Corpus of Electronic Texts Edition
Annals of Ulster otherwise Annala Senait, Annals of Senat (Author: [unknown])

Year U1413

U1413.0

Kal. Ian. i. f., l. xx.ui., Anno Domini M. cccc. x. iii.

U1413.1

Hannri Baired do ghabail le Mac Baitin a tempoll Airigh & a breith ar eigin as & in baile do sharughadh do. & ni roibhe Mac Baitin, .i. Roibert Mac Baitin, en aidhchi nach tarfas Tigernan Oiridh do, .i. naem an baile, ag tabhach na braighed air, no co fuair a h-aiseg. & tuc Mac Baitin cethroime ferainn do Thigernan Oirigh a n-eraic a sharaighthi & araile.

U1413.2

Conchobur h-Ua Dochartaigh, .i. taisech Arda Midhair & tigherna Indsi Eoghain, d'h-eg in bliadhain-si.

U1413.3

Cathal, mac Eogain h-Ui Madagh{fol. A 82d}ain, tigherna Sil n-Anmchadha, d'h-eg.

U1413.4

Muinnter Raighillaigh & Clann Caba do dul ar innsoighidh 'sa Midhe in bliadhain-si & loiscti mora do denum doibh. & Goill do breith orra annsin & Mathgamain Mac Caba do marbadh ann & Lochlainn Mac Caba & moran da muinntir do marbadh an & Tomas Og h-Ua Raighillaigh do lot & a beith bacach osin ale.

U1413.5

Tuathal h-Ua Maille do dhul a Coicidh Uladh ar buannacht & a beith bliadhain ann & a techt ar ais, lucht secht long. Gaeth mor d'eirghi doibh & m-breith budh tuaidh laim re h-Albainn. & Donnchadh, mac Eogain Connachtaigh Mic Suibhne, {fol. B 79c}


p.66

do beith ann & Domnall Ballach, mac Suibne Ghirr. & a m-bathudh uile cona muinntir, eter mnai & fher. & da mac Thuathail cona muinntir & Tuathal fein do thecht a tir ar eigin i n-Albainn don turus-sin.

U1413.6

Be Bind, ingen Ruaidhri, mic Tomaltaigh Mic Donnchaid, .i. ben Eogain, mic Domnaill h-Ui Concobuir, d'h-eg.

U1413.7

Hoc anno natus est Carolus iuuenis, filius Caroli magni, Mac Magnussa, scilicet, A.D. 1413.