Kal. Ian. i. f., l. x.iii., Anno Domini M.ccc.lx.1363
Muircertach Ruadh mac Domnaill Irrais, do marbadh le mac Maghnusa.
Magnus Eoganach h-Ua Domnaill d'ec.
Aedh (Ruadh) Mag Uidhir, ri Fer Manach, d'eg in bliadhain si.
Maghnus mac Aedha Uí Domnaill, adbur righ Ceneoil Conaill, do marbadh le Maghnus mac Cathail Ui Choncobuir.
Tadhg Mac ConShnama, taisech Muinntiri Cinaetha, do lot & do ghabail le Cathal mac Aedha Breifnigh h-Ui Concobuir & a éc isin laim sin.
Caiterfhina inghen Ui Fhergail, {MS folio/column 74va} ben Ui Raighillaigh, d'ec.
Cathal Mac Donnchaidh do marbadh la lucht Muigi Luirg.
Gaeth mor isin bliadhain sin dobris tighi & teampaill, dobaith longa & artraighi imda.
Kal. Ian. ii. f., l. xx.iiii. Anno Domini M.ccc.lx.i.1364
Diarmait h-Ua Briain, ri Tuadh Muman, d'ec.
MaelShechlainn h-Ua Fergail, taisech Muinntire h-Angaile, d'éc.
Domnall mac Ruaidhri Ui Chellaigh, adbur righ h-Ua Maine, d'ec.
Ingin Baiter a Burc, ben Aedha mic Feidhlimidh, d'éc.
Derbail ingen in espoic Ui Domnaill, ben Meg Uidhir (idon, Aedha Ruaidh Meg Uidhir), d'ég.
Aedh h-Ua Neill, in t-aen ri is ferr tainic do Leth Cuinn isin aimsir n-deighenaigh i n-airdrighi Coicidh Uladh, d'écc in bliadhain si.
Domnall Mag Uidhir, tigherna Clainni Fergaile, mortuus est.
Gilla na Naem O Duibhdaboirenn, ollam breitheman Corcumruadh Ui Lochlainn, d'éc.
Bran h-Ua Brain, saí timpanaigh, d'eg.
Diarmait h-Ua Sgingin, sgelaighi maith & senchaidh, d'eg.
Aiffric, ingen Briain Ui Raighillaigh, ben Briain Meg Tigernain, d'eg sechtmuin re Caisc. Ocus nírr' oindedh ar a maithius co h-aimsir a h-oidhedha.
Kal. Ian. iiii. f., l. u., Anno Domini M.ccc.lx.ii.1365
Ruaidhri mac Domnaill Uí Neill do marbadh do MaelShechlainn, mac in Ghirr, d'aen urchur soighdi.
Tomaltach mac Murchadha Ui Fherghail, d'eg.
Cogadh mór isin bliadhain si eter Clainn Goisdelb & Luighnígh & innsaighidh do dhenamh do Clainn Goisdelb ar
Adam h-Ua Fialan mortuus est.
Indsoighidh do dhenum d'Aedh Mac Diarmata ar Muinntir Eoluis. Cinta mora & crecha aidhbli do dhenam ar Eolusachaibh don dul sin: nochur crecha gan cairechaibh na crecha sin ; uair do marbadh echta uaisli anboile umposan, fa'n aenfher {MS folio/column 74vb}tighi n-aidhedh coitcinn is ferr do bi i Connachtaibh 'n-a aimsir, idon, fa Cormac mac Diarmata Ruaidh & fa dha mac Tomaltaigh Ui Birn. Diarmait Mac Diarmata & Maelruanaigh mac Donnchadha Riabaigh, do ghabail ar a creich cetna.
Feidhlimidh in Einigh h-Ua Concobuir, rí Corcumruadh, idon, mac Domnaill Ui Concobuir, sai gan aithbhi n-éinigh, d'éc in bliadhain sin.
Brian mac Matha Meg Tigernan, mac taisigh fa mó agh & oirrdercus, feichem coitcinn im biadh & im eallach, d'ég im feil Sang Seaain in bliadhain sin, amail adbert: Rann:
- Brian Mag Tigernan na tres,
Re a einech nír' coir coimes:
Relean gan fic an fheile,
Bud neam crich a chathreime.
