Kal. Ian. ui. f., l. x.ii., Anno Domini M.ccc.xxx.1333
Tomaltach mac Donnchadha Mic Diarmata, mortuus est.
Uilliam a Burc, Iarla Uladh, {MS folio/column 70ra}do
Gillibert Mac Goisdelbh do marbadh le Cathal Mac Diarmata Gall, ar lar a caislein fein.
Aedh mac Domnaill h-Ui Domnaill, rí Thire Conaill, aen duine fa mo grain & coscur, feichium coitchenn, neoch rob' ferr smacht & riaghail robi i n-aen aimsir ris, ar m-breith buadha o doman & o dhemhan, ar n-gabail aibiti manaich leith uime, a eg i n-a longphort fein & a adhnucal i tempall Mainistrech Esa Ruaidh. Conchobur mac Aedha cetna, do ghabail righi Thire Conaill ar eis a athar. Imcosnamh eter Art h-Ua n- Domnaill & Concobur, mac a athur féin, im an righe & Art do ghabail le Concobur & a marbadh a cetoir leis.
Donnchadh mac Aedha h-Ui Cellaigh, do ghabail le Toirrdhelbach O Conchobuir, ri Connacht.
Aedh Mac Con Shnama mortuus est.
Domnall Mac Con Shnama, taisech Muinnteri Cinaith, mortuus est.
Mac na h-Aidhce Mag Fhlannchadha, adbur taisigh Dartraighi, do marbadh le Connachtaibh.
Kal. Ian. uii. f., l. xx.iii., Anno Domini M.ccc.xxx.i.1334
Sluagadh le Connachtaibh, eter Gall & Gaidhel, sa Mumain cum Maic Conmara. Braighde & nert do ghabail doibh ar Mac Conmara. Tempoll do loscadh le
Deichnebur do mhuinntir Dhonnchadha Riabaigh, mic Mail Shechlainn Carraigh Mic Diarmata, do bathudh ar Loch Teiched.
Tadhg mac Cathail mic Domnaill, quieuit in Christo.
{MS folio/column 70rb}Kal. Ian. i. f., l. iiii., Anno Domini M.ccc.xxx.ii.1335
Seaan O'h-Eaghra do ghabail le mac in Iarla & forgla a mhuinntire d'argain.
Crech le clainn Domnaill ar Gallaibh, idon, ar Clainn Muiris Shugaigh Mic Gearailt. Crech mor le Clainn Muiris ar an clainn cetna.
Iarthar Chonnacht do mhilliudh uile le Uilliam Burc. Daine imda do marbadh & creacha & loiscti & uilc diairmidhe ar mac in Iarla & ar Chlainn Ricaird a Burc do dhenum dho. Sith eter na Burcachaibh cetna.
Kal. Ian. ii. f., l. x.u., Anno Domini M.ccc.xxx.iii.1336
Tomaltach Mac Diarmada, ri Muighi Luirg, fer ro bo mo grain & coscur & rob' ferr sith & cocadh, derc & daenacht ro bhi a n-Erinn i n-a aimsir fein, a eg a n-Domnach na Trinoide, i n-a longport fein, i Caladh na Cairrge & a adhnucal i Mainistir na Buille,
Teboit a Burc mortuus est.
Mailir mac Siurtan d'Exetra, quieuit in Christo.
Maidm le h-Eogan h-Ua Madughan ar Clainn Ricaird a Burc, du itrochair seisser & tri fichit, eter maith & saith.
Domnall mac Seaain mic Domnaill Ui Concobuir, mortuus est.
Niall mac Concobuir Mic Taidhg, occisus est d'aen urchur soighdi.
Trinoit O Naain, maighister coitcenn i n-ealadhnaibh examhlaibh, i n-Dlighedh chanonda & i l-Lex, mortuus est.
Crech mor le macaibh Diarmada Gall ar Clainn n-Goisdelbh & do marbadh Maiug mac Bailtrin Mic Ghoisdealb.
Crech mor le h-Emonn Mac Uilliam ar Clainn Cathail, du ar' hairged Conchobur O Flannagan & moran aile do lucht in tire. Ocus do marbadh Mael Sechlainn, mac Aedha h-Ui Fhlannagan, ar toraidhecht na creiche & do gabadh leosan mac Mic in Milidh.
Concobur Mac Diarmada, rí Muighi Luirg & Aedh mac Aedha & lucht tighe h-Uí Conchobuir & Clann Donnchaidh & glaslath Criche Cairpri im Cormac mac Ruaidhri, do dhul ar creich h-i Tir Fhiachrach, co rangadur Mullach Ratha. Ocus ba in tire do theichedh rompa. Mairbedala mora & capaill imdha do thabairt doibh leo & le Connachtaibh archena. Caislen mor Mic Goisdelbh do legadh le Toirrdelbach & le Connachtaib archena.
