Kl. Ianair iiii. f. l. x. Anno Domini m.c.x.iii.
Connla H. Flainn comarba Mo Laise Lethglinne quieuit.
Caer teinedh do thiachtain aidche fheil Patraic for Cruachan Aighle co ro mhill .xxx. dond oes troisci.
Diarmait H. Ceallaigh{folio & column MS1 64va} comarba h-U Suanaigh, Diarmait H. Longan maer Muman i n-aidchi feile Padraig, Mael Sechlainn H. Concobair ri Corco Mruat, Findchaise H. Loingsigh ri Dail Araide in penitentia mortui sunt.
Flannacan mc. Mael Isu adbur abbad Aird Macha iarna ongadh & iar n-aithrighe thogaide in pace obiit.
Donnchadh H. Taircheirt do marbadh la Niall H. Lochlainn la righ Ceniuil Conaill.
Domnall m. Donnchadha h. Gillai Patraic do marbadh do Gull Gabrain.
Slogadh la Domnall H. Lochlainn co Ceneol Eogain & Conaill & Airgiall .i. co Glenn Righe co ro innarbsatar Donnchadh a righe Uladh & co ro rannsat Ulltu eter H. Mathgamna & maccu Duinn Sleibhe, Dal n-Araide & h-Ui Eachach aice fein. Slogadh la Muircertach H. m-Briain co feraib Muman & co Laighnibh & Connachtaibh co Magh Cobha i foirithin Donnchadha. Slogadh dano la Domnall H. Lochlainn cusna sloghaibh remhraitibh co Magh Cobha beus i foirithin Uladh co raibhe imeisi catha etarru co ro-n-etarscar Cellach comarba Patraic fo ghne sith. Donnchadh imorro H. Eochadha do dhalladh la h-Eochaidh H. Mathgamhna & la h-Ulltu.
Slogadh la Muircertach H. m-Briain & la Leith Mogha eter loech & cleiriuch co Grenoic. Domnall imorro m. m. Lochlainn co maithibh Tuaiscirt Erenn co Cluain Cain Fer Rois co m-badar fri re mis cind comar co n-dernai Ceallach comarba Patraic & bachall Isu beus sith m-bliadhna etarru.
Scainnear crodha eter Fhiru Fernmuighi fadein i torcradar da ridomna Fernmuighi .i. H. Crichan & H. Donnacan.