Corpus of Electronic Texts Edition
Annala Uladh: Annals of Ulster otherwise Annala Senait, Annals of Senat (Author: [unknown])

Year U1310

U1310.0

Kal. Ian. iii. f., l. x.ii Anno Domini M.ccc.x.1314

U1310.1

Niall O Domnaill occisus est.

U1310.2

Maidm Muinnteri Raighillaigh ic Druim Lethan le Ruaidhri mac Cathail Ui Concobuir.

U1310.3

Maghnus mac Domnaill h-Ui Eaghra, do marbadh le Magnus mac Uilliam Ui Eaghra, i feall.

U1310.4

Niall mac Briain h-Ui Neill, in t-aen mac righ ro bo línmuire & rob'ferr maithius bo bí a n-Erinn i n-aen aimsir ris fein, quieuit in Christo.

Year U1311

U1311.0

Kal. Ian. iii. f., l. x.ii., Anno Domini M.cccxi.1314

U1311.1

Matha Mag Tigernan do marbadh do Chathal O Ruairc.

U1311.2

Niall O Domnaill do marbadh le h-Aedh O n-Domnaill.

U1311.3

Matha Mag Dhuibhne, espuc na Breifne, d'ég.

U1311.4

Roolbh Mag Mathgamna do marbadh d'a braithribh fein.

Year U1312

U1312.0

Kal. Ian. iiii. f., l. xx.iii, Anno Domini M.ccc.x.ii.1315

U1312.1

Sluagh-loinges mor do thecht a h-Albain le derbrathair righ Alban, le h-Edubhard, i crichaibh Uladh. Crecha mora do dhenum dó ar muinntir in Iarla & ar Gallaibh na Midhe. Sluagh mor do thinol don Iarla i n-aghaidh na n-Albanach. Feidhlimidh mac Aedha h-Ui Choncobuir, ri Connacht, do dhul leisin. Sluagh mor aile do tinol {MS folio/column 67vb}le Ruaidhri mac Cathail Ui Chonchobuir, i


p.424

Connachta. Caislena do losgadh & do brisiudh.

U1312.2

Aedh mac Magnusa Ui Conchobuir, do marbadh le Cathal mac Domnaill Ui Concobuir. Maghnus mac Magnusa, in mac righ rob' ferr einech & eghnom do bí do Connachtaibh & Domnall, a derbrathair, do marbadh in la ar namarach lesin fer cetna. Diarmaith mac Simoin na Tragha, do marbadh in la do marbadh Aedh mac Maghnusa Ui Concobuir, lesin clainn cetna a n-dighail a n-athar.

U1312.3

Cath don Iarla d'on dara leth & d'Edubard co n-a fhedain don leth aile, gur'maidmedh ar in Iarla & ar Gallaibh archena. Ocus do gabadh ann Uilliam Búrc & da mac Mic in Mhilidh.

U1312.4

Mathgamain Mag Raghnaill, taisech Muinnteri h-Eoluis, do marbadh le Maelruanaigh Mac n-Diarmata, rí Muighe Luirg & O Mailmhiadhaigh, taisech Muinnteri Cearballan & moran do Muinntir Eoluis araen riu. Conchobur Ruadh mac Aedha Breifnígh, do marbadh ann.

U1312.5

Maelruanaigh Mac Diarmata & Gilleberd Mac Goisdelbh do thecht i Magh Luirg & creacha do denum doibh. Ocus rucadur ben Diarmata Gaill leo & do airgedar uile muinntir Diarmata Gaill.

U1312.6

Taíníc Aedh O Domnaill fa chaislen Sligidh & do cuas fair leis.

