Corpus of Electronic Texts Edition
The Annals of Ulster (Author: [unknown])

Year U1178

U1178.0

Kal. Ian. i. f., l. ix., Anno Domini M.c.lxx.uiii. Idon, cet bliadhain noidecta.

U1178.1

Concobur, mac Conallaigh h-Ui Luinigh, do ghabhail toisighechta{folio & column MS1 53b} Ceniuil Maien & Domnall, mac Domnaill h-Ui Gailmredaigh, do innarba a Muigh h-Itha i n-Inis n-Eogain docum Donnchadha h-Ui Duib Dirma. Cenel Maien imurro isin bliadhain cetna, .i., i cinn oen raithi, do dhenamh athtoisigh do mac Conallaigh & do tabairt toisighechta do Domnall, mac Domnaill.

U1178.2

Muinnter Domnaill h-Ui Gailmredaigh, .i., mac Gille Caich h-Ua n-Eiderla & h-Ua Fhlannacain, do marbadh mic Conallaigh h-Ui Luinigh, ar lar tighi Domnaill h-Ui Gailmredhaich, i mebhail & h-airchinnech na h-Ernaidhe maroen ris ic a chomairce. Athtoisech dono do dhenum do Domnall h-Ua Gailmredaigh & Cenel Maien do thabairt toisighechta do Ruaidhri h-Ua Fhlaithbertaigh. Mebol imurro do dhenum do tri macaibh h-Ui Fhlaithbertaigh for Cenel Moen & do Clainn Domnaill archena. Domnall dono, mac Domnaill h-Ui Gailmredaigh, do marbadh innti-sidhe & Tigernan, mac Raghnaill mic Domnaill & ochtur lan-biatach do maithibh Ceneoil Moen maroen riu.

U1178.3

Raghnall,

p.192

mac Echmarcaigh h-Ui Chathan, do marbadh do Cenel Maian i tosach in t-samhraidh-sin. Conad i n-a dighail-sidhe do-rochair Galach h-Ua Luinnigh & Muircertach h-Ua Peatan & is 'na dighail do-ronadh mebol Clainni Domhnaill, for Cenel Moen.

U1178.4

Isin bliadhain-sin dono tainic mor-gaith adhbuil, co ro trascair blodh dermair do chailltibh & do fhidhbadhaibh & do railghibh dímhóraibh for lár & for lan-talmain. Ro trascair dono se fichit ralach, uel paulo plus, i n-Daire Coluim Cille.

U1178.5

Is innti-sin dono táinic h-Eoan cona ritiribh o Dhun ar crechadh co Machaire Conaille, co n-dernsat airgthi ann & co rabatur aidhchi i l-longport i n-Glind{folio & column MS2 55b} Righi. Táinic imurro Murchadh h-Ua Cerbhaill, rí Airghiall & Mac Duinn Sleibhe, ri Uladh, cu n-Ulltaibh cucu in aidhche-sin & tucsat taelcadh doibh. Ro mebaidh dono for Gallaibh & ro cuiredh derg-ár forru. Táinic dono in t-Seoan cetna ar crechaibh i n-Dal n-Araidhe & i nh-Uibh Tuirtri. Tuc dano Cu Midhe h-Ua Flaind, ri h-Ua Tuirtri & Fer Lí tailcath doibh. Ro maidh dono in cath sin for Gallaibh & ro cuiredh a n-ár.

U1178.6

{§LATE} Ammus Cualgní la h-Ulta & la Galla for Sean do Cuirti.§

U1178.7

Gilla Crist h-Ua h-Eodhaigh, episcopus Conmhaicne, quieuit.

U1178.8

Amhlaibh h-Ua Domnallan, ollam Connacht, quieuit.)

p.194