Kl. Ianair iii f. l. uii. Anno Domini m.c.xx.ix.
Mac Maras H. Rebochan airchinnech Lis Moir Mo Cutu.
Gilla Mo Chonna H. Duib Dirma do marbadh do Ulltaibh i n-Inis Taiti.
Ceallach comarba Patraic mac óghe & aird-espoc Iarthair Eorpa & oein-chenn ro riaraighsetur Goidhil & Gaill laich & cleirich iar n-oirdnedh dano espoc & shacart & ais gacha graidh archena & iar coisecradh tempall & reilgedh n-imdha iar tidhnacal seot & moeine & iar n-arail riaghla & sobhesa for cach eter tuaith & eclais iar m-bethaigh celeburtaigh aiffrennaigh oentigh ernaigthidh iar n-ongadh & aithrighi thoghaidhe ro fhaidh a anmain a n-ucht aingel & archaingel i n-Ard Patraic isin Mumain i Kl. April in secunda feria & isin cethramadh bliadhain fichit a abdaine & isin coecatmad bliadhain a aisi. Rucadh tra a chorp h-i .iii. Non. April co Les Mór Mo Chutu do reir a timna fadhein & ro frithairedh co salmaibh & ymnaibh & canntaicibh & ro h-adhnaicedh co h-onórach i n-ailaidh na n-espoc i Prid. Non. April. in u. feria. Muircertach m Domnaill do oirdnedh i comurbus Patraic in Non. April.
Teach Coluim Cille i Cill Mc. n-Enain do ghabail d'Ó Thaircert for Aedh m. Cathbairr U Domnaill{folio & column MS2 50vb} & a loscadh dó.
Caistel Atha Luain do dhenamh la Tairrdhelbach H. Conchobair.
Gilla Crist m. m. Uidhrin toisech Ceniuil Feradhaigh do loscadh a tigh a altrann h-i Tir Manach i mebhail.
Niall H. Crichan ri H. Fiacrach Arda Sratha do marbadh d'Uib Cennetigh.