Brian mac Aedha Meg Mathgamna, do ghabail righi n-Oirghiall & cleamhnus & caradrag d'fhas dó ar Somairligh mac Eoin Duibh Mic Domnaill, ar Consdabla
Rann:
- In loch sa ar'cuiredh cenn caich,
Somairle na slegh rinnaith,
Eter gnai & glór is ghen,
ór is fin fai do foilgedh.
Nochor olc gan inneachudh re h-athgairit in t-olc sin. Uair ro tinoil Domnall mac Aedha h-Ui Neill & Toirrdelbach h-Ua Neill & tucadar comadha mora & brathair-si & sithcain do clainn Aedha Buidhe Ui Neill, idon, do Brian mac Enri Uí Neill, co n-a braithribh. Ocus tainic fós isin coimtinol cetna Niall mac Murchadha mic Murchadha Mhoir Mheg Mathgamna, derbrathair mathar Mic Domnaill
Cu Connacht h-Ua Raighillaigh, rí Breifne, do dhul isna Braithribh d'a dheoin fein rí beodha, brighmur & an righi do thabairt do Pilib, d'a derbrathair.
Eochaidh mac Toirrdelbaigh Meg Mathgamna, do marbadh.
(An Persun O Congaile, id est, Paidin, idon, oircideachuin Rosa Orcir, mortuus est.)
Kal. Ian. u. f., l. x.ui., Anno Domini M.ccc.lx.iii.1366
Cathal mac Aedha Breifnigh mic Cathail Ruaidh & Maghnus Og, a mac & Muirchertach Mac Cailridocair & Muirgis h-Ua Maelatuile & Diarmaid Mac Simoin & Diarmaid Mac Gilla Beraigh do marbadh a fell, tertio Idus Maii ar Srath Fer Luirg le
Imirci do dhenam le Muindtir Ruairc isin m-Bréifne i comdail Fer Manach & gres timcill do dhenum do macaibh righ ógaibh Clainni Muircertaig & Cathal Mag Fhlannchadha do marbadh uirre, taisech Dartraighi.
Cathal Mag Flannchadha, taisech Dartraighi, do mharbadh le Clainn Muircertaigh h-Ui Concobuir ar greis oidhche.
Tinol do Domnall h-Ua Neill & do Clainn Domnaill, idon, do Thoirrdhelbach Mac Domnaill & d'Alaxandair Mac Domnaill d'innsach Neill Uí Neill. Ocus Mac Catmhail do chur astir amach doib & a dul sein d'innsech Neill Uí Neill. Breith ar deredh na n-imircedh. Ocus Ragnall mac Alaxandair, oigri Clainni Alaxandair, do thecht a h-Innsibh Gall fa'n am sin dochum Neill Uí Neill. In da ceithirn do thecmhail ar a cheile, idon, oirecht Clainni Domnaill. Ocus Raghnall do chur techtairechta mar a roibhe a brathair fein, idon, Toirrdelbach & a mac, idon, Alaxandair & a iaraidh dó a n-onoir na sinnserechta & in braithresa gan techt 'n-a cenn. Ocus gan aire do thabhairt dó & nír'fechedh dó, acht ro innsaighdur cum in atha ar a facadur Raghnall & tucadur troid d'a cheile. Ocus do marbadh mac Ragnaill and
Cagadh mor eter Gallaibh Connacht & Clainn Muiris d'innarbadh le Mac Uilliam & a n-dul sen cum Clainni Ricaird & sluaighedh {MS folio/column 75rb}mor do dhenum le Mac Uilliam & le h-Aedh mac Feidhlimthe, ri Connacht & le mac Maghnusa Ui Conchobuir & le h-Uilliam O Ceallaigh, rí O Maine, a n-Uachtar Connacht cum Clainni Ricaird. Moran do Muimnechaibh d'eirghi le Clainn Ricaird & beith forba raithi ag forbaisi ar a ceile doibh & nert do gabail do Mac Uilliam fa dheoigh. Braighdi Clainni Ricaird do thabairt do leis & a tiachtain fein co beodha, laidir don turus sin.
