Kal. Ian. iii. f., l. x.ui., Anno Domini M. cccc. iiii.
Maghnus h-Ua Cathain d'eg in bliadhain-si.
Tadhg, mac Cathail Óig h-Ui Concobuir, .i. mac righ crodha, lan d'einech & d'egnum co la a bais, do marbadh do mac in Abbaidh h-Ui Concobuir & do clainn h-Ui Concobuir Duinn.
Concobur h-Ua Ceallaigh, .i. rí h-Ua Maine, d'eg i Samhrad na bliadhna-sa.
Finnguala, ingen h-Ui
Sluaghadh do denum do h-Ua Concobuir Donn & do Muircertach, mac Domnaill h-Ui Concobuir, a n-Ibh Maine & a Sil n-Anmcadha do ghabail tighernuis h-Ui Madaghain ar eigin. h-Ua Madaghain do thecht astech cuca & a thighernus do tabairt do h-Ua Conchobuir don dul-sin. & do-cuadur as sin a Clainn Ricaird do chungnum le Mac Uilliam & do chocadh ar h-Ua Cellaigh. {fol. A 81d} Do ghabhadur tren h-Ui Cheallaigh don dul-sin & do-chuadur imshlan da tighibh.
Muircertach Bacach, mac Domnaill, mic Muircertaigh h-Ui Concobuir, d'eg in bliadhain-si a caislen Sligigh iar m-buaidh aithrighi & Brian, mac Domnaill, mic Muircertaigh h-Ui Concobuir, do ghabail a ínaid.
Domnall, mac Enri h-Ui Neill, do ghabail righi Uladh in bliadhain-si.
{fol. B 78b}Enri Mac Gille Fhinnein, taisech Muinntire Peodachain, do eg in bliadhain-si, sexto Kalendas Ianuarii.
Gilla Patraig, mac in Espuic Mic Cathmhail, .i. mac Airt Mic Cathmhail, d'eg pridie Kalendas Iulii.