Kal. Ian. i. f., l. u., Anno Domini M.c.l.ui.
Tairrdelbach h-Ua Concobuir, airdrí Connacht, tuir ordain & oirechuis Erenn uile ar gaiscedh & tidhnacul sét & maine do laechaibh & do cleircibh, in pace quieuit.
Sluaghadh la Muircertach h-Ua Lochlainn i n-Ulltaibh, co tuc braighdi fri a reir. Ocus is for an sluaghadh-sin dano ro marbadh h-Ua h-Inneirghi for scéimledh.
Aedh h-Ua Canannan, rí Ceniuil Conaill, do marbadh la h-Ua Cathan & la Feraibh na Craibhe.
Sluaghadh aile dano la h-Ua Lachlaind co n-Deiscert m-Bregh, co tuc braighde Laighen o Mac Murchadha tar cenn a coicidh uile. Do-cuadur iar sein Cenel n-Eogain & Airghiallu i n-Osraighibh, co riachtadur Clar Dhaire Móir, co tangadur maithi Osraighi hi tech h-Ui Lachlainn.
Meass mor isin bliadhain-si fo Erinn uile. Noi m-bliadhna o'n mhes mor aili gusan bliadhain-si.