Muircertach mac Raghnaill mic Raghnaill Moir Meg Raghnaill, adbur ardtaisigh gan esbaidh, do marbadh a fell la taisech Muinntiri h-Eoluis, idon, la MailShechlainn Mag Raghnaill, in cet Luan íar Samain. Ocus in taisech le'n-dernadh in marbadh, a dul fein d'eg i cinn da mís d'a eisi.
Huigin Tríél do marbadh (in bliadhain sin), idon, triath Fer Tulach, la Clainn Fheorais & fa mór in gnim Goill é gan amurus.
Kal. Ian. ui. f., l. xx.uii., Anno Domini M.ccc.lx.iiii.1367
In t-espuc h-Ua Ferghail, idon, espuc Arda Achaid, sai gan esbaidh i crabaidh, no a n-derc, no a n-deigheinech, in Christo quieuit.
Aircideochain Oirgiall, idon, Malaici Mag Uidhir, sai gan urdubaidh n-einigh, in Christo quieuit.
Sitriug, mac in oircinnigh, flaith coitcenn conghairech & cenn uasal a aicme fein, d'eg.
Cathal, mac Imhair Meg Thigernain, istudh coitcenn do truaghaibh & do trenaibh, d'eg.
Imirci mor do denum la Clainn Muircertaigh i Maigh Níssi & toisc do denum doibh ar lucht Muighi Luirg, idon, la Tadhg, mac Ruaidhri Ui Concobuir & la maithibh a muinntiri & a mortinoil: idon, la Fergal Mag Thigernan, taisech Tellaigh Dunchadha & la Diarmait Mhag Raghnaill, taisech Muinntire h-Eoluis, a coimtinol Gaidhel & galloglach. Longport Aedha Mic Diarmata do loscadh doibh. Fergal Mac Diarmata, rí Muighi Luirg & Aedh Mac Diarmata d'eirghi fa'n n-guasacht sin. Gleire glan marcshluaigh & tachur do thabairt doibh ann d'a cheile ig Ait Tighi Mic Coise & breisim madma do thabairt ar lucht Muighi Luirg & da fer dec do marbadh do maithibh aesa gradha Mic Diarmata & Aedh fein do lot ann. Ocus Mac Diarmata & Aedh Mac Diarmata do gabail derigh ar a muinntir co beodha, laidir o soin amach.
Cu Chonnacht h-Ua Raighillaigh, rí Breifne, mortuus est, idon, sgel uirrigh is
{MS folio/column 75va}Ainnrias h-Ua Taichligh, tigherna ar leth ferainn Muinntiri Taichligh, mortuus est.
Feidhlímidh h-Ua Raighillaigh ar n-a mharbadh d'esgur in bliadhain sin.
Maidm mor (Maidm Traga Eothaile) do thabairt la Domnall mac Muircertaigh & la Muintir Ruairc & la Mac Donnchaidh & la Teboid a Búrc co n-a ceithernaibh congbala ar Tadhg mac Maghnusa. Ocus breith forra ar Traigh Eothaile & galloglacha mic Maghnusa do marbadh ann deichnemur & secht fichit fa Domnall, mac Somairle & fa Domnall Óg, a mac & fa da mac Mic Suibhne & fa mac in espuic Ui Dubhda & fa Uilliam Mac Sithigi.
Toiscc do dhenum la Clainn Muircertaigh ar Muinntir Ruairc & ben Ui Ruairc Moir do marbadh don turus sin, idon, Dirbail, ingen Mailruanaigh Moir Mic Diarmata. Ocus ní tainic o Una, ingin righ Lochlan, gnim mná budh mó.
Toisc aile do dhenum do Clainn Muircertaigh ar Fheraibh Manach & Inis Moir d'argain doibh & Loch m-Berraigh & in Senadh d'argain doibh & édala aidhbli do, thabairt doibh leo & tiachtain imshlan doibh as a aithle.
