliadhain-si & a mac do ghabail a ínait ina dhiaigh, .i. Brian.

U1416.11

Gormlaith, ingen Neill Moir h-Ui Neill, .i. ben Seaain h-Ui Domnaill, d'h-eg, .i. sai mhná.

U1416.12

Cormac Dubh Mac Branain, .i. adbur taisigh Corco Achlann, do marbadh da brathair fein a fell a n-Oil Finn.

U1416.13

Cu Connacht, mac Mic Raith Meg Uidhir, d'h-eg in bliadhain-si (i n-Id Ianuarii).

U1416.14

Aedh Bacach, mac in Aircinnich, .i. mac Nícoíl Fhinn, mic Conchobuir, .i. in Arcideochain, fer daennachta moire do Muinntir Innsi Cain Locha h-Erne, d'h-eg in bliadhain-si, octauo Kalendas Septimbris.