Kl. Ianair ui. f. l. ii. Anno Domini m.c.x.u.
Doinenn dermair reoidh & snechta on coicid .x. Kl. Enair co coicid .x. Kl. Marta uel paulo plus coro la ar en & cethrai & daine dia ro fhass tercai mor fo Erinn uile & i l-Laighnibh seoch cach.
Diarmait H. Briain ri Muman do ergabail la Muircertach H. m-Briain.
Esce do thabairt do macaibh m. Aedha m. Ruaidhri im Thairrdelbach H. Concobair im righ Connacht .i. i n-Ath Bo co ro loitset & coro chrolighi dó.
Maidm ria n-Domnall H. m-Briain & ria Gallaibh Atha Cliath for Laighnibh i torchair Donnchadh H. Mail na m-Bo ri H. Ceinnselaigh
MS 1 breaks off here; text supplied from MS 2.
{folio & column 48rb} & Conchobur H. Concobuir ri H. Failghi cona macaibh & sochaidhi archena.Domnall m. Taidhg H. Briain ridomna Muman do marbadh do Connachtaibh.
Muircertach H. Briain do ghabail a righi doriisi & do thiachtain sluaighedh i l-Laighnibh & i m-Breghaibh.
Damh liacc Arda Brecan cona lan do doinibh do loscadh do feraibh Muman & cealla imdha archena i feraibh Bregh.
Crech mhór la Tairrdhealbach H. Conchobuir & la Connachtaibh co ro airgset co Luimnech .i. Tuathmuma co rucsat borroma diairmhidhe & brait imdha.
Mael Sechlainn H. Mael Sechlainn ridomna Temhrach occisus est.