Corpus of Electronic Texts Edition
Annals of Ulster otherwise Annala Senait, Annals of Senat (Author: [unknown])

Year U1402

U1402.0

Kal. Ian. i. f., l. xx.iiii., Anno Domini M. cccc. ii.

U1402.1

Coinne do denamh do h-Ua Neill, .i. do Níall Og & d'h-Ua Domnaill ar Cael Uisci & sith do denum etorra. & h-Ua Domnaill do thabhairt {fol. B 77a} umla do h-Ua Neill don dul-sin.

U1402.2

Maileachlainn, mac Uilliam h-Ui Cellaigh, .i. ri h-Ua Maine, .i. fer lan d'einech & d'aithne & d'fhirinne, a eg iar m-buaidh n-aithrighi. Sith do dhenum do Sil Cellaigh re ceile an tan sin & tighernus h-Ua Maine do thabairt do Concobur h-Ua Cellaigh.

U1402.3

Cormac Mac Branain, .i. taisech Corco Achlann, do marbadh da braithribh fein a fell.

U1402.4

Cogadh mor eter (Toirrdelbach) h-Ua n-Domnaill, ri Tiri Conaill & Brian, mac Enri h-Ui Neill. Brian do chur sluaigh i

p.48

n-ein inadh & indsoighidh do thabairt for foslongport h-Ui Domnaill & maidm do thabairt a tosach lai ar h-Ua n-Domnaill do & mac Neill, mic Neill h-Ui Domnaill, do marbadh ann & moran do Chonallchaibh & Mailechlainn, mac Flaithbertaigh h-Ui Ruairc, do marbadh ann. h-Ua Domnaill & a clainn & Muinntir Duirnin do tinol 'sa lo cetna & Brian h-Ua Neill do thegmail doib, becan fedhna, a n-diaigh a muinntiri d'inntogh on mhaidm & crech Enrí h-Ui Gairmleghaidh roime & Enri fein do marbadh roime-sin leis. Brian do beith, uathadh daine, annsin & h-Ua Domnaill, cona clainn & cona muinntir do marbadh Briain annsin & araile.

U1402.5

Mac Uilliam do dhenum d'Uilliuc A Burc in bliadhain-si & Mac Uilliam aile do denum do Baiter A Burc. & tighernus uadha do Mac Uilliam Uachtarach.

U1402.6

Carrag Locha Ce do ghabail do clainn Ferghail Mic Diarmata & daine imda do marbadh & do bathudh 'na timcell.

U1402.7

Donnchadh, mac Maghnusa Meg Uidhir, d'eg (septimo Kalendas Marcii).

U1402.8

Mac Raith, mac Maghnusa, d'eg pridie Idus Marcii.