Corpus of Electronic Texts Edition
The Annals of Ulster (Author: [unknown])

Year U1127

U1127.0

Kl. Ianair uii f. l. x.u. Anno Domini m.c.xx.uii.

U1127.1

Sluagadh la Tairrdelbach H. Concobuir i n-Desmumain co roacht Corcaigh Moir Muman co tuc giallu Muman co leir.

U1127.2

Airthir do ghabail taighi Flainn m Sinaigh i Triun Saxan for Raghnall m m Riabaigh aidhci Luain Inite & a dichennadh leó.

U1127.3

Cath eter Ultu fadhein i torcradur da righ Uladh. .i. Niall m. Duinn Shleibhe & ár Uladh ime & Eochaidh H. Mathgamna i frithghuin.

U1127.4

Gilla Crist H. h-Eicnigh ri Fer Manach & airdrigh Airgiall do éc i Clochar m n-Daimin iar n-aithrigi thoghaidhe.

U1127.5

Fir Muman & Laigen do impodh doriisi for Thairrdhelbach H. Conchobuir & a n-geill do dhilsiughadh doibh & a mac d'aithrighadh do Laighnibh & do Ghallaibh; araide do-rat-sum ri aile forro .i. Domnall m. m. Fhaelain.

U1127.6

Cearball m. m. Fhaelain & ár H. Faelain ime do thuitim la h-Uibh Failghi for lar Cille Dara i cosnum comorbuis Brigte.

U1127.7

Tailltiu ingen Murchadha H. Mael Sechlainn ben Tairrdhelbaigh H. Concobuir d'éc.

U1127.8

Mael Brigte H. Forannan airchinnech Arda Sratha, Mael Brighte H. Cinaetha airchinnech Airde Trea in bona penetencia mortui sunt.

U1127.9

Gilla Crist H. Mael Eoin comarba Ciarain Cluana M. Nois sonus & sobarthu airchinnech chell n-Erenn in Christo quiéuit.