Corpus of Electronic Texts Edition
Annals of Ulster otherwise Annala Senait, Annals of Senat (Author: [unknown])
Year U1397
U1397.0
Kal. Ian. ii. f., l. xx.ix., Anno Domini M. ccc. xc. uii.
U1397.1
Ricard, mac Ricaird A Burc, do eg a tus Erraigh na bliadhna-sa.
U1397.2
Sluaghadh mor le Mac Donnchaidh Thire h-Oilella co Machaire Chonnacht do chungnum le h-Ua Conchobuir n-Donn & do ghabadur longport a Cuirrech Cinn Eitigh uile cona caeraidecht. Mar do cualadh h-Ua Concobuir Ruadh sin & Mac Uilliam Burc — Mac Donnchaidh cona chaeraidhecht do dhul co Cuirrech Cinn Eitigh — do cruinnighedur a n-ein inadh, .i. h-Ua Concobuir Ruadh & Mac Uilliam (Burc), .i. Tomas &
p.34
clann Cathail Oig h-Ui Conchobuir & clann Aedha Mic Diarmata {fol. B 76d} & coimtinol galloglach Connacht faru. Tucadur innsaighidh ar longport h-Ui Concobuir Duinn & ni raibe h-Ua Concobuir fein ann in tan-sin. Nir' mhothaidh imorro Mac Donnchaidh an sluaigh-sin noco tainic h-Ua Concobuir Ruadh sonn, mor marcsluagh, chuigi 'san inadh a roibhe 'na longport. Do marbadh imorro Mac Donnchaid annsin & Aedh Caech, mac Aedha, mic Toirrdelbaigh h-Ui Concobuir & Diarmait Mac Donnchaidh, .i. adhbur righ O n-Oilella & da mac Ruaidhri, mic Mail Ruanaigh Mic Donnchaidh & Art, mac Cathail Cleirigh Mic Donnchaidh & Cu Aithne, mac Con Aithne h-Ui Concobuir & Mac Suibhne, .i. Consdabla Connacht o shliabh sis & Donnchadh Mac Suibhne & Donn Sleibe Mac Suibne, .i. da derbraithair Mic Suibhne, & Concobur Mac Suibhne & echta imdha aili nach fetur a n-airim ar a linmuirecht. & ni fetur rim no airimh ar na h-edalaibh frith ann do buaibh & d'echaibh & d'eidedh. Mur do cualadh O Concobuir Donn in maidm do thabairt & Mac Donnchaidh do marbadh & a faslongport fein do dul da treoir, do-cuaidh fa chaeraidhecht h-Ui Concobuir Ruaidh & clainni mic Fheidhlimthe & ni fetur airimh na creich-sin do-righne, ar a linmuirecht. & ar troscadh na cet fheile Muire d'Fhogmur do-ronadh na gnima-sa.
Feidhlimidh, mac Cathail {fol. A 80c} h-Ui Concobuir & Dubhghall Mac Domnaill do thecht tareis in mhadma-sin co tech I Domnaill & sgela in mhadhma d'indisin do & h-Ua Domnaill
p.36
d'iaraidh leo i Cairpri. h-Ua Domnaill cona tinol do thecht le clainn Cathail Óig. Cairprigh & Oilellaigh do tinol ina n-aghaidh. h-Ua Domnaill cona shluaigh do dhul co h-ictar Tire h-Oilella & gusan Aenach. Tighi & arbanna do loscadh leo ann & mac Cormaic, mic Ruaidhri, d'argain doibh. Mael Ruanaigh Mac Donnchaidh do ghabail tighernuis Thire Oilella in tan-sin. Cor & cengal do dhenum do Mac Donnchaidh & do h-Ua Domnaill re ceile & do clainn Cathail Oig & d'h-Ua Dubhda & do h-Ua Eaghra. h-Ua Domnaill do dhul da thigh fein don turus-sin & clann Cathail do techt a Cairpri ar a cor-sin & Muinnter Duirnin & Mac Domnaill Galloglach cona clainn.
Muircertach Bacach, mac
Domnaill, do beth a Fasa Caille in tan-sin & an meid tainig do galloglachaibh Mic Shuibhne beo o mhaidm Cuirrigh {fol. B 77a}Cinneitigh faris annsin, fa Domnall Mac Suibne & fa h-Ua n-Eaghra iartharach. Indsoighidh do dhenum do Muircertach Bacach & doibh-sin uile ar clainn Cathail Óig co Lis in Doill & co Bun Brenoigi. h-Ua Domnaill do thecht, becan buidhne, a cenn clainni Cathail & troid do thabairt doibh fa Bun Brenoigi & an troid do brisedh ar clainn Chathail. & Marcus Mac Domnaill do marbadh innti & a mac, .i. Dubghall Mac Domnaill & Eoin Mac Sithig do marbadh ann fos & moran do ghalloglachaibh nach airmither
p.38
annso. Crecha mora do dhenum do clainn Domnaill,
mic Muircertaigh h-Ui Concobuir, ar clainn Cathail Oig h-Ui Concobuir & clann Cathail do cur tar Eirne anunn aris. Ar troscadh na feile Muire moire do-ronadh na gnima-sa uile.
U1397.3
Niall (Niall Mor h-Ua Neill), mac Aedha Mhoir h-Ui Neill, aird-righ Uladh & imcosnumach Erenn, do ég in bliadhain-si, iar m-buaidh onghta & aithrighe. & a mac do righadh 'na inadh, .i. Niall Og h-Ua Neill.
U1397.4
(Art (.i. Art Cuile), mac Philib na Tuaidhe Mheg Uidhir, do mharbadh d'urchur shaighde septimo Kalendas
Ianuarii, .i. la fheile Stephain, 1397 Anno Domini,
le cloinn Mheg Shamhraghain.)