Kal. Ian. uii., f., l. ix., Anno Domini M.ccc.lx.u.1368
Aedh mac Feidhlimthe h-Ui Conchobuir, airdrigh Connacht, cenn goile & gaiscidh Leithi Cuind, d'ec
Ferghal Mac Diarmata, rí Muighe Luirg, leomhan uaisli & eíních Erenn, d'eg.
Cormac Og Mac Diarmata d'eg.
Tomaltach mac Fergail Mic Diarmata, tanusti Muighi Luirg, d'ec.
Righe do ghabail d'Aedh mac Concobuir Mic Diarmata, in bliadhain sin.
Cuicedh Connacht do ghabail do Ruaidhri mac Toirrdelbaigh Ui Concobuir, in bliadhain si.
Ruaidhri mac Seonuc Meg Eochagan, *sebhach einigh & egnuma & feigi fheile & fhairsinge na Midhe o *baile Atha Cliath co baile Atha Luain, iar m-breith buadha o doman & o demhon, d'ec.
Uilliam Saxanach Mac Uilliam d'ec.
Sluaighed mor do dhenum le Niall h-Ua Neill, la righ Coicidh Uladh & la h-adhbur airdrigh Erenn a
n-Oirghiallaibh & maithi in Coicidh uile d'eirghi leis
d'forbais ar Brian Mac Mhathgamna &
longport do gabail i m-bolgan in tire
d'Ua Neill & comadha mora
do thairgsin o Brian Mag Mathgamna d'Ua
Neill: idon, leth n-Oirgiall do thabairt do
Niall mac Murchadha, don righ {MS folio/column 75vb}do bi roime
sin istir & comadha mora a n-íc Mic
Domhnaill uada fos. h-Ua Neill imorro dia
aentughadh sin. Ocus comuirle do
denum do mac Murchada Meg Mathgamna (idon,
Niall) & d'Alaxandair Og
Mac Domnaill, do tigherna
Cu Uladh, mac in Ghirr, cenn aicme a cinidh fein, d'ec & a mac, maighister og saidhechta, d'eg fós ag techt a Saxanaibh.
Fiachra O Flaind, adbur taisigh Sil Mailruain, mac taisigh rob'ferr 'n-a aimsir fein, d'ég & a ben, idon, saí mna gan eiliughudh.
Comhorba Moedhoic & aircideochain na Breifne e fos --fer lan do rath in Spiruta Naeim & do derc & do daennacht, d'eg in bliadhain sin, ar m-breith buadha o doman & o demhon.
Tomas h-Ua Floind, rí h-Ua Tuirtri, sai gan esbaidh n-einigh no uaisli, no oiregdhachta, d'eg in bliadhain si.
Tadhg mac Maghnusa mic Cathail *mic Domnaill, do ghabail d'O Conchobuir i feall 'n-a longport fein & a chur i l-laim Uí Ferghail d'a coimed.
Cogadh mor d'eirgi a Connachtaibh trid sin eter Mac Uilliam & O Conchobhair.
Kal. Ian. ii. f., l. xx.. Anno Domini M.ccc.lx.ui1369
Pilib h-Ua Raighillaigh do ghabail & do aithrighudh d'a braithribh fein & a cur a Cloich Locha h-Uachtair co n-dochar mor air. Ocus an righi do ghabail do Maghnus h-Ua Raighillaigh & cagadh mor isin Breifne trid sein.
Geralt Caemanach, adbur airdrigh Laigen, do marbadh don Ridire Dubh, gnim mor do Gaidhelaibh Erenn uile.
Tigernan h-Ua Ruairc do dhul ar creic i l-Lorg & in creach do thabairt doib leo co beodha & Aedh Og mac Aedha Ui Ruairc, do marbadh uirre d'h-Ua Mhaeladuin Luirg.
In Deganach h-Ua Bardan, sai gan esbaidh, mortuus est.
Diarmait Laimderg Mac Murchadha, airdrigh Laighen, do beith i l-laim fata ag Gallaibh Atha Cliath, ar n-a ghabail a fell don Ridire Dubh & a tarraing fa deoigh doib, gnim is mo do ronadh a n-deredh aimsiri.
