[do dhul ar tarraing Aedha, mic h-Ui Domnaill, do chur Cuinn, mic h-Ui Domnaill, o chaislen Atha Senaigh & Conn do chur o'n chaislen doibh Mag Uidhir da leanmuin co Dun na n-Gall & Dun na n-Gall do loscadh a tús laei. {fol. A 110c} Conn & eirghi-amach Thire Conaill & Innsi h-Eogain & Dartroighi Meg Fhlannchadha do ímpodh a toraidhecht ar Mag Uidhir & ar Aedh co Termonn Da Beóoig. Ocus Mag Raith, .i. Ruaidhri, mac Diarmata, mic Mharcuis Meg Raith, .i. comarba an Termaind, do theagmail doibh annsa Termann & h-é da fhogra do Conn & do Chonallcaibh gan a chomairce fein, na comairce an Termaind, do brisedh ar Mag Uidhir. Ocus nír' fhaemhadur san sin & Mag Uidhir & a muinntir d'imthecht ar eigin, no gu tarla a n-eich uile a criathrach bhog mhointigh, inar' fhagaibh siad deich n-eich ar cet each. Ocus brisedh ar muinntir Meg Uidhir leissin & Mag Uidhir do ghabail a comairce an Termaind & Meg Raith & da fer dheg do marbadh ann, timcheall Briain Oig, mic Briain, mic Pilib Meg Uidhir, do marbadh an la arna marach la clainn Aedha Meg Uidhir ina ferann fein & timchill Emaind Carraigh, mic an Airchideochain Mic Magnusa & Donnchaidh, mic Duinn, mic Pilib Meg Uidhir & Gilla Padraig, mic h-Ui Flannagain, .i. mac Gillibert, mic Cormaic h-Ui Flannagain & Airt, mic Taidhg Dubshuiligh, mic Mic Craith Meg Uidhir & araile.]
R C: do ghabail le Conn, mac Aedha Ruaidh, mic Neill Gairb h-Ui Domnaill, a Termonn Meg Raith & Brian Og, & mac Briain, mic Pilib Meg Uidhir, do marbadh ann & Emunn Carrach, mac an airchidechain, mic Cathail Moir Mic Maghnusa & Donnchadh, mac Duinn, mic Pilib Meg Uidhir & Art, mac Taidhg Dubhsuiligh, mac Mic Craith Meg Uidhir & Gilla Padraig, mac Gillebert h-Ui Fhlannagain, do marbadh ann & araile. Ocus deich n-eich ar cet each d'fagbhail ann.