Kal. Ian. iiii. f., l. xx.ui., Anno Domini M.ccc.xxx.iiii.1337
Sith do dhenum do mac in Iarla re Brian m-Ban O m-Briain.
Sith do dhenam d'Aedh Remur h-Ua Neill (idon, Aedh Meith) re h-Oirghiallaibh & re
Faslongport do dhenum le Toirrdhelbhach h-Ua Concobuir ig Ath Liacc i n-adhaigh Emoind a Burc.
Seoan O Fallamain, taisech Clainni h-Uadach, mortuus est.
Tadhg Mag Flannchaidh, taisech Dartraighi, do marbadh le Cormac mac Ruaidhri mic Domnaill, maraen re sochraide aile, {MS folio/column 70va}a n-dighail Seaain Mic Domnaill. Ocus creacha mora do denum ar Dartraighibh & mac Muiris Meg Fhlannchaidh do marbadh an la cetna.
Tadhg & Mail Shechlainn, da mac Imhair Meg Raghnaill, do ghabail do Chathal Mág Raghnaill. Uilliam mac Matghamna & in bladh aile do clainn Imair, idon, Concobur & Tomaltach, righadhbuir Muinnteri h-Eoluis, do tinol d'a tóraidhecht & Cathal Mac Raghnaill & Maghnus mac Fergail, do marbadh doibh. Taisech do dhenum do Thadhg Mag Raghnaill.
Domnall Ruadh O Maille & Cormac O Maille, a mac, do marbadh do Clainn Meibric & do Ghallaibh ailibh maille friú, adhaigh feil Stefain in bliadhain si.
Tomás mac Carmaic h-Ui Domnaill, espuc Tiri Conaill, saí n-egna & crabadh coitcenn fa biadh & fa ellach d'eigsibh & d'ollamnaibh in betha, in Christo quieuit.
Kal. Ian. u. f., l. uii., Anno Domini M.ccc.xxx.u.1338
Ruaidhri (in Einigh mac Flaithbertaigh mic Dhuinn Oig, alias Carraich) Mag Uidhir, ri Fer Manach & Lacha Eirne (per quatuordecim annos ; alias, per duos annos), in fer is mo ro thidlaic d'airged & d'innmus, d'echaibh & d'almhaibh & d'innilibh, do dhul d'eg re h-adhart,
Mac Iarla Uladh do ghabail d'Emonn a Burc & a chur i l-Loch Oirbsen. Uilc mora & cagadh coitchenn i Connachtaibh trid sin.
Tadhg mac Ruaidhri mic Cathail h-Ui Conchobuir, do ghabail do Tomas Mág Samhradhain & moran d'a muínntir do marbadh. Mag Shamhradhan do dul do thigh Ui Concobuir in bliadhain cetna & a thecht arís i n-a fhritheing & aircis do thabort do Clainn Muircertaigh air & do Muinntir Eoluis & do coimthinol na Breifne, eter Gaidhel & Galloglach. Ocus Mag Samhradhan do ghabail & moran d'a muinntir do marbadh.
Aedh in Chleitigh mac Ruaidhri Ui Conchobuir, do lot ar deredh creiche 'sa Bolegan & a eg dhe.
Derbhail ingen Cathail Mic Murchaidh, ben Donnchadha mic Aedha Oíg, d'eg.
Kal. Ian. ui. f., l. x.uiii. Anno Domini M.ccc.xxx.ui.1339
Sluagh mor la h-Aedh Remar h-Ua Neill cum Tíre Conaill, dar'marbadh mac {folio & column 70vb}Seaain h-Ui Neill & Gaffraigh h-Ua Domnaill la muínntir h-Ui Dochartaigh.
Ruaidhri O Ceallaigh, ri h-Ua Maine, do marbadh la Cathal mac Aedha mic Eogain, ar n-dul a tigh Toirrdelbaigh h-Ui Concobuir d'a tigh fein. Sai Erenn gan imresain fein.
Emonn Mac Uilliam a Búrc d'innarbadh in bliadhain si.
Bean mic Iarla Uladh, idon, ingen Toirrdelbaigh h-Ui Briain, do thabairt do Toirrdelbach h-Ua Concobuir, do righ Connacht, in bliadhain si & Derbail ingen Aedha Ui Domnaill, do legan do.
Tomas Mag Samradhan, do bí i l-laim ic Clainn
Plaigh mor do shnechta & do shic in bliadhain sin, o cenn caicidhisi do gheimhredh co taníc blodh d'errach, co n-deachaidh moran d'ellach Erenn d'eg ann & guirt gemhair Erenn do dhul a mugudhain bliadhain cetna.