Mathgamain Maen{MS folio/column 76ra}muighi h-Ua Briain, ri Tuad Muman, in t-aen Gaidel is ferr & is oiregdha do bi re a linn fein i n-Erinn, a dul d'eg 'n-a longport fein, iar m-buaidh aithrighe. Ocus Brian Óg h-Ua Briain do ghabail a inaidh d'a eisi.
Maidm do thabairt ar Maghnus h-Ua Raighillaigh (idon, Maidm na Tragha, ag Oilen na Trinoide),
h-Ua Maeladuin, ri Luirg, do marbadh i feall do macaibh Neill Ui Domnaill & Pilib Mag Uidhir, ri na secht Tuath, do dhul, loinges mor, do digail a oglaich ar macaibh Ui Domnaill & Niall Og h-Ua Domnaill do marbadh leis ar troid loingsi ar Finn Loch.
Cagadh mor eter Níall h-Ua Neill & Domnall h-Ua Neill isin bliadhain sin.
Donnchadh h-Ua Birn, taisech Tiri Briuin, mortuus est.
Brian mac Aedha Buidhe Uí Neill, adbur righ Erenn d'uaisli & d'einech & d'airdeghnum, do dhul d'eg 'sa bliadhain sin.
Espuc Oda h-Ua Neill, idon, espuc Oirgiall, sai craibthech, coinnirclech, ar m-breith buadha o doman & o demon, in Christo quieuit (sexto Kalendas Augusti).
Ricard h-Ua Raighillaigh, idon, espuc na Breifne, quieuit in Christo .
Airchideochain na
Brian mac Muircertaigh Ui Concobuir, mac righ maith, mortuus est.
Seaan mac Emaind mic Hoiberd, mortuus est.
Raghnall O h-Ainlidhe & Cormac O h-Ainlidhe do dhul d'eg do cluiche in righ.
Aedh O Birn do dhul d'eg don plaidh cetna.
Eoin Mac Aedhagan & Gillibert O Bardan, da saer macam crutheladhnacha Conmaicne, do dul d'eg 'sin bliadhain si.
Mael Sechlainn Mhag Mathgamna, adbur righ Oirgiall, mortuus est.
Maidm mor do thabairt la righ Tuadh Muman, idon, la Brian h-Ua m-Briain, dú in rogabadh Iarla Des Muman, idon, Geroid & Goill mora na Muman archena. Ocus ní meinic (do thuit) do dhainibh a n-aen maidm riam urdail ar' thoit ann & ar' gabadh do Ghallaibh. Luimnech do legadh & do luathloscadh le Tuadh Muimnechaib don turus sin & gialladh do ghillaibh ógaib in baile do Brian & do Chuilenachaib archena. Ocus Sida Óg, mac ingine h-Ui Dhuibhidhir, do ghabhail bardachta in baile & fell do dhenum do Ghallaibh Luimnigh ar in laechmilidh. Ocus is e sin gnim mic taisigh is mó do rinnedh a n-Erinn ar deredh in domain.
Toisc loingsi do denum la Pilib Mag Uidhir, idon, rí Fer Manach, co n-a macaibh righ ogaib co Loc Uachtair &
Muirghis h-Ua h-Eogain, bicair Innsi Cain for Loch h-Erne, mortuus est quinto Idus Nouembris.
Kal. Ian. iii. f., l. i., Anno Domini M.ccc.lx.uii.1370
Sith mor, daingen, degthairisi do denum do Ceniul Eogain fein. Niall h-Ua Neill & Domnall, a brathair, an tir do roind daib atorra: braighde & righi o Domnall do Níall.
Breisim madhma do thabairt do Níall O Neill, do righ Coicidh Uladh, ar Brian Mag Mhathgamna, ar rí Oirgiall & moran do muínntir Meg Mathgamna do bathadh & do milliudh air. Mac Gillí Cua, sai gan esbaidh, do bathadh air.
Dubchablach ingen Ui Raighillaigh (idon, inghean Philib h-Ui Raighillaigh), ben phosta Pilib Meg Uidir, d'eg.