U1312.7

Ruaidri mac Domnaill Ui Concobuir, do marbadh le Derborgaill, ingen Magnusa Ui Choncobuir, ar cennaidhecht do ceithirn gallóglach.


p.426

Year U1313

U1313.0

Kal. Ian. u. f., l. iiii. Anno Domini M. ccc.x.iii.1316

U1313.1

Sluagh mor do tinol le Feidhlimidh O Concobuir & le Mac Fheorais & le Gallaibh Iarthair Connacht. Techt doib co tochur Mona Coinnedha. Ruaidhri h-Ua Concobuir do dhul 'n-a n-aghaidh & cumusc doibh ar a ceile. Ruaidhri h-Ua Concobuir, ri Connacht, do marbadh ann & Diarmait Gall Mac Diarmata, rí Muighi Luirg & Cormac Mac Ceithernaigh, ri Ciaraidhe & galloglacha uaisli & daine imda aili. Righe in Coicid do gabail d'Fheidhlimidh aris. Ocus sluagh mor leis d'innsaighidh Atha Lethain & in baile do losgadh leis. Ocus Sleimne d'Eisetra, tigherna in baile, do marbadh leo & in Goganach, in t-aen Barun ba saire dobi a n-Erinn, do marbadh leo & Goill imda aili. Ocus edala mora d'fhaghbail doibh. A nós & a n-alladh do dhul fa Erinn, gur'ghiallsat moran doibh.

U1313.2

Sluaighedh mor do comoradh le Feidhlimidh {MS folio/column 68ra}mar aen re maithibh an coicidh & Donnchadh O Briain, ri Muman & O Mael Shechlainn, ri Midhe & Ualgharc O Ruairc, rí Breifne (Ualgharc O Ruairc do ghabail righi in isto anno.) & O Ferghail, ri Muinnteri h-Angaile & Tadhg O Cellaigh, ri O Maine & Maghnus mac Domhnaill h-Ui Concobuir, tanusti Connacht & Art O h-Eaghra, ri Luighne & Brian O Dubdha, rí O Fiachrach. A n-dul sin uile co h-Ath na Righ. Goill Iarthair Connacht uile do thinol 'n-a n-aighidh: idon, Uilliam Burc & in Barun Mac Feorais, tigherna Atha na Righ & Goill Leithi


p.428

Cuinn uile d'urmhor. Cath do comorad leo & maidm do thabairt ar Gaidhelaibh ann. Feidhlimidh O Concobuir (mac Aeda mic Eoghain), rí Connacht, do marbadh ann: in t-aen duine is mo re raibhe aire fer n-Erenn uile & rob' fer einech & eghnum. Tadhg h-Ua Ceallaigh, rí O Maine, do marbadh ann & ochtar ar fichit d'ar'dhual righi do Clainn Cellaigh do marbadh ann. Art O h-Eaghra, ri Luighne, do marbadh ann. Acht aen ní, nír'marbadh 'sin aimsir si i n-Erinn in coimlín do marbadh ann do macaibh righ & taisech & do dainibh ímdha aili osin amach.Ruaidhri mac Donnchadha mic Eogain h-Ui Concobuir, do righadh do Connachtaibh.

U1313.3

Sluagh le h-Uilliam Burc i Sil Muiredhaigh. O Concobuir & Connachta do dhenum sitha, acht Mac Diarmata. Techt do Mac Uilliam i Magh Luirg. Crecha mora do thabairt leó o Ath in Chip & o Uachtar Thire & in tir uile do loscadh & do mhilliudh doibh. Imtecht doibh astir amach iar sin. In Ruaidhri cetna do athrighadh le Mac Diarmata iar sin.

U1313.4

Derborgaill ingen Maghnusa h-Ui Concobuir, d'eg.

Year U1314

U1314.0

Kal. Ian. uii. f., l. x.u., Anno Domini M.ccc.x.iiii.1317

U1314.1

Toirrdelbach mac Aedha mic Eoghain, do righadh le Connachta.

U1314.2

Roibeat a Briuis, ri Alban, do thecht a n-Erinn maille re galloglachaibh imdhaibh i furtacht Edubaird, a brathar fein, do dhichur Gall a h-Erinn.

