Kl. Ianair .iu. f. l. xxi. Anno Domini m.lxx.ui.
Gairbeith H. Innrechtaigh ri H. Meith o feraib Midhe, Gilla Crist H.{folio & column H61va} Duib Dara ri Fer Manach i n-Daiminis la Firu Manach occisi sunt.
Domnall H. Crichan ri H. Fiachrach Arda Sratha & ar imé do marbadh d'Uib Tuirtri & do Ceniul m-Binnigh Glinni.
Murchadh m. Flainn H. Mail Sechlainn ri Temrach fri re tri n-oidhchi do marbadh i cloiccthiuch Cenannsa do m. m. Maelan ri Gaileng.
Sloigedh la Tairrdelbach i Conachtu co tainig ri Conacht ina thech .i. Ruaidri H. Concobair.
Maidm Belat ria n-Aedh H. Mael Seclainn & ria Feraibh Muighi Itha for Ciannacht co ro ladh a n-derg-ar.
Cele m. Donnacan cenn crabaid Erenn in Christo quieuit.
Gormlaith ingen Ui Fhocarta ben Tairrdelbaigh H. Briain do éc.