Kal. Ian. uii. f.,l. xx., Anno Domini M. cccc. uii.
Seaan, mac Taidhg h-Ui Ruairc, .i. adbhur righ Breifne, d'eg a Muigh Luirg & a thabairt as sin co Druim Leathan & a adhlucadh indti.
Maidm mor do thabairt an bliadhain-si le Gallaibh a Callaidh ar Uater A Burc, .i. mac mic Iarla Uladh & ar Thadhg h-Ua Cerbhaill: dú inar' marbadh Tadhg fein, .i. feichemh coitchenn dob' ferr do bi i n-Erinn ina aimsir fein. & do gabadh Uater isin maidm-sin.
Maidm do thabairt do h-Ua Conchobuir Ruadh & do Thadhg h-Ua Ceallaigh & do Ruaidhri Mac Diarmata ar Mac Uilliam Clainni Ricaird & ar Cathal h-Ua Conchobair. Cathal fein do ghabail ann & daine imdha do ghabail & do marbadh ann.
Aedh Mag Uidhir (.i. mac Pilib na Tuaighi), .i. tanusti Fer Manach, do ghabail a m-baile Cathail Buidhir h-Ui Ruaisc i feall & mac Maghnusa Mheg Uidhir, .i. Conchobur, do gabail faris ann & moran do dainibh maithibh ailibh. & le Conallchaibh, ar tarraing Breifneach, do-righnedh in ghabail-sin & de sin goirter Aidhighecht na Duibe o sin anuas.