U1314.3

Mailir d'Eisetra, tigherna Atha Lethain, do marbadh le


p.430

Cathal mac Domnaill h-Ui Concobuir, ar bord Droma Cliabh & Domnall mac Taidhg mic Domnaill Irrais, do marbadh ann & ceithri fir déc aili.

U1314.4

Caislen Atha Cliath in Choraind do brisiudh.

U1314.5

Donnchadh h-Ua {MS folio/column 68rb}Briain, ri Muman, occissus est.

U1314.6

Conchobhur Buidhe Mag Tighernan, taisech Tellaigh Dunchadha, occisus est immaidm Cille Móire & Mathgamain Mag Tighernan & in Gilla Ruadh, mac in aircinnigh & moran aile d'a ciniudh & Nícol Mac in Mhaighistir & moran d'a aicme.

U1314.7

Maidm Cille Moire ar mac Ruaidhri n-Galloglach & ar feraibh Breifne & ar Mhuinntir Peodacan, du inar'thuit moran do dhainibh.

U1314.8

Mael Isu Ruadh Mac Aedhugan d'eg.

U1314.9

Raghnall Mag Raghnaill do ghabhail & Seffraigh Mhag Raghnaill, taisech do denum dhe.

U1314.10

Gorta mor isin bliadhain si.

Year U1315

U1315.0

Kal. Ian. i. f., l. xx.ui. Anno Domini M.ccc.x.u.1318

U1315.1

Maidm i n-Elibh ar Gallaibh leis O Cerbhaill, dú ar'marbadh Adam Maireis & Goill imda eile.

U1315.2

Sluagh mor do tinol le Maelruanaig Mac n-Diarmata & is iat so: idon, Toirrdelbach O Concobuir, ri Connacht & Concobur O Ceallaigh, ri O Maine & Ualgharc O Ruairc, rí Breifne & Tomaltach Mac Donnchaidh, tigherna Thire h-Oilella, d'innsaighidh Cathail mic Domhnaill, co Fásadh Coille. Ocus targad Cathal comhadha mora do Mac Diarmata do cinn gan teacht chuigi don toisc sin.


p.432

Ocus nír'gabadh uadha, gur'innsaighedur na sochraidheadha sin co lar a longpuirt & nír'time & nir'theichedh do Cathal im in toisc sin. Innsaighis Cathal asna tighibh amach & cumuscit ar a cheile. Acht en ní, marbthar Conchobhur O Ceallaigh, ri O Maine & Brian mac Toirrdhelbaigh Ui Conchobhuir, adhbur righ Connacht & daine imdha aili, eter mharbhadh & leathadh. Cathal cetna d'innsaighidh Connacht & do h-athrighadh Toirrdelbach O Concobhuir. Ocus do ghabh Cathal righe Connacht & do roine crecha mora ar Mac n-Diarmata.

U1315.3

Seán mac Domnaill h-Ui Neill, do marbadh le h-Aedh O n-Domnaill.

U1315.4

Ricard a Clara do marbadh.

U1315.5

Edubhard a Briuis, fear millti Erenn co coitcenn, eter Ghallaibh & Ghaidhelaibh, do marbadh le Gallaibh Erenn tre nert cathaighthi ag Dun Dealgan. Ocus do marbadh 'n-a fhocair Mac Ruaidhri, ri Innsi Gall & Mac Domnaill, ri Aerther Ghaidhel, mar aen re h-ár na n-Albanach uime. Ocus ni dernadh o thus domain gnim budh ferr d'Eirinncaibh ina'n gnimh sin. Uair tainic gorta & dith daine re a linn a n-Erinn uile {MS folio/column 68va}co coitchenn re h-eadh tri m-bliadhan co leth & do ithdis na daine a cheile gan amurus ar fut Erenn.

U1315.6

Seffraigh h-Ua Fergail, taisech na h-Anghaile, quieuit in Christo .

U1315.7

Snechta mhor isin bliadhain sin.