Cogadh mor d'eirghi ísin bliadhain si eter Clainn Muircertaigh & Muinntir Ruairc. O Raighillaigh & Mag Uidir & O Ferghail & O Concobuir d'eirgi do Clainn Muircertaigh & a cur a Muinntir Eoluis. Ocus Mag Raghnaill d'a tregan re ronert na righ sin & a cur cum Mic Uilliam & Mag Tigernan leó.
Indsaighidh urbadhach do denam le clainn Aedha Mic Cathmail & rigthaisech Ceniuil Feradhaigh do marbadh doibh a feall, idon, Gilla Patraig Mac Cathmhail & a deghmac, Cu Uladh Óg & a ben, ingen Maghnusa Meg Mathgamna. Murchadh, a derbrathair, i n-a inadh d'a eisi.
Maghnus O Raighillaigh do ghabail
Cathair h-Ua Concobuir, adbur righ h-Ua Failghi, a toitim ar dheredh creiche la Gallaibh na Midhe.
A.D. M.ccc.l.xx.i.
Fergal Mac Cochlan d'eg i l-laim ag Ua Ceinneidigh.
Murchadh h-Ua Madagan, feichemh coitcenn, a marbadh d'en urchur soighde ar deredh creiche le h-Ur Mumain. Ocus is do na gnimaibh soighde as mó adrochair a n-Erinn riam é.
Brian h-Ua Ceinneidigh, rí Ur Muman, do thoitim a fell le Gallaibh.
Siuban Cam, ingen Mic Carthaigh, ben Mic Conmara, d'eg ar m-breith buadha in einich le.
Airdespuc Tuama, cenn einich Erenn, in Christo quieuit.
Amhlaim Mac Senaigh, impir sogradhach na senma, d'eg don plaigh i Tuaim da Ghualand.
Mael Sechlainn Connachtach O Ferghail d'eg.
Cathal Óg O Ferghail d'eg.
Mac Maghnusa Meg Uidhir d'eg in bliadhain si: idon, brughaidh coitchenn d' feraibh Erenn, idon, Eachmarcach mac Maghnusa mic Ruaidhri mic Maghnusa mic Duin Mhoir & araile.
Art mac Amhlaim Meg Uidhir, mortuus est.
(Hic natus est Carolus Magnus Mac Maghnusa idon, mac Gilla Phadraig mic Maghnusa mic Airt mic Amhlaim Meg Uidhir, pridie Idus Ianuarii hoc anno.)
{MS folio/column 76va}Kal. Ian. u. f., l. xx.iii., Anno Domini M.ccc.lx.uiii.1372
Brian Mór Mag Mhathgamna, airdrigh Oirgiall, lam is mó do marb Ghallaidh & do Gaidhelaibh Erenn i n-a aimsir fein in fer sin & a dul a coinne Gall & gallóglach d'a muínntir fein do fhell a n-uaígnes air & a marbadh dó & a dul fein as d'a éisi.
Feall is gruamdha & is grainemhla do rindedh a n-Erinn riam do denumh do Domnall mac Muircertaigh Ui Conchobuir: idon, mac a brathar fein, Tadhg Óg mac Maghnusa, do marbadh d'a lamaibh fein a caislen Sligidh & se i laim aigi ann.
Seaan h-Ua Dubagan, airdshenchaidh na h-Erenn, ar fágbhail aibhnisa in t-shaegail fri re secht m-bliadhan & a eg ag Muinntir Eoin Baisti a Rinn n-Duin.
Mac Fheorais do ghabail le h-O Cellaigh & le a macaibh ; Risderd *mac Mic Fheorais, do marbadh, idon, oighri Mic Fheorais.
Uilliam Óg mac Uilleag, cenn suarcais Erenn d'eg in bliadhain cetna.
Uilliam Óg h-Ua Ceallaigh, *adbur infheicim coitcinn is ferr do bí i n-Erinn, d'éc in bliadhain si. Ocus ní tainic o Cormac na Loinges mac Concobuir, anuas mac righ budh ferr inas.