Kal. Ian. uii. f., l. xx.ix., Anno Domini M.ccc.xxx. uii.1340
Comtógbail mor cagaidh eter Mainechaibh, idon, eter Tadhg mac Taidhg Ui Cheallaigh & Uilliam mac Donnchadha Muimnígh Ui Cheallaigh & Donnchadh mac Aedha Ui Chellaigh, d'a tuc Toirrdelbach O Concobuir urlamhus O Maine, do Tadhg & moran d'a cinedh fein fos, gur'theilgset Uilliam asthir imach. Ocus rolensat uile e, gur'ímpo Uilliam orra & gur'marbadh Donnchadh mac Aedha Ui Cellaigh & gur'gabadh Tadhg O Cellaigh & gur'loitedh & co n-deachaidh d'eg d'a loitibh.
Mael Sechlainn h-Ua Gairmleaghaidh, taisech Ceneoil Moain, d'eg.
Toisc dochódar meic Ualghairc h-Ui Ruairc, idon, Domnall & Aedh & Gilla Crisd & Ruaidhri, ar creich cum Cathail mic Aedha Breifnigh & do rinneadur
Aedh mac Feidhlimidh Ui Concobuir, do ghabail do Thoirrdhelbach O Conchobuir, do righ Connacht & cagadh d'eirghi trid sin eter O Conchobuir & Concobur Mac n-Diarmata, {MS folio/column 71ra}rí Muighi Luirg & gur'milledh moran etorra.
Siurtan Ruadh Mac Goisdelb do marbadh do Cathal Mac Diarmata Gall.
Tadhg Mac Donnchaidh do ghabail do Concobur Mac Diarmata in bliadhain sin.
Cathal Mac Diarmata Gall, aen raghu mac righ Connacht ar goil & ar gaiscedh, ar treisi & ar aghmuire & ar innsaighidh, ar cosnum Airtigh & Sleibe Lugha do ar taradh a lamha laidire, do marbabh do Dhonnchadh Riabach mac Mail Shechlainn Charraigh, tre fell ig Lis Selbaigh i Cloind Conchobuir.
Maghnus mac Cathail mic Annrias, do marbadh do Cathal mac Aedha Breifnigh.
Brian Og Mag Samradhan do marbadh do Thellach Dunchadha.
Eogan h-Ua h-Eighin, ri O Fiachrach Aidhne, do marbadh d'a braithribh fein.
Eogan mac Sefraigh Meg Raghnaill & Aedh O Mailmíadhaigh do marbadh a cheile.
Adhamh Mag Theichedhan d'eg.
Pilib O Duibhgennan, sai gan ímresain, d'eg.
Iníug ingen Mic Goisdelb, ben Eogain
Uilliam mac Gillibert Mic Goisdelbh, do marbadh ar greis 'sa Breifne do Tellach Eachach.
Ruaidhri mac Magnusa Ui h-Eaghra, d'eg.
Matha mac Annaigh h-Ui Raighillaigh, do marbadh d'Annrias mac Briain h-Ui Raighillaigh & crecha mora do dhenum 'sin Bolgan don toisc sin.
Kal. Ian. ii. f., l. x., Anno Domini M.ccc.xxx.uiii.1341
Maidm mor do thabairt do Mac Uilliam Burc ar Clainn Muiris, dú inar'marbadh Tomas Mac Muiris, Muiris mac Seonag Ruaidh & deichnebur & tri fichit ar aen riu.
Domnall Mag Dhorchaidh, taisech Ceneoil Luachan, d'eg.
Donnchadh mac Mic na h-Aidhce Meg Fhlannchadha, do marbadh d'Aedh mac Taidhg Meg Fhlannchadha.
O Gairmleaghaidh d'eg.
Brian O Flaind, taisech Sil Mailruanaigh, d'eg.
Cathal Mac Ceithernaigh do marbadh dh'esgur.
Caislen Rosa Comain do gabail do Thoirrdhelbach h-Ua Conchobuir. Ocus Aedh mac Feidhlimidh, do bí i l-liamh 'sa chaislen, do treig d'O Choncobuir é.
Seaan Mag Mathgamna do chur a h-Airghiallaibh.
Cu Chonnacht O Cuind, taisech Muinnteri Gillgan, mortuus est.
(Muircertach Mac in Ghabann, abb Clochair, mortuus est Kalendis Februarii.)
{MS folio/column 71rb}Kal. Ian. iii. f., l. xx.i., Anno Domini M.ccc.xxx.ix.1342
In Gilla Dub Mag Uidir do bathudh ar Loch Eirne ar deredh creiche.
