Kal. Ian. ii. f., l. x. iii., Anno Domini M.c.lxx.iii.
Cinaeth h-Ua Ronain, espuc Glinne Da Locha, do cumsanad co sithamhail.
Muiredach h-Ua Cobhthaigh, espoc Ceneoil Eogain & Tuaisceirt Erenn uile, in mac óge & in lec loghmur & in gem gloine & in retlu solusta & cisti taiscedha ind ecnai & croebh cnuasaigh na Canoine & topur na derce & na cennsa & na h-ailgeine & in coluim ar gloine craidhe & in tuirtuir ar ennga & in noemh De eter doinibh, iar n-ordnedh do shacart & deochaine & oesa cecha graidh archena,—.i., sechtmogha sacart, & iar n-athnughadh eclus n-imdha & iar coisecrad tempall & reilec & iar n-denum mainistrech & reicles n-imda & cecha lubhrai eclustactai archena & iar tidhnucul biidh & etaigh do bochtaibh, iar m-buaidh crabadh & oilithri & aithrighe, ro fhaidh a spirut dochum nime i n-Dubreicles Coluim Cille i n-Daire, i quart Id Febrai, in septima feria. Do-ronadh dono mirbuil mor isin aidhche ad-bath,—in adhaigh do solustughudh o ta iarmeirghi co gairm in coiligh & in doman uile for lasadh & coer mor
Etrú h-Ua Míadhachain, espuc Cluana, in bona senectute quieuit.
Crech mor la Aedh Mac Oengusa & la Clainn Aedha, co ro aircset Trian Mor i n-Ard Macha. Ocus ro marbadh in fer-sin i cind tri mis, iar n-arcain Aird Macha do.
{§LATE} Domnall Bregach h-Ua Mailechlainn, ri Midhe, obiit.
Mael Mochta h-Ua Fiadbra no, h-Ua Mailechlainn, abb Cluana Mac Nois, quieuit.
Mael Isu Mac in Baird, epscop Cluana Ferta Brenaind, quieuit.
Imar, mac MicCargamna toisech Muintire Mail Shinna, moritur. §