Kl. Ianair u f. l. xx.iii. Anno Domini m.c.xx.u.
Quint. Id. Ianair imorro for oen diden & prim fuirri & is innti tuargbadh a buinde diden for in dam liac mor Aird Macha iarna lan-ecor do shlinntiuch la Cellach comarba Patraic isin trichadmadh bliadhain ar cet o na rabhai slinntiuch fair co comlan.
Gilla Braiti H. Ruairc do bathudh i l-Loch Aillinne.
Sluagadh la Tairrdelbach H. Concobuir i Midhe coro innarb Murchadh H. Mael Sechlainn as a righi ocus co tarat tri righa for feru Midhe. Marbais imorro Domnall m. Murchadha in tres righ ria cinn nómhaidhe .i. Mael Sechlainn mac Donnchadha.
Crech do-chuaidh Muircertach H. Cerbaill ri Deiscirt Fernmhuighi i feraibh Bregh conus-taraidh Diarmaid H. Mael Sechlainn co feraibh Midhe & co feraibh Bregh co ro marbadh Muircertach ann & ár a creiche ime.