Cagadh mor d'eirghi eter Thoirrdelbach O Concobur, ri Connacht & Conchobur
Mac
Breisim brogdha do thabairt do Conchobur Mac Diarmata & d'a macaibh righ ar O Concobuir fa Bhel Atha Slisen, dar'lingedh in t-ath co toghdha tairsibh & d'ar'marbadh ann Diarmait mac Briain Uí Fherghail, in t-aen mac taisich na aesa dob'fherr do bi 'n-a aimsir do Conmaicnib & mac Hoibert a Burc, mídhach gan esbadh & Concobur mac Donnchadha Duibh Ui Eilidhe.
Seaan Mag Mathgamna, saí n-einigh &
Diarmait Ruadh mac Cormaic Óig Mic Diarmata, d'eg i n-aibit manaich leith í Mainistir na Buille, gan aen guth a n-diaidh a anma fa einech, no fa crabadh.
Concobur Ruadh Mag Eochagan do marbadh do Gallaibh.
Cormac mac Ruaidhri mic Domnaill Ui Conchobuir, do gabail le Conchobur mac Taidhg & le Ruaidhri mac Cathail Ui Conchobuir & Concobur do gabail le Brian mac Ruaidhri & a tabairt i l-laim Concobuir Mic Diarmata & a cur do sen d'a coimed i Carraigh Lacha Cé.
Domnall h-Ua Dochartaigh, ardtaisech Arda Mídhair & nocho n-édh amhain, uair is bec nach {MS folio/column 71va}raibhi tighernus Innsi h-Eoghain & tighernus tricha cet Thiri h-Enna & ro bo terc a n-Erinn taisech 'g ar' lia daine & ba mó marcsluagh & ba ferr goil & gaiscedh, einech & tidhnucal innás. Ocus a dul d'eg ar lar a tighe fein & Seaan h-Ua Dochartaigh do ghabail a ínaidh.
Sil Muiredhaigh, eter deoin & aindeoin, do dhilsiughudh righ Connact, idon, Toirrdelbach mac Aedha, maic Eogain Ui Concobuir. Ocus is iat is oiregdha do eirigh do: Emond Mac Uilliam a Burc & Concobur Mac Diarmata, ri Muighi Luirg, co n-a braithribh & co n-a oirecht. Ocus Aed mac Aedha Breifnígh mic Cathail Ruaidh & sochraide na Breifne & Conmaicní ar aen rú & Aedh mac Feidhlimthe, rí Connacht. Ocus a ínnarbadh astir amach lesna cuibrennaibh sin. Ocus as i comuirle tucsat a cairde dó: dul do thigh Mic Diarmata 'san aidhci. Ocus
Símon mac Concobuir mic Simoin Mic Gille Arraith, taisech do thaisechaibh Luighne, mortuus est.
Aedh mac Aedha Breifnígh, do ghabail righi Connacht Dia Luain, idon, in cet Luan do gheimregh.
Concobur h-Ua Domnaill, rí Tire Conaill & soithech dingbala d'airdrighi n-Erenn gan amurus é ar cruth & ar ceill & ar cetfadh, ar uaill & ar einech & ar oirrdercus, ar menmnaighi & ar mor toirbertaighi, ar crodhacht & ar cathirghail, ar uaisli & ar ailgine, ar daenacht & ar degh crabadh, a marbadh la Níall h-Ua n-Domnaill, la mac a athar fein, ar tabairt amais longpuirt fair. Ocus teinnti & tennala do chur isin tech mór & O Domnaill {MS folio/column 71vb}d'eirghi amach & a toitim a n-dorus a tighi fein, ar m-breith buadha o doman & o demhan. Ocus is dilliuchta an eigsi, & an eladha gan fer a h-imochair, na a -h-altruim tareis
Flann Óg O Domnallin, ollamh Connacht, in Christo quieuit.
Domnall O Coindlis, senchaidh suadhamail & taibleoir glanfhoclach na Gaidhilgi, do marbadh la h-Uibh Diarmata, gairit re Caisc.
Brugaidh coitcenn, ciall conaigh, do bi ar Loc Eirne, gan diultadh do thruagh, no do tren, idon Matha Mac Magnusa, d'eg in bliadhain sin (14 Kalendas Septimbris).
Tomas Mac Gilli Coisgli, sai n-egna, in Christo quieuit.
Tadhg Mac Donnchaidh, rí Tire h-Oilella, d'innarbadh le Concobur Mac n-Diarmata, d'a tigherna & d'a brathair fein & Fergal mac Tomaltaigh Mic Diarmata, do gabail Tire h-Oilella ar a eis.