Corpus of Electronic Texts Edition
The Annals of Ulster (Author: [unknown])

Year U1176

U1176.0

Kal. Ian. u., f., l. x. ui., Anno Domini M.c.lxx.ui.

U1176.1

Saxain do innarba do Domnall h-Ua Briain a Luimniuch{folio & column MS2 54c} tre fhorbaisi do denum forru.

U1176.2

Bean Midhe, ingen Donnchadha h-Ui Cerbaill, ben Con Maighi h-Ui Fhlainn, rigan h-Ua Tuirtrí & Fer Lí, do éc.

U1176.3

Ingen Ruaidhri h-Ui Conchobhair, ben Fhlaithbertaigh{folio & column MS1 52d} h-Ui Mael Doraidh, do marbadh do macaibh h-Ui Cairellan.

U1176.4

Fabor & Cenannus do fhasughadh do Ghallaibh & do h-Uib Briuin.

U1176.5

Niall, mac Mic Lochlainn, do marbadh do Muinnter Branain.

U1176.6

Lughmadh do fhasughadh do na Saxaibh.

U1176.7

Caistel Gall 'ga dhenamh i Cenannus.

U1176.8

In t-


p.184

Iarla Saxanach do éc i n-Ath Cliath do bainne aillsi ro gab ar a chois tria mírbuilibh Brighti & Coluim Cille & na noemh archena, isa cella ro mhill.

U1176.9

Caistel Slaine i raibe Ricard Fléimenn cona sluagh, as a rabhus ic milliudh Airgiall & h-Ua m-Briuin & Fer Mídhe, do milliudh la Mael Sechlainn, mac Mic Lochlainn, la righ Ceneoil Eogain & la Cenel n-Eogain budhein & la h-Airghiallaib, dú in ro marbadh cet, no ní is moo, do Ghallaibh, re taebh ban & lenum & ech in chaisteoil do marbadh, cona térna duine i m-bethaidh asin caistel. Ocus ro fasaighti tri caisteoil i Midhe iarnabarach ar uamhan Ceniuil Eogain, .i., caistel Cenannsa & caistel Calatruma & caistel Daire Phatraic.

U1176.10

Cu Maighe h-Ua Flainn, h-Ua Turtri & Fer Lí & Dal Araide, do marbadh do Coin Midhe, d'a brathair fein & do Feraibh Lí. {§LATE}

U1176.11

Diarmoid, mac Cormaic Mheg Carrthaigh, ri Deasmhughan, do gabail la a mac fein, .i., la Cormac Liathan. §