Corpus of Electronic Texts Edition
The Annals of Ulster (Author: [unknown])

Year U1188

U1188.0

Kal. Ian. ui. f., l. xx. ix., Anno Domini M.c.lxxx.uiii.

U1188.1

Ruaidhri h-Ua Canannan, rí Ceneoil Conaill ri h-edh & rídomna Erenn, do marbadh do Fhlaithbertach h-Ua Mael Doraidh tria mebail ic Drochat Slicighi, iarna brecadh do lar Droma Cliabh imach & brathair dó do marbadh imaille ris & drem da mhuinntir. h-Ua Gairb .i., Magnus, toisech Fer Droma, ro imir lamha ar h-Ua Canannan, do marbad do mhuinntir Echmarcaigh h-Ui Dochartaigh i n-dighail h-Ui Chanannan.

U1188.2

Domhnall h-Ua Canannan do letradh a choisi dia tuaigh féin i n-Daire ig gaít asclainne connaidh & a éc de tria mírbail Coluim Cille.

U1188.3

Martain h-Ua Brolaigh, ard-ecnaidh Goeidhel uile & ard-fher leiginn Aird Macha, do éc.

U1188.4

Amhlaim h-Ua Daighri do tocht co h-I da ailithri & a éc i n-h-I iar n-aithrighi toghaidhi.

U1188.5

Gaill caisteoil Maighi Coba & drem d'Uib Echach Uladh do thaidhecht ar creich h-i Tir n-Eogain, co torrachtadar co Léim Mic Neill & co ro gabsat bú andsin & co n-dechaidh Domnall h-Ua Lochlainn 'na n-degaidh & lucht a comhronna fein, co ruc forra i Cabhan na Crann Ard, co tardsat debhaidh & co romaidh ar na Gallaibh & co ro cuiredh a n-ár and & co tardadh sadhadh do ghall-ghai isin rígh a aenor, co torchair annsin i frithguin, .i., Domnall, mac Aedha h-Ui Lochlainn, rí Ailigh & ridamhna Erenn ar cruth & ar cheill & ar taighedhus & ar trebaire. Ocus rucadh in la-sin fein co h-Ard Macha & ro h-adhnaicedh ann co h-onorach.

U1188.6

Sluaghadh la h-Eoan Do Chúirt & la Gallaibh Erenn uile i Connachtaibh imaille re Concobur h-Ua n-Diarmata.

p.214

Tinoilidh Concobhar{folio & column MS1 54d} Maenmaighi .i., ri Connacht Connachta & tic Domnall h-Ua Briain, rí Muman, co dréim d'feraibh Muman i sochraiti righ Connacht. Acus loiscit ní do chellaibh in tire rempu & ní ro leicset scoiliudh doibh. Im-chloeit imurro na Gaill aniar co h-Es Dara do thuidhecht i Tir Conaill. O 't-cualatur imurro na Gaill Cenel Conaill{folio & column MS2 56c} & h-Ua Mael Doraidh do bith ic Druim Cliabh, ro loiscset Eas Dara do leir & ím-cloit aris i Connachtaibh & tecait isin Segdais & atn-aghait Connachta & Fir Muman ammus forru & marbait a n-ár & facbait na Gaill in tir ar eicin can a becc do gleudh.

U1188.7

Etaín, ingen h-Ui Cuinn, righan Muman, do bai 'ca h-ailithri ic Daire, do éc iar m-buaidh o domon & o dhemhan.

U1188.8

{§LATE} Muirchertach, mac Uathu, h-Ua Choncheanaind, ri h-Ua n-Dhiarmata, mortuus est.

U1188.9

Domnall, mac Lochlaind h-U Mhaeil Ruanaidh & Fearghal h-Ua Taidhg in Teghlaigh & Flaithbertach, mac Riucca, h-Ua Fhínnachta, occisi sunt.

U1188.10

Muirchertach h-Ua Brain, ri Breghmhuine, occisus est.

U1188.11

h-Ua Mail Ruanaidh occisus est Anno Domini 1188.§