Corpus of Electronic Texts Edition
The Annals of Ulster (Author: [unknown])

Year U1197

U1197.0

Kal. Ian. iiii. f., l. ix., Anno Domini M.c.xc.uii.

U1197.1

Sluaghadh la h-Eoan Do Chuirt co n-Gallaibh Uladh co h-Ess Craibhe, co n-dernsat caistel Cille Santan, cor falmaichedh tricha ced Ciannacht doibh. Isin caistel-sin imorro ro fagadh Roitsel Phitun co sochraiti 'maille fris. Táinic dono Roitsel Phitun ar creich co Port Daire, co ro airc Cluain Í & Enach & Derc Bruach. Ruc imorro Flaithbertach O Mael Doraidh .i., ri Conaill & Eogain co n-uathadh do Chonall & d'Eogan forro, co tucsat maidm ar traigh na h-Uathcongbala


p.226

forro, co ro marbadh a n-ar ann .i., 'mo mac Ardgail h-Ui Lochlainn, tre mirbail Coluim Cille & Cainnich & Brecan ro airgsetar ann.

U1197.2

Mac Gilla{folio & column MS1 55c} Eidich do Chiannachtaibh do shlat altara tempoill moir Dhaire Coluim Cille & do breith ceithri corn is fherr do boi i n-Erind eisti, .i., ím Mac Riabhach & ím Mac Solus & ím Corn h-Ui Mael Doraidh & im Cam Coraind & im Corn h-Ui Dochartaich. Ro bris imorro & tall a n-innmusa & a lasa dibh. Frith imorro isin tres loa iarna n-gait na seoit & íntí ro gat. Ocus ro crochadh é (.i., ic Crois na Riag) i n-einech Coluim Cille, 'sa h-altoir ro saraighedh ann.

U1197.3

Concobur O Cathan do éc.

{folio & column MS2 57b}

U1197.4

Flaithbertach h-Ua Mael Doraidh, .i., ri Conaill is Eogain is Airgiall is cosnumaich Temhrach & ridamna Erenn uile: .i., Conall ar loechdacht, Cu Culaind ar ghaiscedh, Guaire ar eínech, Mac Lughach ar oglachus, a éc iar treblait thogaidhe i n-Inis Saimer, i quart Noin Febrai, isin trichatmadh bliadhain a fhlaithusa & isin nomadh bliadhain ar coicait a aisi. Ocus ro adhnacht a n-Druim Tuamha co h-onorach. Ocus gabais Echmarcach h-Ua Dochartaich righi Ceneoil Conaill fo cetoir & ni raibe acht caicthigis i righi, in tan tainig h-Eoan do Cuirt co sochraide moir


p.228

'maille fris tar Tuaim h-i Tir n-Eogain. Asseich co h-Ard Sratha; iar sin, timceall co Daire Coluim Cille co rabadar coic oidhche and. Imthighit imorro co Cnoc Nascain da n-imachur thairis. Tegait dono Cenel Conaill im Echmarcach h-Ua n-Dochartaich dia n-innsaighidh & do-ratsat cath doibh, du in ro marbadh da cet dibh, im a righ, .i., im Echmarcach & im Donnchadh h-Ua Taircert, .i., rig-thoisech Clainni Sneidhghile, .i., cuing einigh & eghnuma & comuirle Ceneoil Conaill uile & im Gilla m-Brighti h-Ua n-Dochartaich & im Mac Dubhan & im Mag Ferghail & im macaibh h-Ui m-Baighill et alios nobiles. Ocus ro airgset Inís n-Eogain & do-ratsat boroma mór eisti.

U1197.5

Concobar, mac mic Taidhg, Mhuighi Luirg & Muighi Ai, tuir ordáin & airechais, enich & comairchi Connacht uile, a éc iar n-aithrighi togaidhi i Mainistir Atha Do Laarc.

U1197.6

Mac Craith h-Ua Fhlaithbertaich, mac righ Tire Eogain, do marbadh & Mael Ruanaigh O Fercomais no O Cairellan, ard-toisech Clainni Diarmata, do marbadh & da marcach maithi da muinntir do marbadh.