Corpus of Electronic Texts Edition

Annals of Ulster otherwise Annala Senait, Annals of Senat (Author: [unknown])

Year U1401

U1401.0

Kal. Ian. uii. f., l. x.iii., Anno Domini M. cccc .i.

U1401.1

Aedh h-Ua Mail Muaidh d'eg in bliadhain-si, .i. ri Fer Ceall.

U1401.2

Ruaidhri, mac Airt Meg Aengusa, .i. rí h-Ua n-Eathach Uladh, do marbadh le clainn Con Uladh h-Ui Neill & le a derbrathair fein, .i. Catbharr Mag Aengusa.

U1401.3

Tadhg h-Ua Cerbaill, .i. ri Eile, do elogh o Iarla Urmuman a Belach Gabrain.

U1401.4

Sluagh mor le Niall Og h-Ua Neill, .i. le righ Uladh, a Tir Conaill, gur' mill se moran d'arbannaibh an tire. & eich & daine do buain de don turus-sin.

p.46

U1401.5

Mac Maghnusa Meg Uidhir, .i. Gilla Patraig (& da n-goirthi in Gilla Buidhe), d'eg do chuslinn do ligedh n-deredh lai: .i. sai coitcenn, ciallconaigh sin dob' fherr einech bidh & dighi do bhi ina aimsir & araile.

U1401.6

Seaan, mac Pilib, mic Gilla Isa Ruaidh h-Ui Raighillaigh, .i. ri Breifne, .i. fer {fol. A 81b} einigh & eghnuma & a uaisli fein do conngbail, a eg ina imdaigh fein a Tulaigh Mongain do bidhg & a adlacudh in aidhci cetna isin Caban. Sechtmain ar mhis ria Nodluic sin.