U1315.8

Seann O Ferghail do marbadh d'aen urchur soighde.


p.434

Year U1316

U1316.0

Kal. Ian. ii. f., l. uii., Anno Domini M.ccc.x.ui.1319

U1316.1

Enri Mac in Crosain, espuc Ratha Both, in Christo quieuit. Tomas mac Carmaic h-Ui Domnaill, abb Essa Ruaidh, do thoghadh cum espucoide Ratha Both.

U1316.2

Espuc Doire in Christo quieuit.

U1316.3

Espuc Clochair in Christo quieuit.

U1316.4

Espuc Cluana Ferta Brenaínn quieuit in Christo.

U1316.5

Aine ingen Mic Diarmata, ben Mic ConShnama, quieuit in Christo.

U1316.6

Tomaltach O Mael Brenainn & Echmarcach Mac Branain, taisech Corco Achlann, do marbadh a cheile.

U1316.7

O Banan, espuc Oirgiall, d'eg.

U1316.8

Brian mac Domnaill h-Ui Neill, do marbadh le Clainn Aedha Buidhe.

Year U1317

U1317.0

Kal. Ian. iii. f., l. x.uiii., Anno Domini M.ccc.x.uii.1320

U1317.1

Coínne mór eter Cathal O Conchobuir & Maelruanaigh Mac Diarmata: sith do dhenum doibh & tainic Mac Diarmata astir iar sin. Feall do dhenum do'n Cathal cetna ar Mac n-Diarmata i Mullach Dorabruch & a gabhail ann & Graine ingen Mic Maghnusa, a ben, do gabail 'sin lo cetna i port Calad na Cairgi. Ocus do lomairged in tire uile. Ocus fos do gahadh Mael Isu Donn Mac Aedhagan & a mac & Tomaltach


p.436

Mac Donnchaidh, tigerna Tire h-Oilella & fuaradur moran d'ulc.

U1317.2

Mor ingen Ui Baighill, ben h-Ui Fergail, d'ec.

U1317.3

Mathgamhain, tanusti O Briain, quieuit in Christo.

Year U1318

U1318.0

Kal. Ian. u. f., l. xx.ix., Anno Domini M.ccc.x.uiii.1321

U1318.1

Graine ingen Mic Maghnusa, banrighan Muighi Luirg, ben Maelruanaigh Mic Diarmata, d'eg.

U1318.2

Ruaidhri mac Donnchadha, ri Connacht, do marbadh le Cathal mac Aedha h-Ui Concobuir.

U1318.3

Carracc Locha Cé do leagadh le Cathal O Conchobuir.

U1318.4

Maghnus O h-Anluaín do dhalladh la Níall O n-Anluain.

U1318.5

Niall O h-Anluain, ri Oirr{MS folio/column 68vb}ther, do marbadh do Ghallaibh Duin Dealgan í mebhail.

U1318.6

Maidm mor do thabairt do Andriú Mac Fheorais & do Gallaibh na Midhe ar macaibh righ O Failghi.

U1318.7

Bodith mor ar fut Erenn uile co coitchenn.

Year U1319

U1319.0

Kal. Ian. ui. f., l. x., Anno Domini M.ccc.x.ix.1322

U1319.1

Cogadh mór eter Saxan & a Iarladha.

U1319.2

Matha O h-Eothaigh, espuc Ard Achadh, quieuit in Christo.

U1319.3

Murchadh O Ferghail, thaisech na h-Anghaile, do marbadh le Seoan O Ferghail, le mac a derbrathar. Muircertach h-Ua Ferghail do marbadh le a brathair fein fos 'sin lo cetna.

U1319.4

Donnchadh mac Donnchadha Mic Diarmata, quieuit in Christo.

U1319.5

Gillibert O Ceallaigh, ri O Maine, d'eg (i Noin Auguist).

U1319.6

Enri Mac Gilli Fhinnein,


p.438

taisech Muínnteri Peodachan, do marhadh do clainn Amlaim Meg Uidhir.

U1319.7

Barun Mac Feorais d'eg.

U1319.8

Uilliam Liath, mac Uilliam Móir, do ecc.