Corpus of Electronic Texts Edition
The Annals of Ulster (Author: [unknown])

Year U1121

U1121.0

Kl. Ianair uii f. l. ix. Anno Domini m.c.xx.i.

U1121.1

Domnall m. Ardghair m. Lochlainn ardri Erenn derscaithech Goeidhel ar cruth & cenel ar ceill & gaiscedh ar shonus & sobarthain ar thidnacal seoit & bidh do éc a n-Dairi Coluim Cille isin .uiii. bliadhain .xxx. regni sui isin .iii. bliadhain imorro .lxx. aetatis suae & i n-aidche Cetaine & i .v. {folio & column MS2 49ra} Id. Febre & in uiii déc & i feil Mo Chuaroc ind Ecnai.

U1121.2

Cu Maighi m. Deoraidh H. Fhlaind ri Derlais do badhudh i l-Loch Echach iar n-gabail Innsi Dar Carcrenn fair d'Uibh Echach du i torchair coicer ar .xl.

U1121.3

Gilla Espoic Eogain H. Aindiaraidh ri Cianachta do marbadh dia braithribh for lar reilgi Bennchair.

U1121.4

Sluagadh la Tairrdelbach H. Conchobuir & la coicedh Conacht i n-Desmumain co ro innresetar otá Magh Feimin co Traigh Li eter thuatha & chealla .i. .lxx. ceall uel paulo plus.

U1121.5

Creach-sluagadh la Tairrdelbach H. Conchobair bhes i n-Desmumain co roacht termonn Lis Mhoir & co taraidh boroma diarmhe & co fargaib Muiredhach H. Flaithbertaigh ri Iarthair Conacht & Aedh H. n-Eidhin ri H. Fiacrach.


p.566

U1121.6

Cloicthech Telcha Innmuinn i n-Osraigibh do dluighi do chair theinedh; cloch do sgeinm as co ro marbh m. leighind isin chill.

U1121.7

Samual H. Angli espoc Atha Cliath in pace quieuit. Ceallach comarba Patraic do ghabail epscopoiti Atha Cliath a togha Gall & Gaeidhel.

U1121.8

Da sreith Trin Mhasan o dhorus Ratha co Crois m-Brigte do loscadh.

U1121.9

Athach goithi do thiachtain in Non. Decimbir co ro la a benncopor do chloicthiuch Aird Macha & co n-derna fidh-ar mor fo Erinn uile.