Kl. Ianair i. f. l. xuiii. Anno Domini m.c.xi.
Doinenn dermair reoidh & snechtai co ro lai ar cenntai & altai.
Cathusach H. Ledai do samadh Patraic uasal-senoir Erenn in pace quiéuit.
Lugmadh do loscadh.
Port Lairgi do loscadh.
Ceanannus do loscadh.
Slogadh la h-Ulltu co Tealach n-Óc co ro thescsat a biledha. Crech la Niall H. Lochlainn co tuc mile no tri mile do buaibh ina n-dighail.
Teine di ait do loscadh Duin Da Lethglas eter Raith & Trian.
Senadh do tinol i Fiadh M. Aenghusa la maithibh Erenn im Chellach comarba Patraic & im Mael Muire H. n-Dunan im uasal-shenoir Erenn co coecait n-espoc uel paulo plus co tri cetaibh sacart & co tri milibh mc. n-ecalsa im Muircertach imorro H. Briain co maithibh Lethe Mogha im erail riaghla & sobesa for cach eter tuaith & eclais.
Donnchadh H. h-Anluain ri H. Niallain do marbadh dia braithribh i mebhail; na braithir h-isin fein do marbadh do Uibh Niallain ina dhighail ria cenn .xx. aidhche.
Comdhal iter Domnall H. Lochlainn & Donnchadh H. n-Eochadha econ Cuan co n-dernsat lan-shith & co tardsat Ulaidh eteredha a riara fein fein do Domnall H. Lochlainn.