KI. Ianair iii f. l. iiii. Anno Domini m.c.uii.
Snechtai lai co n-aidhce do ferthain in Cetain ria feil Patraic co ro la ar cethra i n-Erinn.
Cenn Coradh do loscadh .i. do ait eter da Caisc co sescait dabhach eter midh & brógoid.
Conchobur m Duinn Sleibhe ridomna Uladh do marbadh do Feraibh Fernmhuighi.
Maidm ria n-Uib Bresail for Uíb Meith i torchair a n-ár im a righ .i. Aedh H. Innreachtaigh.
Cathusach H. Tuamman ri H. m-Briuin Archaille do ghuin do Uib Cremthainn co nd-erbailt de. Eogan mc mc Riabhaigh do marbadh na dhighail.
Fliuc-dhoinenn mhor isin bliadhain-si co ro mhill na h-arbhanna.
Mael Patraic H. Drucan do{folio & column MS2 47rb} gabail ferusa leighinn Airde Macha i l-loo feile Ailbhe & Mo Laise Daimhinnsi. Mael Colaim H. Brolchan do gabail epscopoite iarnamharach.
Sith m-bliadhna do dhenam do Chellach comarba Patraic itir Murchertach H. m-Briain & Domnall m. m. Lochlainn.