Corpus of Electronic Texts Edition
The Annals of Ulster (Author: [unknown])

Year U1171

U1171.0

Kal. Ian. ui. f., l. xx. i., Anno Domini M.c.lxx.i.

U1171.1

Diarmait Mac Murchadha, rí Coicidh Laighen, iar milledh ceall n-imdha & tuath, do éc i Ferna, cen ongadh, cen Corp Crist, cen aithrighi, cen timna, i n-einech Coluim Cille & Finnein & na naem archena, isa cella ro mhíll.

U1171.2

Ascall, mac Torcaill, ri Atha

p.168

Cliath & Eoan Mear a h-Innsibh Orc tainic a fortacht Ascaill & Ghall Atha Cliath do marbadh do na Gallaibh cetna.

U1171.3

Domnall h-Ua Fócarta, rí Eile Deiscirt, do marbadh la Osraighibh.

U1171.4

Sadhbh, ingen Gluin Iairnn Mic Murchadha, comarba Brighte, do ec i n-aithrighe.

U1171.5

Crech mór la Magnus Mac Duinn Sleibhe co n-Ulltaibh uile i Cuil in Tuaisceirt, co ro airgset Cuil Rathain & cealla aile, co rucsat uatadh bec do Chenel Eogain forro, im Conchobur Ua Cathan & co tucsat cliathadh & co ro marbsat fer ar fichit, eter toisechu & macu toisech & sochaidhe aile maille friu & ro gonadh Maghnus féin. Ocus in Maghnus-sin dono,{folio & column MS2 53d} do marbadh gairit iartain do Dunn Sleibhe, .i., da derbrathair féin & do Gilla Oenghusa Mac Gilla Espuic, .i., do rectaire Monach, i n-Dun, iar n-olcaibh moraibh imdhaibh do dhenum dó: .i., iar lecudh a mhná posta fein & iar m-breith a mhná o aiti, .i., o Choin Maighi h-Ua Fhlainn & si ac a derbrathair fein ar tús, .i., ic Aedh; iar tabairt eicin do dono for mnai a derbrathar aile, .i., Eochadha; iar sarughudh cloc & bachall, cleirech & cell. Donn Sleibhe do ghabail righi ina degaidh.

U1171.6

Ane, ingen Mic Duinn Sleibhe, righan Oirghiall, do éc.

U1171.7

Maidm .i., maidm in luaithredh for Tigernan h-Ua Ruairc & for Feraibh Midhe & ar Feraibh Fernmuighi imalle ar faichti Atha Cliath ria Milo de Cocan cona muinnter, dú i torchair sochaidhe

p.170

mór, im Aedh h-Ua Ruairc, rí Machaire Gaileng & ridomna h-Ua Briuin & Conmaicne. Ro marbtha dono ann cóic toisighe do Feraibh Fernmhuighe, .i., Mael Mochta Mac Con Fhebla & Conchobhur, a derbrathair, da thoisech Cheneoil Feradhaigh.

U1171.8

Fénidh h-Ua Conghaile, cainnel gaiscidh & einigh Oirghiall, mortuus est.

U1171.9

Raghnall h-Ua Tuathchair, toisech Clainni Ruadhrach; Gilla Geímridh Mac in Ghaband, toisech Fer Darcacha & sochaidhe aile maille friu, non longe post supradicta, decimo sexto Kalendas Nouembris mortui sunt.

{folio & column MS1 52a}

U1171.10

Uenit in Hiberniam Henricus mac na Peirisi, potentissimus rex Angliae et idem Dux Normannie et Aquitanie et comes Andegauue et aliarum multarum terrarum dominus, cum ducentis quadraginta nauibus. Comadh esin primus aduentus Shaxanach in Hiberniam. Ocus tainic h-i tir oc Purt Largi & ro gabh giallu Muman. Tanic iar sein co h-Ath Cliath & ro gabh giallu Laighen & Fer Midhe & h-Ua m-Briuin & Airgiall & Uladh.

U1171.11

Petrus h-Ua Mordha, episcopus h-Ua Maine Connacht no, espuc Cluana Ferta Brenaind, manach craibhdech & fer aughtordha, do badhudh isin t-Sinaind .i., ic Purt da Chaíneg, id est, sexto Kalendas Ianuarii.

U1171.12

{§LATE} Tomas Cantuarensis martirizatur.

U1171.13

Domnall h-Ua Mail Muaid, ri Fer Cell, occisus est.

U1171.14

Mael Cron Mac Gilli Sechnaill, ri Deisceirt Bregh, moritur.§

p.172